19
1 Gino ahui mbum ba, angon gom ne gima kei dor njiriek no di ningon tindur biris mun igkei.2 No di nijoi bibor noro nintin kimbo bi ne gima kei mem bi. No di ningon jo nyahan bi yai mun cico bikrau tunggwei puig.
3 Ibou poi iba ningkek ndokti bimangkrei yonti igyaisi leu api injei kep TUHAN.
4 No di nyeng bon nisut bat nya hi kin bu bikwop njap noro no di nuhui mbum nisut bat nya ikes noni ei bimbut leu.
5 Bit bon no di ris mun ei nikei noho bei ningwes ngun leu hukum kan bi.
6 Tungwatu nya yahagom ibrim ingkek kep no di ninyeng jei bibingon mem gima ngondut yok. Yahagom ibingon mem gima ihig isut bit no di ningon mba.
7 Gino nuhui mbum nide bat nya iba ingha bak noni lene ma anga leu tut gi noni bon nisut bat nya bi au. Mbro nok gino noni brim ningkek bihig nisut bit yok lo, ikou sut.
8 No di bisau sut nintin kimboti nyohou nonti niyaisi. No di yok ngon kep mun di noni pikor tut nya ningon nggei-hi-nggei.
9 Bit bon no di ris mun ei nikei noho bei ningwes ngun leu hukum di bindei nimai kan bi.
10 Gino no di ningkek ndok bong kei gwam kei lene gini kei mem bi. Gino awak ninyeng tak kep ninyeng jei nya ne gini cem kei mem bi.
11 Yo di ingon ki nya yoom ingon kan. Gino hiter yai mun tunggwei sut yok lene yoni iba igyai ngat he leu api tungwatu inggei sut yok.
12 Nibou ndig di gga bibor ba nihyet di noyam kin mindhe singa niyausi bibuhup. Noro nisingat tut tungwatu nyati noyam kin ham mbon di llet kwei mem mpia ngeisi.
13 Munggwom di ningkek ndok bindei ba, mun di kinei bibor micut igkep nicig. Sop di nihyet jo kikau kep nijjep ninyen noyam kin yop di diem-diem nyen.
14 Bon tungwagom ba nokep ig kin mitiei leu nicig-nipmem nya lo, TUHAN Nongkom bindei ba, no dima wak sop di ningon ki nok nitnem.
15 Nnaba asindui sut no di nghen bibong mai hak ug. Noro jei bi ne ninggum minos noni.
16 No di bit Allah nihyet nide njap ug ei ari bingwam mang bibor. No di bit nihyet bi mitug ndei nimai.
17 Gino angondut nuhui mbum nya ba, ampu yok lene gima nok ade ningwam di jo bak TUHAN. Noni mirop ningwam dima hanyen bina.
18 Ma apingok kep amunggwom ningonti tirigi nituti ngwig bigyo. Gi bi ne gima bindo bipia ajoi sut amunggwom nisarti ri.
19 Ma asindui sut no di gga-gga wai ba, biang nide niyai munti nibuhunti. Gino aya hacan mem noni ne nigga-gga waisi bikum eisi.
20 Gino angig atingou mem yo di ipingok angonti ba, asindui sut hi ngginau nani cem lene jei bi angon ki.
21 Tungwatu nya ikos tut ingon kanti ninyeng mang bibor noro TUHAN nikos tutti nya he rino mipek kep.
22 Tungwatu nya igyok ingon mem no di ningon gom. No di nuhui mbum bon ninyeng dor njiriek niris mun ei nikeiti.
23 Gino akuk na bak TUHAN ne Noni mibindei ba, ade njap ug ei ari bingwam mang bibor ba, angon jo nyahan cem ba, angwes ngun leu ade siceu nya indati cem.
24 Ibou poi ide ninghen biborti bindei ba, iket njita ug ei insi bi.
25 Gino yo di illei-lau nya itug ndei hukum lene gima ngginau yo di imahan bigyo. Gino hi pingok kep no di ningon ki ningonti lene nintin kimboti mikum eisi.
26 No di mbuk tut nicig-nipmem nya bijji yok leu ig bei yai nimmai bak nonti ba, hiter ingwes om noni drek dip.
27 Dimunggwom na e, gino akes hon ba, apikor tut mun nyeng hi bu bi lene jei bi mun di apikor eisi tu nya mipren hanyen leu abou ngwakti.
28 Gino no di ngat mun bou niyai him ris mun bak nikei lene no dima co kep hukum. Nibon kep mun di mbuk cig rai sut mun di kinei noyam kin yo di irai sut njita.
29 No di ba nihyet bicig Allah mitug ndei hukum. Tungwatu nya mimbas no di ningon mbum ninghim bimos kei.