SRAT NIBOHON MBEN ISRAEL GI NICAN
Salomo ngat nadi bahara mem ningon di ki
(1Raj. 3:1-15)
1
1 Salomo di Nibou Ndig Daud nipmot kui bigwam nok nibou ndig di sindem bibor ei ninyeng tak kep mben Israelti dima. Nide TUHAN Allah njei mun di kei bak lene bindei ba, Salomo ninyeng tak kepti sindem bibor.2 Nibou Ndig Salomo cuk nibou tentara nya ibou sribu gom kin nibou tentara nya ibou sratus gom kin nibou di inyeng jei ei nide ninyeng tak kepti dima kin nibou mem nimpung ig bei nsi mben Israel yahagom, 3 leu binhyepo injei bit noni ug ei mpia di ikuk yok bak Allah eisi ei Gibeon. Yahagom yuug ei sirigima lewo TUHAN De Prak Meng di Nide awak di Musa bon ei iggum ndigsi pima no jo ei mpia dima. ( 4 Noro TUHAN De Brua Gi Preu no jo ei prak mengti di Nibou Ndig Daud hok mem ei minu ndig Yerusalem. Brua dima jo ei sirima habiei leu mpe di po ikon kwei leu Kiryat-Yearim.) 5 Nimbar hum dok ngkimom-tembaga po Bezaleel di Uri nipmot ba, Hur nignyon bon cem no jo ei Gibeon ei TUHAN De Prak Meng nuhui him. Lene Nibou Ndig Salomo ya tut nide limwa nya yahagom ba, ikuk yok bak TUHAN ei sirima. 6 Nibou ndig bon midut nindig mindhe-ndhe ningut sribu gom titut kep humti ei nimbar hum dokti dima bikuk no bak TUHAN ei TUHAN De Prak Meng nuhui dip dima.
7 TUHAN ndo Nonti bak Salomo mem mmun dima bipai bak <<Salomo e, Handei kon ba, ahara Da tut mun di ajoi sut lene midiyai mun nyeng dima bina.>>
8 Lene Salomo buhup <<Allah e, abon mun di bindo binye bipia angon ngakei dicig Daud nindig bibor tu. Lene akon dani bidigwam nok nibou ndig bidiya luei nohoti cem tu. 9 TUHAN Allah e, nogindini ma ayai mun bipek kep mun di apreu sut bak dicig pima. Akon da bidikui bidigwam nok nibou ndig mem mben di nindig bibor di bit bon tungwatu nya ikwop imangti kan bi dini tu. 10 Gima rino ma ayai ningon di ki kin ningon di kan bidem tut mun nyeng hi di disuar mem gima dibibie tut yoni. Gi bi lene notou mem gima dipingok Ade limwa di nindig bibor dini ingonti i?>>
11 Lene Allah buhup <<Ahara Dati dima kei bibor. Ahara da tut gima anyeng tut ndigban ug kin anyeng di jei bibor ug kin ade siceu nya itug ndei nimai ug kin ade njap di jei ug cem hagom bi. Noro ahara Da tut ningon di ki kin ningon di binggok puig leu binhyepo abipingok Ditde limwa di diba dingon com nani tut nya. 12 Gima rino midiyai ningon di ki kin ningon di kan bidem tut mun nyeng hi binani. Ter leu gima lene midibindei ba, abongti kei ayemti kei ba, anyeng tut ndigban nindig bibor ba, dor tunggwei cem anyeng di jei mitibim bidem minu ba, dor tunggwei nibou ndig gi nipou nya kin gi niabiati nya cem yahagom inyeng.>>
Nibou Ndig Salomo de nisindemti kin ninyeng tut ndigbanti
(1Raj. 10:26-29)
13 Leu api Salomo kiju bimbut leu gumihyep di ikuk yok bak Allah eisi ei Gibeon di TUHAN Allah De Prak Meng jo ei pima bingkwei hanyen ug ei minu ndig Yerusalem. Hon kep gima lene bindei mbut ninyeng tak kep mben Israelti. 14 Salomo mbus bitin ei kroba pran ningat sribu gom sratus bitai kin kuda pran ningut sribu simnaibrimigcan cem mem nide tentara nya. Lene kuk nite hi ei minu ndig Yerusalem leu api kes nindigsi nya biyuug ba, igya bidem minu ndig nindigsi nya hagom. 15 Ei nijam di Salomo ninyeng tak kepti dima lene mas kin perak jo sinsiou ei minu ndig Yerusalem dem kep ndigban nitu kin tig di jo dihyei ninjek dip pimo yok. Lene buom Libanon mang bibor bidimbun kei ba, noyam kin biei ara nitu pimo yok cem. 16 Salomo ba nitri-nibipek mun cig nya bipek kuda kwei leu minu Mesir kin minu Kewe cem kwei ei nide minu. 17 Lene bipek kroba pran nya kwei leu minu Mesir tug hon nitri-nibipek mun cig pima cem. Leu api bindei hei gima hanyen bitri bu bak nibou ndig mben Het kin nibou ndig mben Siria nya cem ba, tri kuda ningut gom ei mitiei perak ningat sratus gom ningot muhwi. Lene tri kroba pran ningat gom ei mitiei perak sratus muhwindagom.