Ningat di kei di ntun ningon kiti him
2
1 Dimunggwom na e, ma apwoi ditde ningginausi ei angonti. Ma angon prion ser ditde nipingok angonti nya au. 2 Ma ayok ngon kep dihyet ba, angon dorti tut nisinati. 3 Igbit ri. Ma ata abou ei niyai ningon kiti lene ma ahara mem ningon di dor niti. 4 Ma anggok ser mun dima dem kep nok no di nggok ser mas lene ma aput ser mun dima dem kep nok no di put ser ndigban niku. 5 Tug hon nisinati dima lene angon midorti tut nittin tut TUHANti ba, ma ayai ningon di kan tut Noni. 6 TUHAN Nongkom kwas ningon kiti kin nintin kimboti kin ningon di dor niti tut tungwatu nya. 7 Noni mpu yo di ingon sren nya kin yo di ingon gom nya biya srak ko hagau yok. 8 Noni ya ser yo di iba ingon di gom bibon hiter biya srak ko hagau yo di ingon gom tut Noni cem.9 Dimunggwom na e, gino abit dihyet lene angon midor niti tut mun di igbit kin ningon di sren kin ningon di gom cem. Ayai munti di suar ayai kep nya mijo nibreisi mem na. 10 Mporo akum ei ade ningon kiti leu api ade nintin kimboti mibindei ba, angon llei bibor. 11 Ade ningon dor niti kin ningon binggok puigsi minyohou na, 12 bisrin ser na leu binhyepo abon mun tunggwei bi, miom na ei minu ting leu yo di ighyet kinei sut yam cem. 13 Yo dima ikou sut igyai munti di kei nya bikak puig nidinditi di mpung tut sisar ba, 14 igyai munti di sibut bindei ba, ingon llei bibor ba, 15 iris mun ei tungwatu nyati cem. Bit bon nyeni iba ingon com yok kan bi.
16 Dimunggwom na e, gino abit dihyet lene ma ayai nisindemti mem gima aom na leu sop nibou sibui di ba nihyet mmau bibrim na. 17 Sop dima ningon gom tut nijjep bi ba, ningon prion ser nide nipreu ei mem Allahti cem. 18 Gino akak puig ug ei nide ig ne gima noyam kin nikak puig ug ei nimai nya ikieti. No di ug ei nide ig son ndam minu nimai ide. 19 No di ug cem kep sop dima mikwei kak puig di bie ndam niyaijo hanyen bi sren. 20 Gima rino dimunggwom na e, ma ayai bram yo di ingon sren nya igyai kepti nya lene ayaijo bit leu Allah ningon kanti mem na. 21 Lewo yo di igyaijo bit leu Allah ningon kanti mem yok di ingon sren nya yongkom mibong kei migwam kei ei minu di TUHAN preu ei mem nye a. 22 Noro Allah mipos yo di imbuk nya kin nibon kep sisar cig nya leu minu dini dem kep nok no di hom mintu-minta leu njita kioi bicom hak ug.