5
1 Mpe dima lene nabi cin di Hagai Zakharia nya di icig ninyeng Ido ikiju bimbrap tug hon TUHAN Allah Israel ninyeng bak limwa Yahudi nya di ibong ei hanjop Yehuda kin minu ndig Yerusalem. 2 Tirigi Zerubabel di Sealtiel nipmot kin Yesua di Yozadak nipmot imiap nabi cin isok kep yokti lene ikinyon ei midyai niwin TUHAN De Igti didiyam hanyen ei minu ndig Yerusalem. Leu api nabi cin dima impu yok tut.3 Noro Tatnai di nibou hanjop Efrat-Bei-Mpia-Nikimbasti kin Syetar-Boznai igya tut isut bat nya bikwei ei minu ndig Yerusalem haninyai ba, ihig ser limwa Yahudi nya <<Tou rino cuk je di jiwin Tuhan De Ig dini ba, jibibon nimbumbati di jo niti cem i?>> 4 Lene ihig ser yoke tut yo di impu yam di iwin Ig dima hanyen yahagom inyeng cem. 5 Noro Allah ngig niyai kep nibou Yahudi dima binyohou yok. Gima rino yo di igya kui nibou ndig Persia ikos tut mem gima igyai ibou tut yok bigyo bibou ipinak srat hi kin bu bak Darius ba, itug ndei nibuhup hanyenti nipou ug e. 6 Mun di ipai sut ug bak nibou ndig dima nibimbiti pai,
7 <<Nipinak srat dini ug ei Na Di Nibou Ndig Darius aho bei. Handei kon ba, Na Di Anyeng Jei abindei ba, ade ninyeng tak kep limwati nya jo nyahan!
8 Nimbot kep biNa Di Anyeng Jei leu binhyepo akan tut bipia nyeni nuug ei hanjop Yehuda biningat lo, iba tig ndig ngat biwin TUHAN Allah Di Ninyeng Jei Nide Ig ba, iba biei ner bikrau dring nya hagom cem. Igyai midyai dima mungkun kei ba, niwinti cem mbut sindem.
9 Nihig ser timiei dima ide nibou nya tut tou rino sindui sut yok biwin Tuhan De Ig dima ba, ibibon nimbumbati di jo niti nya hanyen cem i? 10 Nihig ser yok tut nibou di ibie tut yok tut midyai dima inyeng leu binhyepo nibakilak yok hanyen bak Na Di Anyeng Jei bibor ba, akan tut.
11 Noro ibuhup hanyen <Allah di ninyeng tak kep dihyeisi kin gwamti Nide awak nya rinyeni. Ba, niwin kep TUHAN De Ig po nibou ndig Israel di ninyeng jei pima ngot bitut nimbumbati nya di noni bibon cem ari bingwam mimbrek ngan bibor pini jug su hanyen. 12 Noro nyeni nidigup bat-nidigai bat nya ibindei ba, Allah Di Ninyeng Jei Bibor Ei Gwamti gga yok bibor. Gima rino kes yok ei nibou ndig mben Babel di ninyeng Nibou Ndig Nebukadnezar di ntun mben Kasdim him di sindem nindati ug a. Leu api nibou ndig dima ya kep Ig dima bindung-diem hak ba, kri nyeni nidigup bat-nidigai bat pima yok ug ei minu Babel. 13 Niabiati di Nibou Ndig Kores kui bigwam nok nibou ndig mem mben Babel ba, ninyeng tak kep nok nibou ndig mem nijam ari bingwam gom tu lene tri tut nihyet leu binhyepo nyeni nidigup bat-nidigai bat nya iwin TUHAN De Ig hanyen. 14 Mpe dima lene noni ngkwei TUHAN De Ig nimbumbati nya po jo ei ninsi nya di iba mas kin perak bibon di ibiyai midyai ei TUHAN De Ig pima hagom hanyen. Lene ngkwei TUHAN De Ig nimbumbati di Nebukadnezar cat leu minu ndig Yerusalem leu api bindei coi ei ig kwar ninsi nya ei minu Babel pima hanyen. Nibou Ndig Kores kes nimbumbati dima yok hagom bak Sesbazar po Kores kon nok nibou ei hanjop Yehuda pima. 15 Nibou Ndig Kores cuk noni biyai TUHAN De Ig nimbumbati dima yok ba, ngkwei sut hagom hanyen kwei ei TUHAN De Ig ei minu ndig Yerusalem lene biwin Ig dima hanyen ei nigkumti. 16 Leu api noni kwei ei minu ndig Yerusalem biprion tig nok cou pmem mem Ig dima. Leu nimbie him dima ba, kwei bipek ammani kep lene midyai dima mbut kikau. Noro giput bigyo.>
17 Gino Na Di Anyeng Jei ace tut lene nipai ningon kanti gom bina. Ma yo di igya kui nani igyok igyai kep srat nibohon ngot di jo keyam mem minu Babel ninyeng tak kepti ei kintrorti. Tug hon srat dima yok ne mijo nibreisi bipia Nibou Ndig Kores nicuk tungwatu nya mem gima iwin Tuhan De Ig ei minu ndig Yerusalem hanyenti dima jo nijoti yo. Nibet ningon mem Na Di Anyeng Jei ade nibuhupti kin akos tut munhyet diniti.>>