14
1 Sop di ingon ki nya ibindei ba, ide ig bei nsi ingon kwes kin yam noro sop di ingkek ndok nya ibindei ba, ide ig bei nsi nya iba nitok biyam.2 No di ningon gom ttin tut TUHAN Allah binggei sut ninyeng noro no di ningon mang ningwes om Noni.
3 No di ningon mbum llei-lau sut nonti ba, nikibou bei mbrai noro no di ningon ki nihyet ya ser nonti.
4 Gino sapi nikre hi bi lene ningat hi mijo ei miaisi bi noro no di ba sapi nikre biwim dihyei mingat ningat mang bibor.
5 No di ningon gom di ngat mun bou niyai him mipai mingat tut noro no di iba ingon com bi ne ngat mun dima bou niyai him bi lo, pai-pai wai he.
6 Bit bon yo di illei-lau nya ingon ki kan bi noro krop kei mem yo di ingon ki nya ingon dorti tut mun di ipikor eisi.
7 Ma jihig jisut bit yo di ingon mbum nya au lewo ibon intin di kimbo mem gima ibipingok angonti bi.
8 No di ningon ki ningon dorti tut nisinati mem gima yai kep niyai munti nya noro no di ningon mbum ne nide ningon mbumti ris mun ei nonti dip.
9 Yo di ingkek ndok nya ikrau ingon tut gi igyai nikos ser sisarti bi. Noro yo di ingon kwes kei nya ibungwam mem gima igyai nikos ser sisarti.
10 Niyai ningon lleisi kin ningon buhunti jo ei tungwagom ningon bei lene bit bon yo di hiter ippiet gima kan bi.
11 No di ningon kwes kei de ig nddong kei niabiati no di ningon mbum de ig mitti binggun.
12 Puig di tungwatu nya ingat ba, ikan bigya puig dima ne pui di sren kei rin lo, puig dima ne pui di ug ei nimai nya ikieti ri.
13 Mpe hi nipa tut mun nyeng hi boom kep ningon buhunti bijo nding. Tirigi ningon keisi pren hanyen leu lene ningon buhunti jo nijoti biya luei nohoti bu.
14 Yo di isibut nya mibiang ide nisibutti nibuhunti noro yo di ingon kwes kei mitug ndei imuhup drek dip igyai munti di kei bibor.
15 No di ningon mbum ningon jo kep mun nyeng hagom di tibim ei tungwatu nya yuhui him noro yo di ingon ki nya ingon sok kep yonti tut igyai munti nya.
16 Yo di ingon ki nya itindei ser mun di kinei bimbres yonti leu noro yo di ingon mbum nya ibou buwei ba, iba ingon ko-ko wai.
17 Yo di ingon cun nya igyai ibou tut mun ugwai-gwai noro yo di ingon ki nya yoom ingona.
18 Yo di ingon tindur nya ibiang ide ningon mbumti nibuhunti noro yo di ingon ki nya ikum ei ide nintin kimboti.
19 Yo di isibut nya mikuk yok bak yo di ingon sren nya ba, yahara leu binhyepo ingondut yok.
20 Nuhui mbum nya ide ninttig-tta nya kin yo di hiter ingon mpo tut yok noro tungwatu nya imang bibor ihig isut bit no di nyeng.
21 Gino ajoi sut angon di nggei-hi-nggei lene ma angondut yo di yuhui mbum nya leu gino angwes om kep yok lene sisar ntun him.
22 Gino abiyai hamem mun di kei nya ne yo di hiter miba ingon com na binggei sut na cem. Noro gino abiyai hamem mun di kinei nya ne akrau tunggwei puigya.
23 Gino anda jo kep midyai nya lene amuhup mitau bina. Gino anghen ba, attei mumpui ei tungwatu nyati he lene ahui mbum.
24 Tungwatu nya inggei sut yo di ingon ki tut ide ningon kiti noro ikan bidem tut yo di ingon mbum nya tug hon ide ningon mbumti.
25 Gino no di ngat mun bou niyai him pai mingat tut ne noni micuon tungwatu nya igyaisi. Gino noni pai mingat bi ba, bicum ne noni bidri yok ug ei hukumti.
26 TUHAN nok tentara nibousi mem no di kuk no biNoni kin nide ig bei nsi nya ba, inang coi.
27 Nikuk nye bak TUHANti ne minyei bousi di biyam tut ningon nggei-hi-nggeisi rin ba, gima ne puig mem gima ibinyohou nyenti leu nimai cem ri.
28 Nibou ndig hi bon ninyeng di jei bit leu nide limwa nya imangti. Gino bon nide limwa nya hi bi lene noni sindem bi.
29 Yo di ingon ki nya igga haninyai bi noro yo di ingkek ndok nya yoom ingon kan bi.
30 Ningon di jo nyahan bindei ninghuisi kwes noro ningon kinei sut hiterti noyam kin ninggwen di bindei nimai.
31 No di ngondut nuhui mbum nya kuk no bak Allah noro no di hwen bit nuhui mbum nya nihyet tigut Allah di pai tes yok nya.
32 Yo di isibut igyai munti di kinei nya bindei ba, isar noro yo di ingon kwes kei nya igwam coi ide ningon srenti.
33 Ningon kiti jo binghig ei no di nintin kimbo nibou ngwakti noro ningon mbum nya igikan tut ningon kiti bi.
34 Ningon srenti kin ningon singatti kon mben inyeng bikei noro sisar bindei mben inyeng kinei.
35 Nibou ndig nya ijoi sut yo di ijoi bibor di igya kui yok nya noro ikes hukum ei yo di ibindei mbut ide midyai kan bi nya dip.