27
1 Mpe dima lene TUHAN miba nide singau simeda di sindem di ninggwenti nggres kei bikes hukum ei mindhe Lewiatan di srei di nghau-nghau nyen dima dip ba, yai nimai bak mindhe nagam di bong muk ngeisi cem.2 Mpe dima lene TUHAN mipai <<Ma jiba doia bikiek Ditde miai ba anggur nghousi di kei-kau kei a.
3 Da di TUHAN rino no di ya ser ba anggur nghousi dima bidiprok bikwop nituti hagom. Diya ser bikwop mmun njap leu binhyepo hi bindei ba, kinei bi.
4 Digga miai ba anggur nghousi dima bu bi. Gino cibou kin war nggig-nggwen no rinaha lene midicok tut bidindig hagom ningwig a. 5 Noro gino Ditde limwa nya ide siceu nya inggok tut gima igwam coi Da lene suar ibakei Dati ser. Igbit ri! Suar ibakei Dati.>>
6 Mben Israel midem kep biei di nigau huk dihyeiti di ndig nut cem ba, ningat mikieng kep dihyeisi dini ninjek dip mem nijam gima kwei.
TUHAN kes hukum ei Nide limwa nya dip
7 TUHAN mikes hukum di buhun ei Nide limwa nya dip noyam kin gi kes hukum di buhun ei ngkiai nya di iba nitok biyok dip bi. Noni miyai nimai bak Nide limwa nya noyam kin gi yai nimai bak Nide nitok nya bi. 8 TUHAN kes hukum ei Nide limwa nya dip tug hon gi com yok ug ei ingkiaisi. Noni ba hou sibut di cut kwei leu mpia nipriti bijji yoni. 9 Noro gino mben Israel itam kwar di ikuk yok bak nya ide nimbar hum dok nya bindung-diem lene Noni mikos ser ide sisar. Suar ma ibindei timek ide nimbar di indig biei nggrai di ui-gwang kei eisi nya kin kwar di bindo tut Kwar Sop Asyera hagom ningwig a.
10 Minu ndig di bon tentara nibousi di igya coi nya dem kep mpia di ha he bong hak tu. Ba, ikes bijo hak bidem kep iggum ndigsi di tungwatu ibong bi pimo. Mindhe-ndhe nimuhup tu nya itat minta bibong nyahan kep inghuisi cem ei sirima. Ba, ibitot biei meng bingwig leu nimbrinap nya. 11 Gino biei nda dima yok mui ba, dahat ei lene sop nya mikwei kam bittei mem biei nindig a.
Mben dima ingon gi huk niti tut mun nyeng hi bi. Apino Allah di pai tes yok nya mingondut yok ba, ningon nggriu sut yok bi.
TUHAN mipui nihyet tut Nide mben ba, inok gi nipou hanyen
12 Mpe dima lene TUHAN minduk Nide limwa nya gom-gom sindam kwei leu Minyei Efrat nyai kikau buug bipek kin minu Mesir de minu niya kwas yamti ba, ibicom yam. Noni mikwas yok noyam kin gi tungwatu ikwas gandum ninjep leu nisina bai pimo.
13 Mpe dima lene pun mbrei nindig nimbi mibong mem gima ibijem mben Israel di icom yok ug ei minu Asyur kin minu Mesir yahagom hanyen kwei. Yoni mikwei ei minu ndig Yerusalem mem gima ikuk yok bak TUHAN ei Nide nungug di kwes-kwau.n