9
1 Lene digruap bidiba dingon bisrip huk mun nyeng gom kin bu. Gima ne Allah ninyeng tak kep no di ningon sren kin no di ningon ki bitut igyai munti nya hagom ri. Gino Allah mijoi sut yok e, he kou sut yok e lene ikan tut bi. Hi di kan tut mun di mipek kep ei nidipti bi. 2 Ningat ne mun di Allah kos tut ei mem tungwatu nya dima mipek kep mem bibikwop tungwagom-gom bitut no di ningon sren kin no di sibut cem no di ningon kwes kin no di ningon rom cem no di bon midut nibikuk no bak Allahti kin no di bon midut hi bi cem. No di bon mun di kei kin no di bon mun di kinei yahacem itug ndei mun di Allah kos tut ei mem yok. No di ba neheng bipreu ei kin no di ba neheng bipreu ei bi cem yahacem noyam. 3 Ba, mun di Allah kos tut ei mem tungwagom-gom mipek kep mem yok bibikwop yahagom. Gima ne mun nyeng gom di biyai ingon di buhun rin ba, noyam kin mun nindigsi nya di pek kep mem tungwatu dihyeisi dini hagom. Tirigi tungwatu nya ingonti mpung tut mun di buhun ba, ibou ngwakti cem mpung tut ningon mbumti cem mem nijam di igyaijo ei dihyeisi dini. Leu api innei kimbas kros hak.4 Noro yo di innei no jo ihwap nsi yo igyok ingon mem mun di mipek kep mem yok ei nidipti bu. Apo nsien di ninnei jo nihwap nsi kei bibor dor njiriek mindhe singa di ninnei kimbas tu bi e?
5 Igbit ri. Yo di igyaijo nya ikan tut bipia igyaijo ningwig honti mem kep ser yok. Noro yo di imai su nya ikan tut mun nyeng hi bi. Imuhup mitau biyok bu bi. Lewo hi di yok ngon kep nimai nya ide midyai di igyai nya bi.
6 Ide ningon ngakeisi kin ide ningon mpo tutti kin mun di ingon pri kep nya hagom mai bit yok tu. Yoni miba yok bikum tungwatu dihyeisi dini ide mun di pek kep mem yok bu bi.
7 Nnaba aba angon di llei biyem njita cem aba angon di nggei-hi-nggei bidut ndia ngei cem hak ug lewo Allah miwok na drek dip bi. Noro mijoi sut na.
8 Abindei ba, aimaisi kwes ba, angon nggan cem ei tungwatu nya igyai him.
9 Ma angon llei sut nijam di abong bit atnem di angon ngakei kikau bibou ade niyaijoti di Allah yai bina mikuisi ei dihyeisi dini ngwig ug e. Mbro nok gino ade njap hagom nok nimikui-kausi he lo, ma angon llei sut hagom leu gima ne amuhup di atug ndei mem midyai nya di acom ahanggwap tut ri.
10 Ma ata abou ei ade midyai nyati sri lewo tungwatu nya igyai midyai cem ikan-kan nyen cem ingon dor niti cem ingon ki cem ei minu nimai nya ide bu bi. Ba, mporo ador ug ei sirima.
11 Dingat hi kin bu bou diyai him ei dihyeisi dini. Ibinang yam ne mpe hi no di dor sindem ug krau nipekti bibie bi. Ikon pran ne mpe hi no di mimbri kui ningkek bindei sar nide siceu bi. Mpe hi no di ningon ki tug ndei mun di bahati tut nonti bi. Mpe hi no di nintin kimbo nyeng tut mitiei nindig bibor bi. Mpe hi no di ninda bit hou tug ndei ninyeng di jei bi. Lewo mpe hi ne mun di buhun cut igkep tungwatu nya yahagom.
12 Tungwatu nya ikan tut ide tto bou mem innei kimbasti bi. Dem kep nok ha nya di iteu ei binggrai di bikingkrai yok kin wau nya di ibiam jala. Nok gima cem tut tungwatu nya ba, mun di buhun cut igkep yok mem njap di ikan tut bi.
Nikan-kan nyen tut ningon kiti kin ningon mbumti
13 Gi bram dini ne bindo ninyeng gom di dem igbit hak tut notou tungwatu ibibon ningon kiti ri. 14 Minu mien gom di bon nide limwa ibou poi he no rinaha. Ug ei mpe di gom lene nibou ndig di sindem bibor gom hei sut nide tentara nya ba, ikwei mem gima icoi minu mien dima bihwen. Igyon ttai bitin ei mem gima inggek ngug tig di bikrop ttai cem. 15 Tungwagom di nintin kimbo lo, nuhui mbum no rinaha ei minu mien dima. Noni ba nintin kimboti bibindei ba, timiei minu mien dima ingwes ngun leu siceu di inggek minu dima inda nsi. Noro timiei nya ibbwe ser no dima ninyeng jeisi hak drek dip nihui di mbum pima. Ba, tungwagom ngat cem giyok ngon kep noni bi. 16 Disimbot dat ninno tu bipia ningon kiti kei bibor dor njiriek nisindemti. Mbro nok gima lo, hi di joi sut nuhui mbum nya ide ningon kiti bi. Hi di ngig nitingou mem ighyet di ibipingok tungwatu nya bi.
17 Ningig nitingou mem no di ningon ki tut nipingok nye nyahanti kei bibor dor njiriek gi imiap kep nibou ndig nihyet tirigi hara mibbwe nya leu binhyepo ikwei mpu noni.
18 Ningon kiti bon ninyeng dor njiriek minggwen di ibikon pran. Noro bon ningon mbumti poi mien binggek tut niyai munti di kei mang bibor.