Doia nibikiek midut di ibon mem mmun
141
1 Doia Daud.TUHAN e, dahara Nani. Abipbur ba, ampu da! Angig atingou mem dihyet tirigi dingat nadi.
2 Ayai ditde nadi tereu nok biei nggrai di ui-gwang kei di dindig ei nimbar hum dokti kin dinda di disu tereu nok midut nindig mindhe titut kep humti mem mmun.
3 TUHAN e, aya ser duhui ba, anyohou duhui cem.
4 Ambres da ei minu ting leu yo di ingon pri tut nibon munti di kinei nya. Asindui sut ba, dibicom yam bit yo di ipigau ahyet ba, diyem njita bit yok ei ide pestati au.
5 Disindui sut gino no di ningon kwes ttem da ne ba ningon sren bisok kep da cem lewo gima noyam kin mini di ui-gwang kei mem da. Midirok no dima ei bi. Gino yo di isibut imbuk tut da lo, midingat nadi tindei yok kikau.
6 Tirigi siceu nya injei ide nibou nya ei pimbien behei ne yo dima mipai jit bipia mun di dipai nya igbit ri.
7 Yo dima igimahap injum nya ei jui ninghas him ba, dem kep nok tig di idram bindung-diem ei dihyeiti.
8 Noro ditde TUHAN Allah e, diba dingon com Na. Ma asindui sut bidimai au. Lewo digwam coi Nani.
9 Anyohou da leu bon di indin ser da kin liep di yo di isibut dima icom ser da cem.
10 Nnaba ibiam ide liep di yonti icom dima. Noro asindui sut ba, dikriau bon bidimbut kikau ba, dingwes ngun.