SRAT NIPINGOK TUNGWATU NYA INGONTI
Nipingok ningonti nya bon ninyeng
1
1 Gini ne Nibou Ndig Salomo nipingok tungwatuti nya ri. Noni ne Daud nimunggwom bininyeng tak kep mben Israel. 2 Nipingok tungwatuti nya dini yok mibindei ba, jikan igbit tut ningon kiti kin niyaijoti di singat kei kin ningon di dorti tut nisimbot kep biyamti di bon nimimun di jut. 3 Nipingok tungwatuti nya dini yok mipingok jingonti tut notou jiyai ningon kiti kin ningon kwes kin Allahti kin ningon srenti kin ningon gomti. 4 Nipingok tungwatuti nya dini yok mibindei ba, yo di kindi ingon bou nya igyai ningon kiti lene pinjoi pilei nya igyai ningon tekti leu binhyepo ikan-kan nyenti mahan nok no di mahan tu. 5 Tug hon nipingok tungwatuti nya dini yok mibindei ba, yo di ingon ki nya mikum ei ide ningon kiti lene bie tut yo di ipikor nya cem. 6 Tug hon nisinati dima lene ingon midorti tut nihyet nibiti nindati nya kin nisimbot kep biyam tut nimimun kin nihyet buhun di tibim ei yo di ingon ki nya yuhui him.Nipingok mem pinjoi pilei nya
7 Gino tungwatu nya ijoi sut ningon kiti di nijit lene ma ikuk yok bak TUHAN bittin tut Noni bibie ug e. Lewo yo di ingkek ndok nya irok ningon kiti ba, ikou sut gino hi ngginau yok.
8 Dimunggwom na e, ma apwoi acig-apmem nya ingona. 9 Lewo ide nipingok nati nya mibindei ba, angon singat kei lene gima tereu nok mun di abimau abou kin miep komti di andei.
10 Dimunggwom na e, gino nibon kep sisar cig nya idor pip na lene ma abit ighyet au. 11 Gino yuhum ansi bipai <<Akwei ba, ibisinggre mem gima itindei ser tungwa hi bihwen no di bon mun tunggwei hi bigyo! 12 Nok gino no dima bong kei gwam kei binggwen bi lo, jei bi lene noni minok no di um mun di buhun ri! 13 Akwei ba, ipos nide ndigban hagom bingwig leu noni binju hagom ei ide ig bimpung kei! 14 Akwei bit nye leu api yahagom mikwas mun di ipos leu no dima tut yam!>>
15 Dimunggwom na e, ma abicom yam bit yo dima au. Ma ambres nanti leu yok. 16 Gino bit bon yo dima ibon mun di kinei dima kikau kep ingon bi lene bit bon ingon jo nyahan cem kan bi. Itindei ser nituti mem gima ihwen tungwatu nya. 17 Gino ha di tungwatu nya inggok tou kep yok nggilun ser tu lene yo dima indin jala ser ha dima mikui-kausi. 18 Noro nibon kep sisar cig pima yok indin jala di mikat yonti bibindei ba, itug midut. 19 Ninggimang kep mun cig nya mitug midut drek dip igyai kepti di sibut dima.
Ningon kiti mbrap tereu nok tungwatu
20 Jimiap e, ningon kiti mbrap tereu nok tungwatu ba, nihyet tibim bidem simpak kin biyati ba, 21 tibim sindem ei dimbou pmem nya kin mpia ttou nsi di tungwatu nya induk yam eisi nya cem.
22 Bipai <<Je di jingon mbum e, mijisindui sut jingon mbumti kikau e? Ug ei mpe di tou leu api jiba nintin kimboti bikek ba, jikou sut ningon di dor niti bu bi i? 23 Ma jingig jitingou mem ditde nisok kep jeti. Midihit dingon kanti nya brei bije bidikwas ditde nintin kimboti ndrim hi tut je. 24 Dihig je ninno tu lo, jikou sut da bijingkek ndok tut dihyet. 25 Jiba jingha bak ditde nipingok jeti nya hagom bijikou sut gima disok kep je cem. 26 Gima rino tirigi mun di buhun cut igkep je ne midipa ndip je ba, tirigi jingon ttin bibor ne midiba dihyet bicig je. 27 Igbit ri. Tirigi ningon di buhun kin ninggwen cut igkep je dem kep nok hou di nimig ten bibor kin sigau di yem je ne midiba dihyet bicig je. 28 Mpe dima lene mijahara da noro midibuhup jihyet bi. Mijinggok ser da bidem minu noro mijittau kep da bi. 29 Jisem tut nintin kimboti bijikou sut gi jibit TUHAN nihyet ninno tu. 30 Jingkek ndok tut ditde nipingok jeti ba, jitingou nam ser ditde nisok kep jeti nya cem. 31 Gima rino mijibiang jiyai munti kin jingon kanti nya nibuhunti. 32 Yo di ingkek ndok nya mitug ndei nimai drek dip gi ikou sut da. Yo di ingon mbum cem mitug ndei nimai drek dip gi ingig itingou mem dihyet bi. 33 Noro tungwa tou rino bit dihyet migwam coi da apino ningon jo nyahan. Noni muum nittinti hi bi.>>