8
1 No di ningon ki ne no di ningon kei ri. Noni kan tut nibuhupti mem munhyet hagom. Nide ningon kiti bindei ba, noni humpo tut ningon di nggei-hi-nggei ba, niimaisi piga bijo kikau cem.Ma abit nibou ndig nihyet
2 Gino nibou ndig cuk na lene ma abit nihyet lewo Allah preu ei mem noni tug hon neheng tu.
3 Ma abipbur ba, aom na leu nibou ndig noho bei au. Lene ma abicom yam bit yo di yaham imbuk kep noni au. Lewo nibou ndig sindem mem gima yai nibou tut mun nyeng hagom bit leu ningon kanti.
4 Nibou ndig ba nihyet di buhun bibon mun. Bit bon hi dima srep tut noni kan bi!
5 Yo di ibit nihyet ibicom yam bit yo di yaham imbuk kep nibou ndig bi. Yo di ingon ki nya ingon hukti bipia Allah miyai nibou tut mun nyeng hagom dem igbit nituti.
6 Nituti kin nisinati mem niyai munti hagom no rinaha. Noro ingon dorti tut mun nyeng poi mien bibor he!
7 Tungwa hi di kan tut mun di Allah kos tut ei mem noni ei nidipti ba, hi di mipai sut mun di mipek kep mem nye ei nidipti bu cem bi.
8 Tungwa hi di teu nonti leu nimaisi ba, om kep nimaisi ei mem mpe hi bu kan bi. Hi dima kos tut nitutti mem gima ug um nimaisi bi. Bit bon hi dima om no leu pran dima kan bi. Mbro nok gino nggok puig niris munti lo, ningwes ngun leu nimai kan bi.
Ibinai sut no di ningon sren kin no di sibut
9 Tirigi diyok diyai kep mun di pek kep mem tungwatu dihyeisi dini hagom lene dingat mun nyeng hagom. Mpe hi lene tungwatu nya iba ide nisindemti bindei ba, mun di buhun cut igkep yo di inttig-tta nya noro mun di buhun dima kui yahacemti. 10 Mpe hi ne dingat lo, yo di isibut nya imai leu api itig yok. Noro tirigi ingkwei hanyen leu jui dip biyuug ei ig bei lene ikon yo di isibut dima inyeng ei ide minu ndig di nok mpia di igyai kikep ide mun di sibut eisi pima. Bit bon dingon dorti tut gima cem kan bi.
11 Nggon rino krop kei mem tungwatu ibon mun di kinei i? Lewo ikan tut bipia nikei mikes hukum ei yok dip haninyai drek dip bi.
12 Mbro nok gino no di sibut bon sisar nimangti sratus gom ba, nide njap cem jei lo, dikan tut bipia no di bit Allah nihyet bikuk no biNoni mimbrek-mimbrek mporo bong kei gwam kei.
13 Noro no di sibut muum mun di nggruk mang bibor mem nijam di niyaijo ei dihyeisi dini. Noni muum niyaijo ningwig honti kros ba, dem kep nok ningwes di jo jei bi bipren hanyen. Noni mimai urung drek dip gi bit TUHAN nihyet bi.
14 Mun di bit bon tungwatu nya ingon dorti tut kan bi pek kep mem yok ei dihyeisi dini. Mpe hi ne ikes hukum ei no di ningon sren dip tereu nok no di njiriek Allah nihyet lo, nimuhup tau bak no di sibut tereu nok no di ningon sren. Bit bon dingon dorti tut mun dini yok cem kan bi.
15 Gima rino dibrim dihyet ei nipingokti dini. Suar tungwatu nya igyai ingon llei bibor drek dip njita di igyem kin ndia ngei di idut kin gi ingat ingwes ei ningat di itug ndei tug hon ide midyai nya. Gi ndima he rino mijo mem yok mem nijam nicom nahanggwapti di Allah yai biyok ei dihyeisi dini. Mun nyeng hiter di biyai ingon llei bibor hi jo bi.
16 Tirigi dibrim dingkek mem gima diyai ningon kiti bidiyok diyai kep mun di pek kep mem tungwatu dihyeisi dini hagom lene dikan tut bipia bit bon nyeni ibong mai mem mmun jei-njap jei kan bi ba, 17 isindem mem gima ingon huk niti tut Allah nibon munti nya kan bi. Mbro nok gino ibingon-ngon nyen lo, dem tut gima ingon huk niti tut bi sren. No di ningon ki pai bipia noni kan tut gima yok tu noro ningat ne kan tut bi.