17
1 Niba ningon jo nyahan biyem pas dem hot gom he kei bibor dor njiriek niyem pesta bit yo di iba nitok biyamti.2 Awak di nintin kimbo nim kep niceu nipmot di nghen bibor apino miba nokep ndigban noyam kin niceu nipmot bat nindigsi nya.
3 Tukan nya iba hum bibingon mas kin perak nitu noro TUHAN binai sut tungwatu nya ingonti.
4 Yo di isibut nya ingig itingou mem yo di isibut nya ingon kanti. Niris kep mun cig nitingou dile mem yo di iris mun igkei ighyet.
5 No di ba yo di yuhui mbum nya bikek nim kep Allah di pai tes yok. No di ningon kei kep hiter tut mun di buhun bibor di cut igkep yok nya mitug ndei hukum.
6 Andig-ndau nya inggei-nggwang tut ignyon bat nya noyam kin munggwom nya di inggei-nggwang tut icig bat-ipmem bat nya.
7 Yo di isingat nya iris mun ei tungwatu nya dip bi. Yo di ingon mbum nya ighyet bon ninyeng bi.
8 Bihi ikan bipia mitiei nibingot kep hiterti bindei ba, mindur pek kep ba, ikan bipia mitiei nibingot kep tungwatu nyati dima sindem mem biyai mun nyeng hagom.
9 Gino ajoi sut gima yo di hiter ihig isut bit na lene ma akos ser ide mun di igyai tunggwei sut na. Gino aket-ket nyen ide mun di igyai tunggwei sut na lene gima bindei ba, jiba nitok biyam.
10 Nisok kepti gom ngat bon ninyeng mem no di nintin kimbo. Nibui no di ningon mbum mbisratus gom bon ninyeng mem noni bi.
11 Hukum nimai micut kros igkep yo di isibut di ibindei ba, tungwatu nya iba nitok biyam.
12 No di um mindhe beruang niwek di nimien nya ipror leu noni ne buhun bi gino ibinai sut no di um no di ningon mbum di ta nibou ei nide midyai di yai ariwaceti a.
13 Gino aba ayai munti di kinei birop hiter niyai munti di kei ne bit bon acok niyai munti di kinei nya bingwig leu ade ig kan bi.
14 Nikinyon ei niliriem yamti rinok minyei di sindi diem ei hajung jou. Suar adat kep ser nidiemti dima nipou tirigi minyei biam sindem bigyo.
15 TUHAN ningon sibui sut yo di isindui sut ba, no di sibut ningwes ngun leu hukum kin yo di ikes hukum ei no di ningon ngun dip cem.
16 No di ningon mbum tri mitiei bingwig ei nipek ningon kiti mikui-kausi lewo nibou ngwakti kwes bi.
17 Yo di ingon ce yam bi nya ingon gom tut yam. Noro adig-ajoi nya impu yam tirigi mun di buhun cut igkep yok.
18 No di preu ei mem gima ya hon hiter de ningwam ne noni ningon mbum bibor ri.
19 No di ba noho rok sisar noyam kin no di bindei ba, tungwatu nya iba nitok biyam. No di ninsi bbed nggok tut gima ya um mun di buhun bibor di micut igkep noni.
20 Bit bon niris kep mun cig tug ndei ningat di kei kan bi. Mun di buhun bibor micut igkep no di nidweb nggram.
21 No di bon nimunggwom di ningkek ndok ningon buhun bibor. Bit bon munggwom di ningon mbum bibon nicig-nipmem nya ingon llei bibor kan bi.
22 Ningon di llei biborti bindei ba, inghuisi kwes noro ningon di buhun bibor bindei ba, inghuisi jet.
23 Nikei di ingon dwei nya isindui sut ba, tungwatu nya ingot kep yok leu api ide nikos tutti mbut ei nisren-srausi bi.
24 No di nintin kimbo ningon bisau hammi ningon kiti noro no di ningkek ndok ningon kanti ngwig ei mun nyeng hiti bi.
25 Munggwom di ningkek ndok bindei ba, nicig ningon buhun binipmem ningon ngguk tut niyai munti nya.
26 Gino akak tut no di ningon ngun mem gima go gau mun di yai tunggwei bi ne gini kei mem bi. Gino yo di ingon kwes kei nya itug ndei hukum drek dip mun di igyai bi nya ne gini cem kei mem bi.
27 No di ningon nddong niji nggan bi. Yo di ingon ki nya yoom ingon kan.
28 Bitut gima ne gino no di ningon mbum om ningon bikimut nuhui lene nindigsi nya mikan bipia nintin kimbo biningon ki cem.