10
1 Kros gom ngat di mai bindei mpiei mini di ui-gwang kei ampou nuut gom titut yam. Ningon mbumti poi mien bindei pror ningon ki biborti.2 No di ningon ki ba ningon di dorti bibon mun lene gima ngan-ngan tu. No di ningon mbum bon mun di kinei.
3 Ningon mbumti pima jo nibreisi tug hon niyai munti nya hagom ba, bindo nibbweti bak hiter nya yahagom.
4 Gino nibou hi gga na lene ma ahara mem gima aom na leu midyai di ayai mem nya au. Mbro nok gino atunggweisi nindig lo, gino aba abou coi mem noni ba, aom angon tut lene gima mibindei ntus nigga nati.
5 Mun di kinei di dingat ei dihyeisi dini hi bu no rinaha. Mun di kinei dima rino nibou di yai mun di tunggwei nya.
6 Ningon mbum nya bihi ikui bigwam nok yo di inyeng tak kep limwa nya. Noro yo di inyeng nya bihi inyeng tak kep mun nyeng hi bi.
7 Dingat awak nya bihi di ikui kuda bigwam dip lo, yo di inyeng jei nya bihi imbut imig tereu nok awak nya.
8 No di tig jui nonti micut ei jui dimati. Wou di tot naham ei ngug tigti maham no di nggek ngug tig dima.
9 No di yai midyai ninggok tig mma di mibei tig ei tig mma bousi mibiam tig bibok ug ri. No di pes biei mibiam biei.
10 Gino hamboi ade ngwam lo, asien bi lene suar amem anghat tignam bibor ba, abiyai midyai leu api amuhup drek dip. No di tukan miba ningon kiti bikos tut midyai di yai nipou ug e.
11 Nipijuk kep wou cig tug ndei nimuhup bi gino wou ham noni nipou tirigi pijuk bigyo.
12 No di ningon ki nihyet di pai bindei ba, tungwatu nya inggei sut noni. Noro no di ningon mbum nihyet di pai bindei sar nonti.
13 Noni kinyon ei gipai nihyetti lo, suglai mun bit leu nisuglai mun ngan-nganti noro bikui dip gimbrap nok no di mirei bon.
14 Ningat ne no di ningon mbum huk nihyet kikau. Njap nidipti jo nding leu nyeni yahagom. Bit bon hi tri tut mun di mipek kep mem nye ei niabiati di ipror leu dihyeisi dini kan bi.
15 No di ningon mbum com nahanggwap ei midyai di yai nyati noro ninghuisi wei drek dip lewo ningat ntun him bi.
16 Ayo! Buhun mem minu di bon nide nibou ndig di pinjoi pilei he di nide nibou di igya kui noni ibon pesta bijo kikau ug bipek njap kep.
17 Noro mben hi di ibon ide nibou ndig di nihyet buhun ba, nibou di igya kui noni igyem njita mem nituti di igbit leu binhyepo inghuisi kwes ba, ikou sut gi idut pes di pu yok cem lene gima yok hagom bindei ba, timiei minu dima ingon nggei-hi-nggei.
18 Gino ikinding cau haigtu bi lene cau bitun-ta. Ig dima mikroi binggun lewo ig ceu nghen.
19 Niyem pestati bindei ba, ighyet ngwig kep yam. Ba anggur ngei bindei ba, ingon llei bibor. Noro isuar mitiei mem gima ibipek igyemti nipou ug e.
20 Ma jiba jihyet kin jingonti biyai nibou ndig au. Mbro nok gino jingat rin ei nghim nsi di jibong eisi rin lo, ma jikucang yo di inyeng au. Leu hi rima ha ningut gom miap jipaisi dima leu api ug tri tut hanyen bak no dima bu o.