15
1 Nibuhupti di nem-nnai bindei ba, no di gga bibor ningon cut hanyen. Noro nibuhupti di singga miep hum kin no di gga nide nigga biborti.2 No di ningon ki nihyet bindei ba, yo di hiter ijoi sut nintin kimboti noro yo di ingon mbum nya ighyet nok bu tan.
3 Mun di pek kep bidem mpia ttou nsi hagom jo nibreisi bou TUHAN niyai him. Noni yok ngon kep niyai munti di kei kin gi kinei nya hagom.
4 Nihyet di nem-nnai biwin kep tungwatu nya ingonti noro nihyet di singga bindei ba, ingon nghen.
5 No di ningkek ndok ba ningha bak nicig nipingok noti noro no di ningon ki ningon llei sut nicig nisok kepti.
6 Ndigban mijo binghig ei no di ningon kwes kei nide ig noro yo di ingon tindur nya ide ndigban mipror bingwig ei mpe dino mun di buhun cut igkep yok.
7 Yo di ingon ki nya imbrap bibit leu ide nintin kimboti noro yo di ingkek ndok nya igimbrap nok gima kan bi.
8 TUHAN joi sut yo di ingon kwes kei nya ide nadi noro ningon mpo tut midut di yo di isibut nya ibon ei nimbar hum dokti nya.
9 TUHAN ningon mpo tut yo di yaham imbuk kep Noni igyai munti nya noro ningon ngakei yo di ibrim ingkek mem gima igyai igbit ningon kanti.
10 No di bon mun di mbuk mitug ndei hukum. No di kou sut nisok kep noti mitug ndei nimai.
11 TUHAN kan bidem tut mun di jo ei minu nimai nya ide bitut mun di pek kep ei sirima. Gi nok ne notou tungwagom miku ningon kanti nding leu TUHAN niyai him i?
12 Yo di illei-lau nya ikou sut nisok kep yoti. Yahara yo di ingon ki nya tut ide nipingokti bi.
13 Yo di ingon llei bibor yuhumpo noro ningon buhun biborti bindei ba, iimaisi hai.
14 Yo di ingon ki nya ibrim ingkek bibitug ndei nintin kimboti noro yo di ingon tindur nya ingon cut hon ide nintin kimbo bisi.
15 Yo di indwau nya yahanggwap mbilen tut mun di isuar nya noro yo di ingon kei nya ingon ku yonti tut mun nyeng hi bi.
16 Mbro nok gino ade ndigban gom-gom he lo, gino attin tut TUHAN lene gini kei bibor leu gima ade ndigban nindig bibor lo, angon bos-bos nyen tut.
17 Gi kei rino ayem simeng he bit yo di ingon kwes kin yam leu gima ayem mikwau bit yo di iba nitok biyam a.
18 Nigga haninyaisi bindei ba, niwaisi yamti ntun him noro noom ningonti bindei ba, ningon kwes kin yamti ntun him.
19 Mun di buhun micut igkep no di mbris bikwop njap ngwa hagom noro micut igkep no di ningon gom bi.
20 Munggwom di ningon ki bindei ba, nicig-nipmem nya ingon llei bibor noro munggwom di ningon mbum ningwes pri gau nicig nipmem nya.
21 Yo di ingkek ndok nya ingon llei sut ide ningon mbumti noro no di ningon ki ninda jo kep nide midyai di kwes kei nya.
22 Gino aba angon srip huk angon kanti nya bi ne angon kanti mipek kep bi. Gino nipingok kep ningonti cig nya imang bibor yo rinaha ne angon kanti mingat ningat di kei.
23 Nihyet di tibim ei nuhui him cut igbit nicunti mibindei ba, ingon llei bibor.
24 Yo di ingon ki nya ico kak puig di kui ndam niyaijo ba, imbres yo leu puig di juk ndam minu nimai nya ide.
25 TUHAN mibindei sar yo di illei-lau nya ide ig noro Noni miya srak ko hagau kibom nya ide dihyei ninda rom.
26 TUHAN ningon sibui sut yo di isibut ingon kanti di kinei nya noro joi yo di isingat ingon kanti di kei nya.
27 Gino aris mun ei tungwatu nyati leu binhyepo abipek mitiei ne gima mibindei ba, mun di buhun micut igkep ade ig bei nsi nya yahagom. Ma asindui sut ba, hi ngot kep na au. Leu api ade njap jei ei dihyeisi dini.
28 Yo di ingon kwes kei nya ikan-kan nyen nipou tirigi ibuhup ighyet bigyo noro yo di isibut nya iba ighyet di bindei ba, mun di buhun bibor srou yonti drek dip ibuhup haninyai.
29 TUHAN miap kep yo di ingon kwes kei nya ide nadi noro ba ningha bak yo di isibut nya ighyet.
30 Yo di yuhumpo ibindei ba, angon nggan. Nihyet di kei di itri tut bindei ba, tungwatu nya ingon nggan-triot.
31 Gino angig atingou mem nisok kep nati ne angon ki.
32 No di kou sut nipingok ningonti bimangkrei nonti niyaisi. No di joi sut nisok kep noti ne bikum ei ningon kiti.
33 Nikuk nye bak TUHANti ne nitriti mem mun di ipikor eisi hagom ri. Suar aba abou coi mem tungwatu nya bibie ug e leu api yoni minggei sut na.