Yotam di nok Nibou Ndig mem timiei Yehuda nya
(2Raj. 15:32-38)
27
1 Yotam kui bigwam nok nibou ndig ei mpe dino nide njap ug ei ari bingwam nyatungwagom ba, muhwi. Lene ninyeng tak kep mem nijam ari bingwam simnaimuhwidip brimigtehigom ei minu ndig Yerusalem. Nipmem ne Yerusa di Zadok nipmisop ri. 2 Yotam pwoi TUHAN ningon noyam kin nicig Uzia cem. Noro noni coi ug ei TUHAN De Ig bindig biei nggrai di ui-gwang kei eisi bi sren.k Mbro nok gima lo, nide limwa nya ibon kep sisar kikau.3 Yotam rino win Dimbou Pmem Nite Bei Mpia Nijjai ei TUHAN De Ig lene bindei ngkiem ngug tig minu ndig Yerusalem ei mpia di ijem Ofel. 4 Lene win minu ndig ngot di jo ei nungug him ei minu Yehuda kin tentara nibousi di igya coi nya kin ig di bon ninggre di jo-jo yam dip anai mem ibiya ser bidem bahamti nya cem. 5 Noni kon pran bit Nibou Ndig Amon lene bindei timek noni bitut nide tentara nya cem. Leu api bidip huk mben Amon leu binhyepo iba mitiei belasten bigo gau yonti bikwop ari bingwam. Iba mitiei belasten dima bigo gau yonti bikwop ari bingwam nitindur ningai. Ba, bikwop ari bingwam ningai di gwam yam dip dima iba perak kilo sribu ningai sratus bitai kin gandum nitu kin gandum barli hacem nibuhunti kilo juta gom ba, iba hagom bigo gau yonti. 6 Yotam nisindemti kum eisi kikau lewo ba ningon di gom bibit TUHAN Allah Nihyet. 7 Mun nindigsi di pek kep mem Yotam kin nikon pranti nya kin ninggok puigsi nya hagom jo ei srat Nibohon Nibou Ndig Mben Israel kin Nibou Ndig Mben Yehuda Nyati. 8 Yotam kui bigwam nok nibou ndig mpe dino nide njap ug ei ari bingwam nyatungwagom ba, muhwi. Ninyeng tak kep bidem ari bingwam simnaimuhwidip brimigtehigom ei minu ndig Yerusalem. 9 Lene noni mai ba, itig ei Daud De Minu Ndig. Leu api nipmot Ahas kui bigwam nok nibou ndig biya luei nohoti bu.