Uzia di nok Nibou Ndig mem timiei Yehuda nya
(2Raj. 14:21-22, 15:1-7)
26
1-3 Tirigi Amazia de njap dem bimai leu su lene timiei Yehuda nya yahagom ikon nipmot Uzia kui bigwam nok nibou ndig biya luei nohoti bu tirigi nide njap ug ei ari bingwam simnaimuhwidip brimigtehigom. Nipmem ne Yekhoya di sop timiei minu ndig Yerusalem ri. Uzia ninyeng tak kep timiei Yehuda kikau mem nijam ari bingwam ningot muhwi ba, can ei Yerusalem. Noni rino kiju di hwen timiei minu ndig Elot bicut leu lene kinding minu ndig dima hanyen. 4 Uzia bon mun di igbit di biyai TUHAN ningon di kei noyam kin nicig cem. 5 Zakharia pingok kep ningonti tut Allah ningon kanti nya. Nijam di Zakharia niyaijo yo dima lene Uzia ba ningon di gom bikuk no bak TUHAN kikau. Apino TUHAN njei mun di kei bak noni.6 Uzia kon pran bit mben Filistin binggek ngug tig di bicuon minu ndig Gat kin Yabne kin Asdod. Leu api noni ngot nide minu ndig di ngug tig jo ser nya dideu Asdod kin minu ndig nindigsi nya ei minu Filistin. 7 Allah mpu noni bihwen mben Filistin kin Arab nya di ibong ei Gur-Baal kin mben Meunim yo dima yahagom bicut binoni. 8 Mben Amon igo belasten gau yonti bak Uzia. Uzia de nisindem biborti bikum eisi kikau ba, ninyeng tibim tut kikau ug ei minu Mesir cem.
9 Uzia ngot ig di bon ninggre di jo-jo yam dip anai mem gima ibiya ser minu ndig Yerusalem hi ei Dimbou Pmem Nuhuisi lene hi ei Dimbou Pmem Mbang Briep lene hi ei ngug tig nikropti mem gima ibiya ser minu ndig Yerusalem bingkiem. 10 Bitut ig di bon ninggre di jo-jo yam dip anai mem gima ibiya ser iggum ndigsi cem. Noni bon bak minyei ngot ei iggum ndigsi dima lewo nide mindhe-ndhe nimuhup tu nya mang bibor. Ba, mindhe-ndhe dima yok bihi no ya ke yam ei nungug tou nya lene bihi no ya ke yam ei mbang briep nite bei mpia nicutti. Lene Uzia ba limwa nya imang bibor biyai miai biei anggur nghousi ei nungug tou nya lene ba yok biyai miai nya bidem dihyei nnumti nya hagom lewo noni ngat ningwes ei midyai niyai miaiti.
11 Uzia de nimpung tentara nindig bibor di itin ei hak mem gima ikon pran cem yo rinaha. Ikwas tentara dini yok ba, igwam nimpung gom-gom. Ibou can di igya kui nibou ndig di inyeng sekertaris nya ipas kep nimpung dima yok imangti. Cin dima inyeng rino Yeiel kin Maaseya ba, Hananya ninyeng tak kep cin dima tut ide midyai dima. Hananya ne no di ya kui nibou ndig hi ri. 12-13 Tentara di ikon minggwen dima yok ibou sribu sratus ningai muhwindacan ba, sratus muhwi ide nibou di ibie tut yok nya ibou sribu can sratus muhwindagom. Mimbri kui yo di isindem bibor nya dini ingkek ba, isindem mem gima ikon pran cem. Yo dini rima yahati tut nibou ndig mem gima ibindei timek ide siceu di ikon pran bit yok nya. 14 Uzia yai micim kin mun di ibipukep siceu ide minggwen nya kin topi ngkimom nitu kin sinsun ngkimom nitu kin tibor kin hampiap kin tig kimor di iba bikumsikik biprindei hagom ba, gima hagom bahak tentara nide nya inda. 15 Timiei minu ndig Yerusalem di ingon ki tut nibon minggwen bou inda him nya ibon mun di bindei prindei tibor kin mun di bindei com tig ndig ngat cem. Mun di ibicom tibor kin tig ug ei ngug nisai dima ne bihi jo ei ig di bon ninggre di jo-jo yam dip anai ei ngug tig dip ba, bihi jo ei ngug tig nuhuisi cem. Uzia ninyeng di jei tibim bidem minu hagom ba, noni sindem bibor cem lewo Allah mpu noni bibor.
TUHAN ttem Uzia drek dip nillei-lau sut nontiti
16 Tirigi Nibou Ndig Uzia sindem bibor tu lene cut ei nillei-llau sut nontiti. Lene gima bindei timek ninyeng jei biborti cem. Noni tunggwei nide TUHAN Allah de nicukti tug hon gi coi ug ei TUHAN De Ig bindig biei nggrai di ui-gwang kei ei nimbar dima dip. 17 Noro Imam Azarya kin imam ibou ningot muhwindaningai bu di ingon nddong di mimbri kui ingkek nya icoi bram ba, 18 isrep tut niyai munti dima. Ipai bak <<Na Di Andigpoi Ndig Di Anyeng Jei e, dem tut gima andig biei nggrai di ui-gwang kei dima ei nimbar hum ndokti dima bak TUHAN bi. Midyai dima ne imam di intun Harun him ide midyai ri. Lewo Noni dimig yo dima pijum ei mem midyai dima tu. Suar Na Di Andigpoi aom na hak leu gumihyep di kwes dini! Na Di Andigpoi asrep tut TUHAN Allah tug hon ayai munti dima tu. Hon kep ammani kui lene Noni minjei mun di kei bak nani bu bi.>>
19 Mpe dima lene Uzia no ya niyati dideu nimbar di ndig biei nggrai di ui-gwang eisi ei TUHAN De Ig bikrau den di bindig biei nggrai eisi dima ei nindati. Tirigi ningon sibui sut imam dima yok nindig bibor rino ninggwen di buhun bibor di hwen ningkek dip gom kieng kros hak kep ningwak dip. 20 Azarya di ya tut imam nindigsi nya imian huk noni leu api yahagom idigit tut bibor. Gima rino ibidip huk noni leu binhyepo hei hak leu TUHAN De Ig. Leu api hei haninyai leu ninsi di kwes dima lewo TUHAN kes hukum ei noni dip tu.
21 Ninggwen di hwen Nibou Ndig Uzia dima kes leu noni bi ba, jo kep noni kikau bimai kep. Imbres noni bibong binongkom hak ei ig hiter lene isindui sut ba, noni coi ug ei TUHAN De Ig bu bi. Uzia kes ninda leu nide midyai cem leu api nipmot Yotam ninyeng tak kep binok Uzia nitom di ya kui noni.
22 Nipui mun tut Nibou Ndig Uzia ninyeng tak kepti nindigsi nya jo ei srat Nabi Yesaya di Amos nipmot pas kep tu. 23 Uzia mai lene itig ei dihyei di jo dideu nibou ndig nya ijui dip. Noro igitig ei mpia di nibou ndig nya ijui dip joti bi lewo ninggwen di buhun hwen ningkek dip. Lene nipmot Yotam kui bigwam nok nibou ndig biya luei nohoti bu.