Nibigen ser niwin TUHAN De Igsi
4
1 Keret Yehuda kin Benyamin ide siceu nya imiap tut bipia yo po inok awak ei ingkiaisi nipou pima inghapti no inda jo kep TUHAN De Ig di iwin kep a. 2 Gima rino yuug ngat Zerubabel kin nibou insi de nya ba, ipai ingon kanti biyok <<Ma jisindui sut ba, nyeni cem niya bit je biwin TUHAN De Ig dima. Lewo nyeni cem nikuk nye bak Allah noyam kin jeni. Nibui mindhe-ndhe ba, nibikuk nye bak Noni habiei mpe di po Esar-Hadon di nibou ndig Mben Asyur buwak nye kwei bikes nye ei minu dini nimbie him pima tu.>>3 Noro Zerubabel Yesua nya kin nibou insi de nya pima ibuhup <<Nisuar jimpu nye tut midyai niwin ig mem nyende TUHAN Allahti bi. Miniwin Ig dima binyenti bit leu Kores di nibou ndig Persia nicuk nyeti.>>
4 Lene timiei di ibong mimbrek ngan ei minu dima ibindin limwa Yahudi bibindei ba, isindem mem midyai niwin TUHAN De Igsi bi. Iba tungwatu inghapti bicug kep limwa Yahudi leu binhyepo idigit tut ba ikes inda tut niwin ig dimati drek dip hak ug. 5 Lene siceu pima ingot kep nibou di inyeng jei nya ei Persia ninyeng tak kepti leu binhyepo inggek tut midyai di limwa Yahudi nya ikinyon eisi tu dima hak ug. Inggek tut midyai dima ei nijam di Nibou Ndig Kores ninyeng tak kep kikau ug bipek nijam di Nibou Ndig Darius ninyeng tak kepti.b
Nikes ninda tut niwin minu ndig Yerusalemti
6 Timiei minu ndig Yerusalem kin hanjop Yehuda ide siceu nya ipas srat nipai kep inghapti bak Nibou Ndig Ahasyweros tirigi sindi ninyeng tak kep minu Persia.
7 Mpe di gom bu ei nijam di Kaisar Artahsasta ninyeng tak kep minu Persia ne Bislam kin Mitredat kin Tabeel yoni igya tut isut bat nya bipas srat bak nibou ndig dima bu. Iba nihyet Aram bipas srat dima.c Gima rino mpe di ikwop srat dima bak nibou ndig lene suar hi luei nihyet di iba nihyet Aram bipas dima ei nihyet di nibou ndig ningon dor niti.
8-9 Srat nimeng gom kin bu tut minu ndig Yerusalem cem ug krau Kaisar Artahsasta nonti.
Rehum di nok nibou kin Simsai di nok sekertaris ei hanjop nsi dima rino ipas srat dima di icom bak nibou ndig a. Isut bat di igyai midyai nok nikei nya kin nibou di igya kui nibou ndig Persia nindigsi nya di itimieisi leu minu ndig Erekh kin Babel kin Susan ei minu Elam cem impu nibou cin dima tut srat dini. 10 Yo di yuusap yok tut srat dima hi kin bu rino ngkiai hiter bu di Asnapar Di Ninyeng Jei di buwak yok leu itimieisi kwei leu api kuk yok bibong timiei ei minu ndig Samaria kin minu ndig nindigsi nya di jo ei hanjop Efrat-Bei-Mpia-Nikimbasti.
11 Srat di ipas kep dima pai
<<Na Di Anyeng Jei e, srat dini leu nye di ninok ade awak di nibong ei Efrat-Bei-Mpia-Nikimbasti rin ba, nipinak bak na di Nibou Ndig Artahsasta. Acemo!
