Amazia di nok Nibou Ndig mem timiei Yehuda nya
(2Raj. 14:2-6)
25
1 Amazia kui bigwam nok nibou ndig ei mpe di nide njap ug ei ari bingwam nyatungwagom ba, muhwi. Lene ninyeng tak kep ei minu ndig Yerusalem mem nijam ari bingwam ningot can ba, muhwindatai. Nipmem ne Yoadan di sop timiei minu ndig Yerusalem ri. 2 Amazia ba ningon di can bibon mun bipwoi TUHAN ningon haigtu bi. 3 Tirigi kui bigwam nok nibou ndig ba, tug ndei nisindemti tu rino noni kes hukum nimai ei nibou cin di igya kui nicig po igyai nimai bak pima dip. 4 Noro yai nimai bak nibou cin dima yok imunggwom bat nya bi. Lewo noni bit TUHAN De nicukti ei Srat Musati di pai <<Ma jiyai nimai bak andigpoi nya drek dip imunggwom bat nya ide mun di mbuk nya au. Lene ma jiyai nimai bak munggwom nya drek dip icig bat-ipmem bat nya ide mun di mbuk nya cem au. Suar tungwagom tug ndei hukum di bikui dip nimai drek dip nonti njem nide mun di mbuk nya he.>>Amazia kon pran bit mben Edom
(2Raj. 14:7)
5 Mpe dima lene Nibou Ndig Amazia nduk timiei Yehuda kin Benyamin nya yahagom bidem yam. Leu api cuk yok ba, idis yam dem igbit insi de nya gom-gom. Lene nibou tentara nimpung sribu gom kin nibou tentara nimpung sratus gom ibie tut ide nimpung tentara dima. Leu api noni nduk yo di ide njap ug ei ari bingwam nyatungwagom bikui di isindem mem gima ikon pran nya di ingon ki tut gima iba micim kin mun di ibipukep siceu ide minggwen nya bikon pran kwei. Yo dima imangti ibou sribu sratus ningai. 6 Ter leu gima lene ba perak kilo sribu ningai sratus bitai bingot kep tentara Israel ibou sribu sratus gom bu ba, bikum nide tentara nya. 7 Noro nabi gom kwei ngat nibou ndig dima bipai bak <<Ma aba tentara Israel dima yok bikon pran jit au. Lewo TUHAN gimpu keret mben Israel di ikwei leu Ninyeng Tak Kepti Ei Nite Bei Mpia Nijjai dima bi. 8 Mbro nok gino mimbri kui Na Di Andigpoi ade tentara nya di isindem lo, gino aba tentara Israel cem bikon pran lene Allah misundui sut ade siceu nya bibindei timek na. Lewo Allah Nongkom ngat he rino sindem mem gima bindei ba, joom kep jide siceu nya lene bindei ba, jicut bak siceu nya cem.>>
9 Lene Amazia hig ser noni <<Noro notou mem perak hagom di diyai biyok tu i?>>
Lene nabi dima buhup <<TUHAN sindem mem gima ngkwei perak nimangti gi dor tunggwei ade dima hanyen binani yo!>> 10 Gima rino Amazia kes tentara Israel di ngot kep yok tu pima bingkwei hanyen. Noro ingon sibui bibor drek dip.
11 Lene Amazia brim ningkek tut nide tentara nya ba, yuug ei Mbang Briep Nsim. Ikon pran bit yam ei sirima ba, igyai nimai bak mben Edom ide tentara ibou sribu simnai. 12 Lene ikat ibou sribu simnai bu ba, ikri yok ug ei nungug tig minu ndig Sela di bon pimbien bou anai. Leu api injei yo dima kikau ug ei pimbien behei mu ba, yahagom imai hak.
13 Tirigi Amazia kon pran bit tentara Edom pima lene tentara Israel ibou sribu simnai po Amazia cuk yok bingkwei hanyen lewo dem tut gima ibicom yam bit tentara timiei Yehuda nya di ikon pran bit mben Edom bi pima ihwen minu Yehuda poi ei minu ndig Samaria kin Bet-Horon ikieti ba, ikon pran bit yo di ibong ser minu ndig dima. Ba, igyai nimai bak ibou sribu ningai. Lene ibipos ndigban cem mang bibor bimbut tut hak.
