Nibou Ndig Salomo tin ei ig nimbumbati mem gima bingot TUHAN De Ig
(1Raj. 5:1-18)
2
1 Nibou Ndig Salomo kos tut mem gima ngot TUHAN De Ig ba, bingot nibou ndig de ig gom mem nonti cem. 2 Lene cuk nide limwa pinai nya ibou sribu ningot muhwindacan mem gima ipian mun nyeng dima yok mem gima bingot ig ba, ibou sribu ningot muhwindaningai mem gima iki tig nindig bikinding keyam ei nungug him. Lene ndo mindor nya ibou sribu ningai sratus muhwindagom mem gima igyok igyai kep midyai dima.3 Salomo sok nihyet bak Hiram di nok nibou ndig mem Tirus bipai bak <<Handei kon ba, abindei mbut nitri-nibipek munti bit da noyam kin gi po abindei mbut bit dicig Daud nipou pima. Nipou dima lene Na Di Andigpoi atri biei buom Libanon bak dicig ba, dicig bingot nide ig nibou ndig tu. 4 Nogindini diyok dingon mem gima dingot ig gom pijum mem gima dibikuk da bak ditde TUHAN Allah eisi ba, mem gima nibikon ninyeng cem. Midiya tut ditde limwa nya ba, nikuk nye bak Allah eisi. Lene nibindig biei nggrai di ui-gwang kei nya ba, niba roti di nidis ei TUHAN Noho bei bikuk nye bak Noni cem bikwop njap ngwa hagom. Minibon midut nindig mindhe titut kep humti bikwop njap tekti kin mmunti ba, bikwop Njap Nigwam Kep Ninghuisi kin njap nibon midut Bed Jep kin njap di bon ninyeng nindigsi nya cem bak TUHAN ei ig dimati leu binhyepo nibikuk nye bak nyende TUHAN Allah eisi. Lewo nyende TUHAN Allah cuk nye di mben Israel tut gima leu binhyepo nibindei mbut nibon midut dima yok bijo ninno bijo kikau. 5 Nyende Allah di nikuk nye bak ne Allah di nindig bibor dor njiriek mun di tungwatu nya ikuk yok bak. Gima rino TUHAN De Ig di dijoi sut dingot dima ne ig di nindig bibor. 6 Noro ningat ne tungwatu dihyeisi dini hagom hi di sindem mem gima ngot ig mem Allah bi. Lewo mpia-bbed him di nindig bibor dem mem Noni gwam niti kan bi. Gima rino TUHAN De Ig di dingot dini midem mem bi noro minok gumihyep mem gima nindig biei nggrai di ui-gwang kei eisi mem Allah he. 7 Gima rino ma Na Di Andigpoi apinak tungwagom di ningon ki tut gi kilis mun nyeng hi kan ba, kinding mas kin perak kin ngkimom-tembaga kin ngkimom nitu kan cem gi kinding minghas nidri kin nghei nta kin ningwoi hagom kan kwei binyeni. No dima miyai midyai bit tukan timiei Yehuda kin timiei Yerusalem di ingon ki tut nibon mun bou ninda him kan nya di dicig Daud dimig yok ei su nya. 8 Dikan tut bipia tukan di iwim kep biei ei ade minu nya yahagom ingon ki tut niwim bieisi tu. Gima rino Na Di Andigpoi e, ma apinak buom Libanon kin buom nyeng hiter bitut biei cendana leu Libanon kwei mem da. Leu api midicuk ditde tungwatu nya mem gima impu ade tukan nya tut midyai dima. 9 Tug hon nisinati dima ne yoni mimpu yam ba, mitin ei biei ut mang bibor mem dibingot TUHAN De Ig. Lewo Ig di dingot dima ne Ig di nindig bibor ba, kei-kau-kei cem. 10 Lene midipinak gandum ninyeng can di nibuhunti kilo juta can kin ba anggur ngei liter sribu sratus bitai kin mini zaitun cem liter sribu sratus bitai bak Na Di Andigpoi leu binhyepo akwas tut yok bigyem.>>
11 Lene Nibou Ndig Hiram pinak srat ba, buhup bak Nibou Ndig Salomo hanyen bipai <<TUHAN ningon ngakei Nide limwa nya. Gima rino Noni kon Na Di Andigpoi ba, anok ide nibou ndig. 12 Dinggei sut mben Israel ide TUHAN Allah di pai tes mpia-bbed him kin dihyeisi dini ninyenga! TUHAN yai munggwom pinai gom di ningon ki bibor bikan bidem tut nibon munti nya ba, kan bidem mun nyeng hagom cem bak Daud tu. Lene atin ei ba, abrim angkek mem gima angot ig njem gom mem TUHAN ba, abingot ig nibou ndig gom mem nanti cem. 13 Tug hon srat dini lene dipinak Harun di kan tut gi yai bikwop midyai nyeng hagom ba, ningon ki tut gi bon mun nyeng hi kan hwou biNa Di Andigpoi. 14 Nipmem ntun keret Dan him lene nicig ne timiei minu Tirus ri. Ningon ki bibor tut gi ba mas kin perak kin ngkimom-tembaga kin ngkimom nitu kin tig kin minghas di nidri kin ninghei nta kin ningwoi kin minghas linen di kei hagom bibon ndigban nya kan. Noni yai kep midyai nikilisti ba, bikilis bidem midyai nyeng hagom kan. Lene kilis bit leu nonti ningon kanti bi noro kilis igbit midyai nikilisti di ando bak noni nya hagom. Ando midyai bak ba, noni yai midyai dima bit Na di Andigpoi ade tungwatu di ibon kep mun bou inda him nya kin yo di igyai midyai mem acig di Nibou Ndig Daud nipou su. 15 Nibet ningon mem njita gandum nyeng can kin ba anggur ngei kin mini zaitun di Na di Andigpoi apreu kep da tut pima. 16 Nyeni miniwim buom leu nungug him ei Libanon bidem nimangti di Na Di Andigpoi asuar mem ig dima. Leu api miningot kin yam nok arreren ei muk ngwa dip leu binhyepo ade limwa nya ibri bigwam dip bitig minyei tut kikau ug ei minu ndig Yope. Leu api ipian leu Yope kikau ug ei minu ndig Yerusalem.>>
Salomo kinyon ei ningot TUHAN De Igti
(1Raj. 6:1-38)
17 Lene Nibou Ndig Salomo pas kep ngkiai nya di ibong timiei ei minu Israel yahagom inyeng noyam kin gi nipou yo nicig Nibou Ndig Daud pas pima cem. Yo dima imangti ibou sribu sratus gom ningot muhwi ningai ba, sratus muhwindagom. 18 Lene noni ndo midyai nipian ndigban mem ningot ig dimati bak ibou sribu ningot muhwindacan. Lene ndo midyai niki tig nindig bikinding keyam ei nungug him bak ibou sribu ningot muhwindaningai. Lene ndo midyai niyok niyai kep midyai dimati bak mindor ibou sribu ningai sratus muhwindagom.