12 Nimbot kep biNa Di Anyeng Jei leu binhyepo akan tut bipia nogindini limwa Yahudi nya di imbut leu hanjop nsi nya ei anyeng tak kepti dima ikwei bibong timiei ei minu ndig Yerusalem hanyen bu tu. Inda jo kep niwin minu ndig di mpung tut yo di isibut di yaham imbuk kep Na Di Andigpoi hanyen cem. Ikinyon eisi ba, ikinding ngug tig hanyen tu. Ba, jei bi ne ikes inda tut midyai dima ri. 13 Gino iwin minu ndig dima bikiju ba, ikinding ngug tig di bikrop ttai hanyen cem biput lene timiei minu ndig dima mporo ikou sut gi igo belasten gau yoni. Gi nok apino mitiei di bikum ei ade mitiei nibousi micut sindam ri. 14 Na Di Anyeng Jei asingat tut nye nindig bibor. Gima rino nikou sut gima tungwatu nya ibindei ba, Anyeng Jeisi kin angon kanti pek kep bi a. Apino nipai nyeni ningon kanti, 15 bak Na Di Anyeng Jei leu binhyepo acuk timiei kintrorti leu binhyepo igyok igyai kep srat di adigup bat-adigai bat ide di jo keyam ei kintrorti nya ug e. Lewo tug hon srat dima nipas kepti ne angon midorti tut bipia ningat ne timiei minu ndig Yerusalem ne nihwen mun cig rin cem ibindei ba, nipou kwei bipek ammani kep yahak ide mun di kinei dima ei nibou ndig nya kin nibou hanjop nsi nyati leu binhyepo yo dima yaham imbuk kep no di ninyeng tak kep yok. Timiei di ibong ser minu ndig Yerusalem ingkek ndok ba, nggruk bibor mem gima hi bie tut yok a. Gima rino bitig dino ide siceu nya ibindei sar minu ndig dima ug a. 16 Gima rino nikan tut bipia gino timiei nya iwin minu ndig Yerusalem ba, ikinding ngug tig cem biput hanyen lene bit bon Na Di Anyeng Jei anyeng tak kep hanjop nsi Efrat-Bei-Mpia-Nikimbasti bu bi.>>
17 Lene nibou ndig buhup ide srat tug hon nipas kepti dini bipai,
<<Dipinak srat dini bak Rehum di nok nibou hanjop kin Samsai di sekertaris hanjop nsi bitut jisut bat di ibong ei Samaria kin jisut bat di ibong ei minu ndig hiter nya ei hanjop nsi Efrat-Bei-Mpia-Nikimbasti.d Jicemo!
18 Srat di jipinak kwei mem da pima ne hi luei ei nihyet di dimiap ba, ikwop hagom bida tu. 19 Leu api dicuk yok ba, igyok igyai kep srat di jo keyam ei kintrorti tu lo, jo nibreisi bipia habiei ei nimbie him kwei lene timiei minu ndig Yerusalem yaham imbuk kep nibou ndig nya di inyeng tak kep yok. Yo dima imang bibor isibut ba, isinsiou tungwatu nyati cem. 20 Nipou yo ne nibou ndig di isindem bibor nya inyeng tak kep minu ndig dima cem hanjop nsi Efrat-Bei-Mpia-Nikimbasti titut yam cem. Lene ibindei mbut belasten kin ndigban nibigo gau minu cem. 21 Gima rino ma jibindei hei nicukti leu binhyepo ikes inda tut midyai dima ba, iwin minu ndig dima hanyen au. Nok bibou dibindei hei srat nibicukti gi ter bu ug e. 22 Ma jibipbur ba, jitri tut dicuk jeti dini haninyai ser nhyepo ibindei ba, dinyeng tak kepti micut ei nikineisi bu bi!>>
23 Tirigi Rehum kin Samsai kin isut bat nibou nindigsi nya ikwop srat di Kaisar Artahsasta pas kwei dima rino yahagom yuug ei minu ndig Yerusalem lene ibidip huk limwa Yahudi nya leu binhyepo ikes inda tut midyai niwin minu ndig Yerusalemti.
Nikinyon ei niwin TUHAN De Igti hanyen bu
24 Limwa Yahudi ikes inda tut niwin TUHAN De Ig bijo hak tu ba, igiwin nut bu bi kikau ug bipek nijam di nibou ndig Darius ninyeng tak kep Persia mem ari bingwam can tu.