Nijam di tungwatu nya ingon kwes kin yam bijo ninno bijo kikau
(Mi. 4:1-3)
2
1 Allah pai ningon kanti tut timiei Yehuda kin timiei minu ndig Yerusalem nya bak Yesaya di Amos nipmot,2 <<Ei nidipti bu ne mbigdip di TUHAN De Ig joti jei ndig krop dor njiriek mbigdip nindigsi nya hagom. Mben dihyeisi dini hagom minduk yam kwei ei gumihyep dima.
3 Yahagom mipai cuk yam bipai bipia jikwei ba, yahagom ikui ug ei TUHAN De Mbigdipb ba, ikui ug ei mben Israel ide Allah De Ig. Noni mingginau nye tut mun di suar igyai kep nya. Nyeni mibit puig di Noni ndo binye lewo TUHAN nipingok nyeti nya kwei leu minu ndig Yerusalem. Noni miya ei nungug Sion bimbrap bit nye.>>
4 Noni migwam nok nikei mem ngkiai nya bidem dihyeisi dini hagom leu api mikos tut ide munhyet nya. Yoni mitug ide simeda nya hagom binok ngkimom nitu di ibiwim dihyei. Yoni miprin ide tigtug nya hagom binok singau koi. Mpe dima lene mben dihyeisi dini nya mikon pran bit yam binjei siceu bu bi sren.
5 Je di jintun Yakub him e, jikwei ba, imbut ei nipigati di kwei leu TUHAN!
TUHAN mibindei sar yo di ingon jei nya
6 Allah e, akes Ade limwa di Yakub de nintun him yamti di bram yam nya ei su! Lewo nikan tut mun di jo nding di kwei leu mben ngkiai ei nite bei mpia nipriti nya kin mben Filistin cem kieng kep minu dini tu. Ade limwa nya igyai bram mben ngkiai ide niyai munti di kinei nya. 7 Ide minu mpung tut perak kin mas ba, ndigban di ide nya ngwig kan bi. Kuda kin kroba pran di ide nya cem mang bibor ba, gi mbun ikwop nimangti kan bi. 8 Kwar di ikuk yok bak nya jo bidem minu nisurti-nipekti ba, ikuk yok bak kwar di yonti ibon bou inda him nya cem.
9 TUHAN e, ma akos ser ide sisar au! Tungwagom-gom ninyeng micut bigwam ei nimmaiti.
10 Yoni minang ug ei nungug di bon hak mihyeti nya biku yok ei jui dihyei jou leu binhyepo ingwes ngun leu TUHAN niggati kin Nide nisindemti di nindig bibor. 11 Yo di inggei sut yonti inyeng micut leu api yo di ingon jei mikuk yok bak TUHAN lewo suar tungwatu nya ikon Nongkom ninyenga. 12 Njap dima ne TUHAN Di Sindem Bibor mico kep yo di ikon yonti yahagom bikes hukum ei yo di inggei sut yonti kin yo di ingon jei nya yahagom dip. 13 Noni mibindei sar buom Libanon di nijei ndig ngat nya kin biei minu Basan di nindig ngat nya cem hagom. 14 Noni mibindei ba, nungug di jei nya kin mbigdip di bon nipieti di jo anai hagom sur yam kei noyam kin briep bou him. 15 Noni minjei ig di bon ninggre di jo-jo yam dip anai nya kin ngug tig di bikrop ttai tentara nibousi di igya coi nya hagom bitti hak. 16 Noni mibindei sar kibar di nindig bibor di kei-kau nya hagom bicut ei minyei jou. 17 Yo di inggei sut yonti inyeng micut ba, yo di ingon jei mikuk yok bak TUHAN lewo suar tungwatu nya yahagom ikon Nongkom ninyenga. 18 Kwar di tungwatu nya ikuk yok bak nya cem misar bihigom.
19-21 Mpe di TUHAN kiju bibindei ba, dihyei ugwa-kwei ne tungwatu nya minang ba, yuug ei nungug nya biku yok ei hak mihyeti kin jui nsi ei dihyei jou nya cem leu binhyepo ingwes ngun leu TUHAN niggati kin Nide nisindemti di nindig bibor nicig-caisi. Mpe dima cem yoni micom ide kwar di ikuk yok bak nya di iba perak kin mas bibon ei ba, ncup kin hakom nya mitot yaham eisi.
22 Gima rino ma jiba jingon com tungwatu di misar nya au. Lewo tungwatu idem kep nok mun di bon ninyeng bi.