16
1 Tungwatu dihyeisi dini ikos dat ingon kanti nya noro Allah kos tut mun nyeng hagom bit leu Nonti ningon kanti.2 Tungwatu nya ikan bipia igyai munti nya hagom kei noro TUHAN binai sut mun di jo ingonti nya.
3 Ambrap bit TUHAN tut angon kanti nya leu api Noni mibindei ba, hagom mingat ningat.
4 TUHAN niyai kepti nya hagom muug bipek nipekti. Yo di isibut nya yuug dor nipekti dino nisar ningwigsi.
5 TUHAN ningon sibui sut yo di illei-lau nya. Noni misindui sut ba, ingwes ngun leu hukum bi sren.
6 Allah mikos ser ade sisar gino angon gom tut Noni. Noni micuon igyaisi leu binhyepo mun di kinei bibor cut igkep yok bi.
7 Mpe dino ayai kepti nya bindei ba, TUHAN joi sut na lene Noni bindei ba, ade siceu nya ihig isut bit na.
8 Nitug ndei nimuhup poi mienti tug hon ningon di gom bon ninyeng dor njiriek nitug ndei nimuhup nindig tug hon ningon mangti.
9 Nyeni itin ei ingon kanti nya noro Allah kos tut puig di kei mem nye.
10 Allah pingok nibou ndig ningonti tut nikos tutti nya. Gima rino noni tunggwei sut nikos tutti nya bi.
11 TUHAN joi sut nitri-nipek kep mun cig nya igyai munti nya di iba ningon srenti biyai mun bitut mun di ibinai cem ibakilo cem.
12 Nibou ndig nya iba igyai ngat yo di isibut nya bi lewo ide ninyeng tak kepti jo ninghig tug hon ide limwa nya ide ningon srenti.
13 Nibou ndig joi sut nide limwa di pai mingat bak. Ningon ngakei no di ba ningon di sren bitri tut nihyet.
14 Nibou ndig nigga biborti noyam kin nikes hukum nimai ei tungwatu nya dip. Gima rino yo di ingon ki nya ibon mun di bindei ba, nibou ndig ningon jo nyahan.
15 Nibou ndig ningon kwesti bindei ba, nide limwa nya ingon jo nyahan ba, noyam kin biget di but mem bed di biang mpia ngei.
16 Ningon kiti kin nintin kimboti kei bibor kei dor njiriek niyai mas kin perak.
17 No di ningon kwes kei mbres nonti leu mun di kinei nya. Noni cuon niyaisi tug hon gino sok kep nonti tut niyai munti nya.
18 Ninggei-nggwangti bindei ba, nisarti ntun him. Nillei-lausi micut ninyeng jeisi.
19 Gino yo di inyeng tut mun hi bi nya iba ibou coi mem yam ne gima kei bibor dor njiriek gi icoi bit yo di illei-lau bikwas mun di ipos leu tungwatu nya tut yam.
20 Ma ayok ngon kep mun di guru nya ingginau na tut leu api abitug ndei ningat di kei. Ma aba angon com TUHAN apino angon nggei-hi-nggei.
21 Tungwatu nya ingat igbit no di ningon ki tug hon ningon di dor niti. Nihyet mmau di tibim ei nuhui him mitot tungwatu nya ingonti.
22 Ningon di ki rinok niyai munti di kei nibousi mem yo di ingon ki noro ide ningon mbumti mihwen bit yo di ingon mbum nya.
23 Yo di ingon ki nya ikan-kan nyen nipou tirigi yahap iji bigyo leu api mun di tibim ei yuhug him tot tungwatu nya ingonti.
24 Nihyet di nem-nnai dem kep ahwei lon ngei di nyop kei di bindei ba, ikei hanyen.
25 Tungwatu dihyeisi dini ikak puig di ikan bipia sren kei noro puig dima mbut ug ei minu nimai nya ide.
26 Ninggum di nos tungwatu nya bindei ba, ita ibou ei ide midyaiti. Yoni iba ninggum di bindei yok ba, ibibrim ingkek bigyai miai.
27 Yo di isibut nya itindei ser nituti tirigi ibon mun di kinei bak nindigsi nya. Ighyet di tigut yok cig yok nok hum di cig-cai.
28 Yo di isibut nya ittei mumpui ei yamti lene gima bindei ba, yo di ihig isut bit yam iba nitok biyam bu.
29 Yo di imbuk iris mun bak isut bat nya bibie tut yok ug ei mun di buhun biborti.
30 Ma atindei ser no di humpo bikek niyai lewo noni kos dat mun di kinei ei ningonti tu.
31 No di ningon sren nide njap ug ei ari bingwam mang bibor. Nibou nta di tiei ne topi mas di sieng-siau kei ri.
32 Noom ningonti kei bibor dor njiriek ninyeng jeisi. Gino aom kep angut kanti nya ne gima kei dor njiriek ninyeng tak kep minu ndigsi nya.
33 Tungwatu nya iko bibinggok tut leu binhyepo ibikan tut mun di mipek kep mem yok noro TUHAN mibuhup bit leu Nonti ningon kanti.