Nuum Nibou Ndig Kores de nicukti
6
1 Gima rino Nibou Ndig Darius bindei ba, yo di igya kui noni inggok ser Kores de nicukti di jo srig srat di noni nju bikui sur mpia ei nide kintrorti ei minu Babel. 2 Lene hi ngat srat nibohon kijumti gom di bijo ei minu ndig Ahmeta ei hanjop Media. Ikwop srat bokti dima di pai,3 <<Tirigi Nibou Ndig Kores sindi ninyeng tak kep limwa nya mem ari bingwam gom tu lene noni tri tut nicukti leu binhyepo tungwatu nya iwin TUHAN De Ig ei minu ndig Yerusalem hanyen leu binhyepo ibon midut nindig mindhe-ndhe bak TUHAN eisi. Suar Ig dima nijeisi meter nyatungwagom ba, muhwindacan ba, ninyanti cem meter nsi nyatungwagom ba, muhwindacan. 4 Suar iprion biei nipuig gom ei tig nipuig ningai dip lene bibikwop nok bitap ninsi dima titut yam. Midibindei hei mitiei mem ibiyai midyai dima leu mitiei nibousi ei nibou ndig de kintrorti. 5 Tut nimbumbati di iba mas kin perak bibon nya po Nibou Ndig Nebukadnezar pos leu TUHAN De Ig ei minu ndig Yerusalem pima bipwoi kwei ei minu Babel hanyen ne suar itug hagom bak timiei minu ndig Yerusalem leu binhyepo ikes hagom ei TUHAN De Ig bijo nijoti hanyen.>>
Darius cuk yok leu binhyepo inda jo kep niwin TUHAN De Ig biput kep
6 Lene Nibou Ndig Darius ba srat bibuhup Tatnai de srat bipai,
<<Srat dini mem na di Tatnai di nibou hanjop Efrat-Ei-Mpia-Nikimbasti kin Syetar-Boznai kin yo di igya kui je ei hanjop dima jahagom. Ma jibindin mben Yahudi au. 7 Ma jibigen ser yo di ingot TUHAN De Ig cem au. Ma jisindui sut ba, nibou hanjop Yehuda kin nibou mben Yahudi nya iwin Ig dima ei nigkumti hanyen. 8 Ditri tut nicukti dini bak je di disut bat jen leu binhyepo jimpu yok tut midyai dima. Suar jiba mitiei di jitug ndei tug hon belasten di mben Efrat-Ei-Mpia-Nikimbasti ibigo gau yok dima bigo tukan di ingot Ig dima imuhuba. Ma jibindin-ndin nyen yok tut imuhup au. 9 Ma jita jibou ei nikwas mun di imam nya ei minu ndig Yerusalem isuarti nya tut yok bikwop njap ngwa hagom bit leu nok yahara je tutti. Bitut sapi nikre nehen pap kin domba kin domba mien nya di indig kep hum ei nimbar hum dokti bak Allah di ninyeng jei ei gwamti cem gandum kin nsim kin ba anggur ningei kin mini zaitun hagom cem. 10 Suar jibit dicuk jeti dini leu binhyepo yo dima ibon midut di Allah di ninyeng jei ei gwamti joi sut nya ba, ingat nadi tindei Allah de mun di kei mem dani kin dipmot bat nya. 11 Tut yo di ibit ditde nicukti dini bi ne diba dihyet bikak nindigsi nya leu binhyepo ikus dihim gom leu no dima nide ig leu api yeheu niyenti binggwen lene ibidat ningut ba, ninggwenti kimbas eisi bittau nite hi. Suar jilet nide ig leu api jibindei ba, nigkumti dem kep nok jui mumpiang di mpiei bibor. 12 Diyok ngon mem Allah po dimig Yerusalem ei nok mpia gom ngat di tungwatu nya ikuk yok biNoni eisi pima miyai nimai bak bikwop nibou ndig kin keret dihyeisi dini nya di isrep tut dicuk jeti dini binggek tut TUHAN De Ig di iwin dima. Dani ne Darius rin ba, ditri tut ditde nicukti tu. Suar tungwatu nya yahagom iba ingon titut yam ce tut ba, ibit.>>
Mben Israel ipiga TUHAN De Ig ei
13 Lene Tatnai di nibou hanjop kin Syetar-Boznai kin yo di igya kui yok ei hanjop dima yahagom igyai hagom bit leu nok Darius nicuk yoti. 14 Midyai niwin TUHAN De Ig di nibou mben Yahudi ibindei mbut dima mbut sindem bibor tug hon Nabi Hagai kin Nabi Zakharia di iwin kep ide limwa nya ingonti. Limwa nya ikinding hagom biput haninyai bit leu nok Allah Israel kin nibou ndig Kores kin Darius kin Kaisar Artahsasta ei minu Persia cem ide nicuk yoti. 15 Tirigi Nibou Ndig Darius ninyeng tak kep mem ari bingwam muhwindagom tu ne TUHAN De Ig di iwin dima put ei njap gi niningai mem Bed Adar. 16 Lene mben Israel bitut imam nya kin keret Lewi nya kin yo di ingkwei hanyen kwei leu ingkiaisi yahagom iba ingon di llei bibor bipiga TUHAN De Ig a. 17 Njap ndig dima ne ibon midut ba, indig sapi nikre ningut sratus gom kin domba nikre ningut sratus can kin domba mien ningut sratus bitai kep hum ei nimbar hum dokti. Lene iba kambir ningut simnaibrimigcan bon midut nibiyai nikos ser sisarti nok gi dem mem mben Israel ide keret simnaibrimigcan. 18 Lene inyohou dimig imam kin mben Lewi nya ei mem midyai di igyai ei TUHAN De Igti bit leu nok srat Musa nipingok yokti nya.
Njap Ndig Paskah
19 Tirigi yo po ingkwei hanyen kwei leu ingkiaisi pima ibong itimieisi mem ari bingwam gom tu lene ibon pesta kep Njap Ndig Paskah ei njap gi nisimnaibrimigtai mem bed gi nigom. 20 Imam nya kin Lewi nya yahagom ibon midut di bindei ba, map kui yok bu bi leu binhyepo igyai kep ide midyai nya. Lewi nya ibui mindhe-ndhe mem Njap Ndig Paskah bidigo ninghui gau yo po ingkwei hanyen kwei leu ingkiaisi pima kin imam nya kin yonti cem. 21 Yo di ingkwei hanyen pima kin yo di imbres yonti leu ngkiai nya ide sisar ba, ibong ser hanjop Israel cem yahagom ikuk yok bak TUHAN di mben Israel ide Allah bigyem kep mikwau di indig kep hum ei nimbar hum dokti. 22 Ibon pesta kep Njap Ndig Roti Dwoi Bi cem kikau mem ari nitindur gom. Yahagom ingon llei bibor lewo TUHAN bindei ba, nibou ndig Mben Asyurf ngondut yok bahati tut yok cem tirigi iwin TUHAN De Ig mem mben Israel ide Allah.