Yoas di nok Nibou Ndig mem timiei Yehuda nya
(2Raj. 12:1-16)
24
1 Yoas kui bigwam nok nibou ndig mem timiei Yehuda nya ei mpe dino nide njap ug ei ari bingwam muhwindacan. Ninyeng tak kep mem nijam ari bingwam ningot bitai ei minu ndig Yerusalem. Nipmem rino Zibya di sop timiei minu ndig Bersyeba. 2 Ei nijam di Imam Yoyada niyaijo yo lene Yoas bon kep mun nyeng di bipwoi TUHAN ningon kikau. 3 Yoyada mbus sop ibou can bindo bak Yoas nok nitnem leu api Yoas yai nipmot bat kin nipmisop bat nya tug hon yok.4 Tirigi ninyeng tak kep ei ari bingwam poi leu su lene noni kos tut bipia mikinding TUHAN De Ig nikineisi nya hanyen. 5 Noni cuk imam kin Lewi nya ba, imbut bidem timiei di ibong ser minu ndig ngot di jo ei minu Yehuda hagom. Ba, ibrim mitiei keyam mem gima ibikinding Ig dima nikineisi nya bikwop ari bingwam kikau. Suar ibrim ingkek leu binhyepo imbut tut midyai dima haninyai noro Lewi nya ibinyen tut nicuk yokti dima. 6 Gima rino Yoas jem Imam Yoyada di nok mindor mem midyai dima bipai bak <<Apo Musa di TUHAN de awak cuk nide limwa nya yahagom leu binhyepo igo belasten mem gima ibahati tut TUHAN De Prak Meng bi e? Nggon rino nogindini acuk Lewi nya leu binhyepo ibrim belasten leu limwa di ibong ei minu Yehuda kin minu ndig Yerusalem didiyam bi i?>>
( 7 Yo di ibit Atalya di bon mun di kinei bibor pima inggek TUHAN De Ig nimbumbati leu su. Lene igyai ndigban di mben Israel ikes pijum hak ei mem TUHAN mang bibor ba, ibikuk yok bak Baal.)
8 Gima rino nibou ndig cuk Lewi nya leu binhyepo ibon brua mien gom ba, ikes ei dimbou pmem nuhui dip ei TUHAN De Ig. 9 Lene ipai bak timiei minu ndig Yerusalem kin timiei Yehuda nya yahagom bipia suar yahagom ikwas mitiei belasten tut TUHAN bit leu nok gi po Musa cuk yok pima. 10 Mun di itri tut bidem limwa nya dima biyai limwa nya kin ide nibou nya cem yahagom ingon kei sut leu api yahagom ibrim ingkek mem ibindei coi mitiei belasten dima ei brua pimati. 11 Bikwop njap-njap lene Lewi nya ikon brua dima bak no di ya kui nibou ndig ei kintrorti leu binhyepo yok niyai kep mitiei dima nimangti. Tirigi brua dima ut tut mitiei tu lene nibou ndig de sekertaris kin Imam Nibou Nindig nitom ibindei hei mitiei dima hagom leu brua nsi leu api ingkwei brua dima ug ei nijoti hanyen. Igyai nok gima bikwop njap-njap bingat lo, mitiei di limwa nya ikes keyam dima kum eisi nindig bibor.
12 Leu api Nibou Ndig Yoas kin Yoyada igyai mitiei dima ba, yuug kes bak mindor nya di ibie tut tukan nya di ikinding kep TUHAN De Ig nikineisi nya. Leu api mindor dima yok iba mitiei dima bigo tukan di iprion tig kan nya kin tukan di iprur biei kan nya kin tukan di iba ngkimom nitu bibon mun kan nya leu binhyepo yahagom inda jo kep midyai nya ba, igyai kikau. 13 Leu api inda jo kep TUHAN De Ig dima ba, ikinding kep nikineisi nya hagom. Yahagom igyai kep midyai di bindei Ig dima bingkiem-kiau ba, bikei-kau cem noyam kin gi nipou pima hanyen. 14 Tirigi midyai dima put leu su lene mindor nya ittei mas kin perak niken di jo nya ba, ikes bak nibou ndig kin Yoyada. Leu api iba mas kin perak dima bikinding nimbumbati di isuar nya ei TUHAN De Ig. Nimbumbati dima mem gima ibibon midut nikuk no bak Allah kin midut nindig mindhe-ndhe titut kin den mem biei nggrai di ui-gwang kei kin bokor mien nya hagom.
