Doia mpia-bbed him kin dihyeisi ibinggei sut TUHAN
148
1 Jinggei sut TUHAN! Jikwei ba, inggei sut TUHAN! Je di gwamti e, ma jinggei sut TUHAN! Je di jibong ei ginyo kug e, ma jinggei sut TUHAN!
2 Je di malaikati nya e, ma jahagom jinggei sut TUHAN! Je di tentara gwamti e, ma jahagom jinggei sut TUHAN!
3 Mpia njap kin bed mmun e, ma jinggei sut Noni! Ham mpia-bbed him di jimjit nya e, ma jinggei sut Noni!
4 Mpia-bbed him di jo anai e, ma anggei sut TUHAN. Minyei di jo nuhu kwei ei mpia-bbed himf e, ma anggei sut TUHAN.
5 Nna ba mun dima yok hagom inggei sut TUHAN lewo Noni pai tes mun nyeng hagom tug hon nicukti nya.
6 Hagom jo nijoti tug hon nimbrap tutti. Bit bon hi son leu nijoti kan bi.
7 Je di jibong ei dihyeisi dini e, ma jinggei sut TUHAN. Je di sroi ei muk jou kin muk ndigsi,
8 kin kigyei di srei kin biget es di mbras nok tig njep kin es di kingkrai yam kin bumbuhui kin hou di nimig ten bibor di bit TUHAN nicukti e, ma jinggei sut TUHAN.
9 Nungug tou kin mbigdip nya kin biei di ngat ningat nya kin bigbehei nya,
10 kin mindhe-ndhe di tungwatu nya ipijuk kan kin mindhe-ndhe di niten-pos nya kin mun di srei ei dihyeisi kin ha nya hagom e, ma jinggei sut TUHAN.
11 Je di nibou ndig nya kin jide limwa nya jahagom kin nibou di inyeng jei nya kin nibou nindigsi nya,
12 kin sop gwam nitta pilei nya kin pinai pilei nya kin andigpoi nya kin munggwom nya e, ma jinggei sut Noni.
13 Nna ba yoni yahagom inggei sut TUHAN! Lewo ninyeng jei dor njiriek ninyeng nindigsi nya hagom. Nide nikei-kau-keisi kieng kep mpia-bbed him kin dihyeisi dini.
14 Noni ribindei dino Nide limwa nya inok mben di isindem bibor leu binhyepo Nide limwa di ningon kieti nya minggei sut Noni.
Jikwei ba, inggei sut TUHAN!