Doia nibikon Allah Di Sindem Bibor ninyenga
147
1 Ma jinggei sut TUHAN! Ninggei sut TUHANti ne kei bibor kei ba, nipai doia nibinggei sut Noniti bindei ba, ingon kei bibor!2 TUHAN miwin kep minu ndig Yerusalem bibuwak yo di isima ei ingkiaisi nya hanyen kwei.
3 Noni bindei ba, yo di ingon cut bihigom leu su nya ibrim ingkek hanyen. Noni ngot kep ibokti nya.
4 Noni pai igbit ham mpia-bbed him nya nimangti biyai ninyeng bak hagom.
5 Ide TUHAN nindig bibor ba, mipbor ngat cem. Bit bon nyeni ingon dorti tut Nide ningon kiti di ug hon nohonti bi kan bi.
Yo di siceu nya ico kep yok
6 Noni kon yo di ide siceu nya ico kep yok bikiju hanyen noro dram yo di isibut nya binok tig di ndung-diem ug ei dihyeisi.
7 Ma jiba doia binggei sut TUHAN. Jiba nggong mbrei bikon ide Allah ninyenga.
8 Noni ne No di ba bumbuhui bijun mpia-bbed him rin ba, tin ei biget mem gima but kwei ei dihyeisi lene bindei ba, mintu-minta hei ei nungug tou nya.
9 Noni kwas njita tut mindhe-ndhe nimuhup tu nya kin miniwou nimien di dwas-dwas nyen cem.
10 TUHAN ngat ningwes ei kuda di sindem kin tentara di mimbri kui ingkek nyati bi.
11 Noro ngat ningwes ei yo di ingon gom tut Noni kin yo di iba ingon com Nide ningon ngakeisi di ug hon nohonti bi sren nya.
12 Minu ndig Yerusalem e, ma anggei sut TUHAN! Sion e, ma anggei sut Ade Allah!
13 Lewo Noni bindei ba, jide dimbou pmem nya hagom nddong kei binjei mun di kei bak ade timiei nya.
14 Noni nyohou ade minu niya kwas yamti leu binhyepo jibong kei jigwam kei kikau lene bindei ba, ade ig gudan mpung tut gandum nitu di kei bibor.
15 Noni sok nihyet kwei ei dihyeisi dini leu api dihyeisi dini yai igbit nisokti.
16 Noni bindei juk es nok binggum mbrei lene krau nggou di kingkrai yam bigimahap nok atriem ndung di igimahap.
17 Noni bindei cut biget es di mbras nok tig njep ba, bit bon hi di ya hek biget es dima kan bi.
18 Noni ba nicukti bibindei ba, biget es jet hanyen. Noni bindei ba, hou nimig kui leu api minyei pmot nya cem biam bram.
19 Noni tri tut Nide nisok kep yokti bak Nide limwa nya bisok tut nimbrap tutti kin niggai serti nya bak Nide limwa di dimig yok ei su nya.
20 Noni bibon ngkiai nya hi nok gima bi sren. Yo dima ikan tut Nide niggai serti nya bi.
Ma inggei sut TUHAN!