20
1 No di dut pes di pu no ningkek ndok lewo nidut pesti bindei ba, tungwatu nya iliriem yam ba, ibui yam drek dip.2 Nibou ndig di ningon sibui dem kep nok mindhe singa di nggiling. No di bindei ba, nibou ndig ningon mbuk tut noni noyam kin no di ya um nimaisi.
3 Yo di iliriem yam yahagom ingkek ndok. Tungwatu nya minggei sut na gino aom angon ba, aba na kum yok bi.
4 No di ninda jo kep nide midyai biyai miai dem igbit nituti bi miyai njita kwei leu beisi cem bi.
5 Tungwatu nya ingon bei kanti nya noyam kin minyei bousi ei jui di jut bibor nijoua. No di nintin kimbo dem mem gima tau minyei dima kwei.
6 Imang bibor ipai sut yonti bipia ingon gom tut isut bat nya. Noro nggruk bibor mem no di nggok tungwagom di ningon gom bihig nisut bit noni.
7 Munggwom nya di ibon icig bat di igyai munti nya kei bibor kei di ingon gom ne ingon nggei-hi-nggei.
8 Nibou ndig gwam nok nikei mem tungwatu nya bingat igbit ide mun di kinei nya hagom.
9 Tou ridem mem gima pai sut nonti <<Dingon kwes kei bidimbres danti leu sisar cem tu,>> i?
10 TUHAN ningon mpo tut nitri-nipek kep mun cig nya di ba ide nai kin kilo di igbit bi nya biris mun bak tungwatu nya.
11 Munggwom nya indo ide ningon kwes keisi kin ningon srenti tug hon igyai kepti nya.
12 TUHAN pai tes tungwatu nya itingou mem gima ibimiap kep nihyet lene pai tes igyai njep mem gima ibingat.
13 Gino abong mai kep anghuisi kikau lene jei bi ne ahui mbum ri. Gino anda jo kep midyai nya lene jei bi ne atug ndei njita nok gi dem.
14 No di pek ndiyok lua sok nyen tut nibok di kak noro niabiati pek tu lene ningon llei sut mun di noni pek kin nibok dima tu.
15 Nihyet mimun di tibim leu ningon kiti nibok kak bibor dor njiriek mas kin tig permata nibok.
16 No di preu ei mem gima ya hon ningwam di nindigsi nya ibon ningon mbum bibor. Dem mem gima ipos mun di noni nyeng tut nya hagom bibet ei mem ibirop mun di noni preu ei dima.
17 Mun di ayai tug hon ade niris mun bak tungwatu nyati tereu nok njita di ui-gwang kei ei nimbie him noro jei bi ne noyam kin tig njep ei ansi.
18 Tirigi akos tut ndiyok ne ma asindui sut ba, hiter ipingok angonti tut. Gino akos dat angon kanti bidem kei mem gima anjei siceu bigyo ne ma akon pran au.
19 Bit bon yo di ittei mumpui ei yamti iku mimun ei ingonti kan bi. Ma ambres nanti leu yo di ikibou bei mbrai nya.
20 Gino ahyet wer mpiahi tut acig bat-apmem bat nya ne ayaijo mingwig hon nohonti dem kep nok njeng mbrei di mu ba, piga digai nidinditi bu bi.
21 Gino krop kei mem atug ndei mitiei ei nimbie him ne mitiei dima mibindei ba, angon nggei-hi-nggei bi ei nidipti bu.
22 Ma aba ambuk buhup mun di mbuk au. Noro ma aba angon com TUHAN lewo Noni midime kep munhyet dima nok gi igbit.
23 TUHAN ningon mpo tut nitri-nipek kep mun cig nya di ikrau kep ide nai kin kilo di igbit bi nya.
24 TUHAN Nongkom kos tut puig di dem mem tungwatu nya ikak mem nijam di igyaijo ei dihyeisi dini. Gima rino bit bon nyenti ingon dorti tut ide puig di ikak kan bi.
25 Ma akan-kan nyen nok gi dem nipou tirigi apigig sut mun nyeng hi ei mem gima abibon midut bak TUHAN bigyo. Mpaba anso nanti tut ei niabiati bu e?
26 Nibou ndig di ningon ki ngat igbit yo di isibut bibor nya leu api kes hukum ei yok dip. Noni kos ser ide nisibutti nya bi.
27 Ningon mien ne ninjeng di TUHAN pai tes ei mem gima piga digai ningon kanti nya hagom ri.
28 Gino nibou ndig ngondut limwa nya ba, ningon gom tut yok ba, ningon sren tut yok cem lene ninyeng mitak kep yok kikau ug bipek niyaijo ningwig honti.
29 Tungwatu nya inggap leu munggwom pilei nya tut ide nisindemti ba, inggei sut yo di iwer andig-ndau su nya tut ibou nta di tiei.
30 Mpe hi mun di buhun di cut igkep nye bindei ba, ittin ser ide sisar ba, ingon kwes kei hanyen bu.