Nisinsiou mikieng kep minu ndig Yerusalem kin minu Yehuda
3
1 Ningat ne TUHAN Di Sindem Bibor mipos njita kin minyei di jo ngug-ngau kin ide nibou di iba ingon com yok nya hagom hak leu minu ndig Yerusalem kin minu Yehuda. Yo dima ne, 2 pinjoi ndig nihwen kep mun cig nya kin tentara nya kin nikei nya kin nabi nya kin nimbot kep tut mun di mipek kep ei nidipti bu cig nya kin yo di ipingok yam ngonti, 3 kin mimbri kui ningkek cig nya kin ndigpoi di inyeng jei nya kin yo di igya kui nibou ndig nya kin tungwatu di nung kui yok nya kin yo di iba ide ninda dutti bibindei ba, mun nyeng hi pek kep mem tungwatu nya yahagom bicom yok ei minu ting leu itimieisi. 4 Leu api Noni misindui sut ba, pinai pilei di imahan bigyo nya inok nibou di ibie tut limwa nya. 5 Tungwatu nya yonti mico kep yam nyen. Pilei nya igimiap ndigpoi nya ighyet bi lene nikinei-kinau nya igikuk yok bak ndigpoi ndig nya ba, igibit ighyet bi.6 Mpe dima dem ne tungwatu nya mindo ide adig-ajoi gom bipai bak <<Nangkom he rino ajuk sinsun di tot na. Gima rino nita na ba, anok nibou di bie tut nye mem nijam di nggruk dini.>>
7 Noro noni misrep <<Dani ne no di ninda kan rin bi ba, njita kin sinsun niken hi jo bida bi! Ma jibidip huk da bidinok nibou di bie tut je au!>>
8 Ningat ne minu ndig Yerusalem cut bitimek tu! Minu Yehuda lus tu! Ighyet kin ibon munti nya hagom hwen bit TUHAN bisrep huk Nide nisindemti cem. 9 Ikon yontiti dima bindo tut ide nibon munti di kinei ri. Ibon sisar brei hak noyam kin gi mben Sodom ibon di nipou cem. Buhun bibor mem yok! Yonti ibindei ba, mun di buhun cut igkep yonti hanyen.
10 TUHAN pai <<Apai bak yo di ibit dihyet bipia yoni mingon nggei-hi-nggei ba, ibong kei igwam kei lene yahanggwap mbilen mikuisi bi lewo migyem kep ningat di ntun him. 11 Noro buhun bibor mem yo di isibut nya! Midibibon yok noyam kin gi yoni ibibon nindigsi nya.
12 Nipos mitiei cig nya mico kep ditde limwa nya ba, inok adrom di muhun Ditde limwa nya inggrom leu yok.>>
Ditde limwa jen e, nibou nya ico kep je bibindei srawir je apino jingon kiowi tut puig di kei mem je.
TUHAN gwam nok nikei mem Nide limwa nya
13 TUHAN tin ei mem gima pai kep Nide limwa nyac bigwam nok nikei mem yok tu. 14 Noni kiju binok nikei di yai nibou tut nibou nya di ibie tut Nide limwa nya. Noni pai kep yok <<Jeni rino jipos ba anggur ningat leu miai ba anggur nghousi nya ba, jide ig mpung tut ndigban di jipos leu yo di yuhui mbum nya. 15 Nggon rino jico kep Ditde limwa nya bijiyem yo di yuhui mbum nya imuhup i? Da di TUHAN Di Dinyeng Jei di Sindem Bibor cem disimbot dat tu.>>
Nisok kep sop minu ndig Yerusalem nya ngkiem
16 TUHAN pai <<Sop minu ndig Yerusalem nya ikon yonti bibor! Inggei-nggwang ba, ikek igyai igkei cem. Iba inggei bicom imig ba, srak di ikes ei imig hwen yam binggileng cem. 17 Noro midikes hukum ei yoni dip. Kudis mporo ullen ei ibou ngkekti bitig dino ikak ibou nta leu ba, ibou le.>>
18 Njap nicunti midem lene TUHAN mipos mimau ngot di sop minu ndig Yerusalem nya ibimau yok di inggei ngwig sut dima bitut mimau di ibingot ibou kin srak di ikes ei imig kin mbrawin di indei ei ikimam, 19 kin srak di ikes ei inda kin minghas di ibinggai ser iimaisi, 20 kin minghas di ibinggai kep ibou kin ide seig ut di ibikri inda pang kin ikimbu dip di sindem tut yok, 21 kin ide srak mien di ibijuk inda pijum kin ide srak di ipindur ei ihwap jou, 22 kin ide sinsun nibon pestati di kei-kau nya kin ide sinsun ndok di jei di cut bigwam imig gom kin ide minghas di ibinggai ibou kin ikimam cem kin ide bang dop nya, 23 kin sinsun di dile kei kin sinsun di iba minghas linen bibon kin mun di ibingot ikimam kin minghas di nijei di ibinggai ser ibou kin iimaisi cem hagom leu yok.
24 Nogindini yoni iba mini ibou di ui-gwang kei biprok yonti noro niabiati ne inghap mpiei. Midiba kuk di singga biluei ide bang di nggriu-nggrop kei di ibikri intig bou. Yoni mikak ibou nta di kei-kau leu ibou bile. Iba sinsun di rik-ta biluei ide sinsun di nggriu-nggrop kei nya. Yuubuti mipror hanyen leu yok lewo dibindei ba, nimmai nggai kep yok.