Timiei Yehuda nya igiyok ngon kep Imam Yoyada nibon munti di kei nya bi
Tirigi Imam Yoyada niyaisi jo yo lene ibon midut nibui mindhe-ndhe bindig ei nimbar hum dokti ei TUHAN De Ig. 15 Yoyada de njap ug ninna biwer andig-ndau bimai. Yoyada mai tirigi nide njap ug ei ari bingwam sratus gom ningot ningai. 16 Lene itig ei nibou ndig nya ijui dip ei Daud De Minu Ndig ba, ibiyok ngon kep niba nipap biyai midyaisi mem Allah kin TUHAN De Ig kin limwa mben Israel cem.
17 Tirigi Yoyada mai leu lene nibou timiei Yehuda nya yahak ide mun di kinei ei Nibou Ndig Yoasti bipingok ningonti apino noni ya hon Yoyada ningginau noti nya bu bi. 18 Gima bindei ba, limwa nya idem yam ei idigup bat-idigai bat nya ide TUHAN Allah De Ig ba, ikuk yok bak Noni eisi bu bi. Noro ikuk yok bak kwar nitu nya kin kwar Nisop Asyera. Ide sisar dima bindei ba, TUHAN gga timiei Yehuda kin timiei minu ndig Yerusalem nya. 19 TUHAN pinak nabi nya ndam yok bipingok ingonti leu binhyepo ingkwei hanyen ndam TUHAN ba, yoom yonti binok awak mem Noni. Noro limwa nya itingou nam ser ighyet. 20 Mpe dima lene Allah Ninnei mpung ei Zakharia di Imam Yoyada nipmot ningonti bisindem tut noni. Zakharia kiju biya ei limwa nya yoho bei leu api pai biyok <<TUHAN Allah pai <Nggon rino jigibit Ditde nicuk jeti bi dino jibitig jui mem jenti i? Jikes Dani ei su. Gima rino Dani cem midikes jeni ei.> >> 21-22 Noro limwa nya igyok ingon gom ba, itte tut Zakharia nihyet drek dip Allah ningon kanti dima. Nibou ndig Yoas cem tte tut noni noyam kin nide limwa nya. Noni yok ngon kep Yoyada di Zakharia nicig di ningon gom tut TUHAN kikau bimai kep cem bi. Gima rino cuk tungwatu nya ba, iba tig bihwen Zakharia ei mpia di jo bas hak di iba ngug tig bikrop ttai ei TUHAN De Ig nuhui bimai hak. Dideu Zakharia ninnei nikimbasti lene hara <<Handei kon ba, TUHAN ngat ayaisi dini bibindei ba, abiang ayai munti dini nibuhunti!>>
Yoas ninyeng tak kepti gi ningwigsi
23 Mpe di nijam di biang hou kin nijam di biang ngei kwas yamti ei ari bingwam dima lene tentara Siria icoi bihwen minu Yehuda bitut minu ndig Yerusalem cem. Lene ibiyai nimai bak nibou mem timiei Yehuda nya yahagom bipos ndigban cem mang bibor ba, yuug sut ei Damsyik. 24 Mben Siria ide tentara nya imang bi noro TUHAN sindui sut ba, ihwen tentara timiei Yehuda nya di imang bibor ba, icut biyok. Lewo timiei Yehuda nya iba igyai ngat idigup bat-idigai bat nya ide TUHAN Allah tu. TUHAN ba nisinati dima bikes hukum ei Nibou Ndig Yoas dip. 25 Mpe dima lene Yoas tug ndei nibok di buhun. Tirigi siceu ide tentara nya yuug leu su lene yo di igya kui Yoas ibou can igyok ingon gom ba, ihwen noni. Cin dima igyai nimai bak hak ei nibongti ei nide bilen dip. Gi igyai nimai bak dima ne nok nibiang niyai munti nibuhunti drek dip gi yai nimai bak Zakharia di Imam Yoyada nipmot pima ri. Lene itig Nibou Ndig Yoas ningut ei Daud De Minu Ndig noro igitig noni ei jui dip nibou ndig nya bi. ( 26 Yo di igyok ingon gom mem di ihwen dima rino Zabad di Simeat di sop mben Amon nipmot kin Yozabad di Simrit di sop mben Moab nipmot.) 27 Nipui mun tut Yoas nimunggwom bat nya kin nabi nya ide nimbot kepti tut mun di pek kep ei nidipti bu mem noni cem tut notou noni kinding TUHAN De Ig nikineisi nya hanyen hagom jo ei Srat Nibohon Nibou Ndig Nyati.
Lene Amazia di Yoas nipmot kui bigwam nok nibou ndig biya luei nohoti bu.