3
1 Nibou Ndig Salomo kos tut ei su bipia mingot TUHAN De Ig ei minu ndig Yerusalem ei Nungug Moria ninggram him ei mpia di Arauna di mben Yebus de ig gudan di co kep gandum kikep eisi. Mpe dima lene Nibou Ndig Salomo kinyon ei TUHAN De ig dimati bingot, 2 ei bed gi nican tirigi ninyeng tak kep buug ei ari bingwam bitai su. 3 Ig dima nijeisi dem meter ningot can ba, muhwindacan. Lene ninyanti dem meter muhwindatai. 4 Lene ninsi di ndam bisai ninyanti noyam kin ig ngat ninyanti ba, dem meter muhwindatai lene nanaisi dem meter ningot muhwi ba, bitai. Lene iba mas di pimbai kei bikrau ninsi dima nite ninsi nu kwei. 5 Lene iba buom nisra di kei bibor bitap ninsi ndig ba, iba mas di mahan kei bikrau kin buom nisra ei ninsi dima. Lene ikilis dui sraba ningwes kin lante ningwes ei mas di ibikrau buom nisra nidip a. 6 Lene Nibou Ndig bindei ba, tukan nya iba tig permata di dia-diau kei kin mas di igyai kwei leu minu Parwaim bimau ig dima ba, 7 iba mas dima bikrau dring kin bot kin nidihim di jo dimbou heisi nite behi nite behi nya kin biei di jo nai dimbou hui nya hagom bitut dimbou nimeng nya cem. Lene ikilis keruba ningwes ei dring dima yoti. 8 Ninsi gom di jo ig dima ninsi di ijem Ninsi Di Kwes-Kwau nijeisi dem meter muhwindatai. Lene ninyanti dem meter muhwindatai ba, ninyanti dem TUHAN De Ig dima ninyanti. Lene iba mas kilo sribu nyatungwagom bikrau dring ei Ninsi Di Kwes-Kwau dima hagom. 9 Lene iba mas nibuhunti gram sratus muhwi ningot muhwindacan bibon bibikwop paku hagom. Lene iba mas bikrau dring di bikin ninggre di jo-jo yam dip nya cem.10-13 Nibou ndig cuk nide tukan di igyai midyai dima yok biba ngkimom nitu bibon kerub nya ningat can cem. Lene iba mas bikrau kerub cin dima. Leu api ikes hacem simin yam ei Ninsi Di Kwes-Kwau. Ikiek hacem ba, ibirok dimbou hui. Bikwop kerub cin dima ibon inyehei can. Lene bikwop inyehei dima dem meter can biniken bikieng ba, niyenti nya ngget yam ei ninsi dima ninggimau yon. Inyehei gi nite hi bu nya kieng bingget dring bei anda com kin anda prak ba, nijeisi dem meter muhwindatai. Meter dima lene noyam kin ninsi dima ninyanti ri. 14 Lene iba minghas linen kin minghas hiter di bon nisieng nidri kin nisieng nghei nta kin nisieng ningwoi bibon ban mbrawin di ndok nimeng gom lene iba kerub ningwes bimau.
Cou dihim di jei bibor can di iba ngkimom-tembaga bibon
(1Raj. 7:15-22)
15 Lene nibou ndig bindei ba, ibon cou dihim can. Cou dihim cin dima nijeisi dem meter simnaimuhwidip biniken. Leu api itas hacem ei TUHAN De ig nihui dip dini ug. Bikwop cou dihim dima bon mun di yahak ei hacem niyenti ba, nanaisi dem meter can biniken. 16 Lene iba ngkimom-tembaga bibon lante cem bibon mitou delima ningat sratus gom cem ba, ibimau mun di yahak ei cou dihim hacem nidip hu kwei bikei-kau ug. 17 Lene itas cou dihim cin dima ei dimbou hui di ibicoi ug ei TUHAN De ig hammi nite anda prak kin nite anda com cem. Ijem gi jo ei nite di ndam mpia nibiho ninyeng <Yakhin.>b Lene ijem gi jo ei nite di ndam mpia nijjai ninyeng <Boas>.c