Doia nibinggei sut Allah
25
1 TUHAN e, Nani ne ditde Allah rin ba, dikon anyeng bidinggei sut anyeng cem. Lewo Ade midyai di ayai nya bindei ninggap leusi. Aba angon di gom bindei mbut angon kanti di atin ei habiei leu nimbie him kwei su ba, ug kikau.2 Abindei timek minu ndig nya ba, anggek tentara nibousi di igya coi nya bisinsiou cem tu. Ig nibou ndig di ngkiai nya iwin dima sar hak. Lene iwin hanyen bu bi bijo ninno bijo kikau.
3 Mben ngkiai di isindem bibor nya mikon anyeng ba, timiei nya mittin tut Na bidem minu ndig nya di mben di isibut bibor ide cem.
4 Anok gumihyep ninang coi mem yo di inghuisi jet nya kin gumihyep nibong kei nigwam keisi mem yo di yuhui mbum nya ei mpe di yuum mun di buhun tak yok. Anok mpia di igya nding leu hou di nimig ten. Anok mpia nohousi di igya nding leu mpia niwamti cem. Lewo yo di isibut icut di ihwen munti noyam kin hou sigau di cut mem bed di biang hou a.
5 Ba, yo dima tereu nok hou di dut ei dihyei di ngak-cai. Noro abindei ba, siceu di iba nitok binye yahap iji kan bi. Abindei ba, yo di isibut di ighyet srou kui yamti ntus dem kep nok bumbuhui di yon kep ser mpia yaisi di bindei pror mpia niwamti a.
Allah tin ei midut niyem pestati
6 TUHAN Di Ninyeng Jei Bibor mitin ei midut niyem pestati mem mben ngkiai di dihyeisi dini hagom ei Nungug Sion. Noni ngei njita di nui ngge kei kin ba anggur ngei di nyop kei. 7 Ei nungug dip dima Noni mibindei pren bumbuhui ningon nggukti di jun kep ngkiai nya kros. 8 TUHAN Di Ninyeng Jei Bibor mibindei sar nimai bijo ninno bijo kikau! Noni midip tungwatu yahagom igyai nggwei leu iimaisi bibindei ba, Nide limwa immai sut yonti bidem dihyei nisurti-nipekti bu bi. TUHAN simbot dat tu ba, mun di pai dima mipek kep ri.
9 Mpe dima lene tungwatu yahagom mitri tut biyam <<Noni ne ide Allah ningat-ngat ri. Miba ingon com Noni leu api Noni teu nye bingwes ngun. Noni ne TUHAN ri. Miba ingon com Noni. Jikwei ba, iba ingon di nggei-hi-nggei bimbos-hi-mbos lewo Noni teu nyeni bingwes ngun tu.>>
Allah mikes hukum ei mben Moab dip
10 TUHAN minyohou Nungug Sion noro mico kep minu Moab noyam kin gandum nintam di icom ug ei mimpiang bousi. 11 Timiei minu Moab nya misu inda bidem kep yo di yaha minyei noro TUHAN micut ide ningon jeisi leu yok apino isindem bu bi. 12 TUHAN minggek minu Moab de ngug tig nya kin tentara nibousi di igya coi nya bicom ug ei dihyeisi ba, timek bindung bidem dihyei ndunga.