18
1 No di mbres nonti leu yo di hiter ne no di hek tut nonti ningon kanti nya he rin ba, ningwes om kep nindigsi nya ingon kanti nya.2 No di ningkek ndok hek tut ningon di dor niti bi. Noni com nihyet tut nonti ningon kanti nya he.
3 Nibon sisarti kin nimmaisi hacem bit yam. Tungwatu nya mimbres kep no di ningon mui.
4 Nihyet di tibim ei tungwagom nuhui him dem kep nok ningon kiti nibousi bijut bibor noyam kin muk ngeisi ba, pimbai kei noyam kin minyei bousi cem.
5 Dem tut gima atti kin no di ningon mui ba, akes hukum ei no di ningon ngun dip bi.
6 Gino no di ningkek ndok mbrap ne nihyet bindei ba, tungwatu nya imbuk tut yam leu api imbas noni drek dip.
7 Tirigi no di ningkek ndok mbrap lene noni bimangkrei nonti niyaisi lewo nimbrapti dima nok bon di srou nonti.
8 Nittei mumpui ei yamti noyam kin mikwau di ngge kei ba, tungwatu nya ijoi sut gi ipinde.
9 No di nghen noyam kin ninggek kep mun cig.
10 TUHAN dem kep nok ig di bon ninggre di jo-jo yam dip di inang coi. Yo di ingon sren nya igwam coi ig dima bingwes ngun leu ide siceu nya indati.
11 Noro yo di inyeng ikan huk bipia mun di inyeng tut dima dem kep nok ngug tig di bikrop ttai yok bikkin ser ide siceu nya.
12 Yo di illei-lau nya micut. Tungwatu nya inggei sut no di ba nibou coi mem yok.
13 Amiap kep tungwagom nihyet nipou tirigi abuhup bigyo. Gi bi lene angkek ndok ba, ahyet tigut no dima.
14 Gino anggwen lo, angon lleisi dahat bi ne kei bibor. Gino ayok angon mem gima akei hanyen bi ne kei mem bi.
15 Yo di ingon ki nya inggobiau sut nintin kimboti ba, ita ibou ei nipikor tut ningginausi.
16 Munkwas di kei di anjei bak no di ninyeng jei mibikau dimbou leu na bibuwak na ug ei no dima noho bei.
17 No di ya ei nikei noho bei bibie kan bipia nibuhup bak nikeisi igbit tu lo, mibinai sut nibuhupti dima tirigi nide siceu kwei dimig bram nibuhupti dima.
18 Gino ibou can di iji ngkiem ibrim ingkek kep nikei lo, noni kos tut yok kan bi lene ma noni ko binggok tut ide munhyet.
19 Gino acug titip ade bat gom ne gi mbun adideu noni hanyen kan bi lewo noni tereu nok minu ndig di bon ngug tig di bikrop ttai. Niliriem yamti noyam kin dimbou pmem di ilit ser tu.
20 Suar nyeni ibiang ipai munti nya nibuhunti hagom.
21 Idweb sindem mem gima nyohou ide niyaijoti lene, bindei ide niyaijoti kinei cem. Suar tungwatu nya ibiang ipai munti nya nibuhunti.
22 Mun di kei di tungwagom tug ndei ne niwak nitnemti rin ba, gini ndo bindo bipia TUHAN singat tut noni.
23 Gino no di nuhui mbum hap niji bimbrap lene ba nihyet nggriu bimbrap. Noro no di nyeng ba nihyet di singga bibuhup.
24 Asut di ningon gom bi no rinaha noro no di jem nisut bit na bon ninyeng dor njiriek ade adig-ajoi nya.