No di ningon ki niyai kepti nya
11
1 Gino jikwas jide mun di jimati tut yam lene mijitug ndei mun dima yok hanyen dem igbit nituti.2 Ma jippiet jimati dima bak ibou muhwindacan e, he ibou muhwindaningai e ba, jibitin ei nipou tirigi mun di buhun hi cut igkep je bigyo.
3 Biei di tti ug ei dihyeisi mijo nijoti ei mpia di tti eisi dima. Mpe dino bumbuhui ndok bibor lene mpia but.
4 No di ngat lo, hou nimig kui bei iggum ndigsi ndim ningan bi. No di ngat lo, bumbuhui tap bei mpia nikimbasti bet ningon bibou mpia ngei ug e leu api ug kos gandum nitu kwei ei ig gudanti.
5 Allah pai tes mun nyeng hagom. Bit bon tungwatu nya ingon dorti tut niyai munti nya kan bi. Nok gima cem bit bon ingon dorti tut ningwoi-ngwoi di sindi niyaijo ei nipmem ninghopti kan bi.
6 Ma jindim ningan mem njap bigyoti lene ma jikes hon mem mmunti au. Lewo bit bon ikan bidem tut gi hi di nnum kei kin gi hi di ngoi-nga kan bi. Mpaba hacem hei kin gi gohou kei.
7 Mpia di com nimig bindei ba, ingon kei. Tirigi ingat ingwes eisi ne ingon llei bibor.
8 Gino ade njap kum eisi lene ma apai sigyo. Noro ma ayok ngon kep bipia mbro nok gino ayaijo jei bibor ei dihyeisi dini lo, ade nijam di angat rin ei minu nimai nya ide mijo ninno dor njiriek bu. Ba, mun di mipek kep mem nye ei niabiati bu jo ku. Bit bon ingon dorti tut mun dima yok kan bi.
Nipingok pinjoi pilei nyati
9 Na di pinjoi pilei yo e, ma angat angwes ei nijam di apileiti! Ma ayai nillei mem nijam di apileiti. Ma abit ade ningon joi sutti nya kin mun di kei di ayai ngat nya hagom. Noro ma ayok ngon kep bipia Allah di ningat rin ei gwamti mimbus angonti drek dip ade ningon joi sutti kin ayai munti nya hagom. 10 Ma acom ningon bos-bos nyenti kin ningon buhunti leu angon bei hak ug. Lewo nijam di apilei minjiriek na haninyai yo.