14 Tirigi Amazia bindei timek mben Edom leu lene ttei kwar ngot di mben Edom ide nya bingkwei hanyen tut. Noni tas kwar ngot dima yok ei minu Yehuda. Leu api ndig biei nggrai di ui-gwang kei bak bibikuk no bak. 15 Nibon munti dima bindei ba, TUHAN gga Amazia bicuk nabi gom buug ngat noni. Nabi dima pai bak <<Nggon rino Na Di Andigpoi akuk na bak mben ngkiai ide kwar di isindem mem gima iteu ide limwa nya leu anda nsi di ingwes ngun ug bi dima i?>>
16 Lene Amazia mbrua kep nihyet bipai <<Akes ahyet hak. Leu gi bi ne miniyai nimai bina! Nita nani nok no di pingok kep nibou ndig ningonti bi sren.>>
Leu api nabi dima kes nihyet lo, bon nituti gom di pai bak <<Nogindini dikan tut bipia Allah kos tut mem gima bindei sar Na Di Andigpoi drek dip abon munti nya dima ba, arok dipingok nati cem dima.>>
Tentara timiei Yehuda nya ikon pran bit mben Israel
(2Raj. 14:8-20)
17 Lene Amazia di nok nibou ndig mem timiei Yehuda nya ya tut nisut bat di ipingok kep ningonti nya bigyok ingon gom mem gima ihwen bit limwa mben Israel. Lene sok nihyet bak Yoas di nibou ndig mben Israel di Yoahas nipmot kin Yehu nignyon cem ba, srep huk noni mem gima ikon pran bit yam. 18 Noro Nibou Ndig Yoas sok nibuhupti kwei bak bipai <<Mpe di gom lene tigau war ei nungug Libanon bidip huk buom ninjem gom bipai <Na di buom e, ma akes apmisop gwam nitta pilei bak dipmot bibuwak nok nitnem.> Noro jei bi lene mindhe bigbehei ningut gom kak puig dima bico kep tigau war dima nyen bimui hak. 19 Na di Amazia angon jei sut gi po abindei timek mben Edom pima. Noro handei kon ba, agwam hak ei ig bei. Nggon rino jiyok jingon gom mem munhyet di mibindei ba, nibuhunti micut igkep nanti kin limwa ade nya i?>>
20 Noro Amazia kou sut gimiap Yoas di nok nibou ndig mem mben Israel nibuhupti dima. Lewo Allah kos tut bipia suar Amazia cut bak siceu di ihwen bit nya drek dip gi po kuk no bak mben Edom ide kwar nya pima. 21 Gima rino Yoas njei sut nide tentara nya ug ei Bet-Semes bikon pran bit Amazia ei mpia dima. 22 Lene Yoas bindei timek tentara timiei Yehuda nya bibindei ba, intek gimahap. Tungwagom-gom nang bingkwei hanyen ug ei nide ig. 23 Yoas kat Amazia bikri noni ug ei minu ndig Yerusalem. Leu api binggek ngug tig di bikrop ttai minu dima ei Dimbou Pmem Efraim kikau ug bipek kin Dimbou Pmem Nuhuisi ba, nijeisi meter sratus can. 24 Noni ya kep mas kin perak kin ndigban di ngat ei TUHAN De Ig di Obed Edom ya ser nya kin ndigban ei nibou ndig de ig nya hagom bimbut tut. Yoas pos ndigban dima yok bikat ibou poi bimbut tut hak ug ei minu ndig Samaria bisima ei sirima.
25 Tirigi Yoas mai leu lene Amazia niyaijo ug ei ari bingwam simnaimuhwidip bu. 26-28 Habiei leu nimbie him di Nibou Ndig Amazia ba ninghim bak TUHAN lene tungwatu igyok ingon gom mem gima ihwen noni ei minu ndig Yerusalem. Gima rino Amazia kes no binang kikau ug ei minu ndig Lakhis noro yo di ihwen bit pima yuhuk bram kikau ug ei minu ndig dima bigyai nimai bak. Leu api iba kuda bikon ningut kwei ei minu ndig Yerusalem ba, itig ei jui nsi di ibet ei mem itig kep nibou ndig timiei Yehuda nya ingut eisi ei Daud De Minu Ndig. Nipui mun tut Nibou Ndig Amazia nindigsi nya leu nimbie him ug bipek ninyeng tak kepti ningwig honti hagom jo ei srat Nibohon Nibou Ndig Mben Yehuda kin Nibou Ndig Mben Israel Nyati.