Daud nipingokti di bitut TUHAN De Ig
28
1 Daud nduk nibou nya yahagom kwei leu api idem yam ei minu ndig Yerusalem. Gima ne nibou keret nya kin nibou di inyohou Daud ninyeng tak kepti nimbutti nya kin nibou di inyeng tak kep insi de nya kin nibou di inyohou ndigban kin mindhe-ndhe nimuhup tu di nibou ndig de nya bitut imunggwom bat nya cem. Ipai ninda ndigsi tut bipia andigpoi nya di igyai midyai ei nibou ndig de ig kin nibou tentara nya kin yo di inyeng jei nya yahagom ba, idem yam ei minu ndig Yerusalem.2 Daud kiju biya yoho bei lene pai biyok <<Disut bat je di jintun mben gom him e, jingig jitingou mem dihyet dini! Dipi bidingot ig di kei bibor gom mem Brua Gi Preu cem mem ide TUHAN Allah su nimig bico niti mimbrek ngan cem tu. Dipi biditin ei nimbumbati hagom mem gima dibingot ig gom nok gumihyep mem gima ibikuk nye bak Noni eisi tu. 3 Noro TUHAN cuon ser gima dikinyon ei ig di dingotti lewo dani ne tungwagom di nok tentara rin ba, dikiber yo di imang bibor inggrom tu. 4 TUHAN Allah di mben Israel ikuk yok bak dimig dani kin ditde nintun him yamti di bram yam nya ei mem gima ninyeng tak kep Israel bijo ninno bijo kikau. TUHAN dimig keret Yehuda lene ndo dicig nide ig bei nsi nya leu nindigsi di intun keret Yehuda him. Lene Noni dimig dani leu dikindig bat nya ikieti ei dicig nide ig bei nsi dima. Lene bikon dani bidigwam nok nibou ndig leu binhyepo dinyeng tak kep mben Israel yahagom. 5 Noni yai dipmot bat nya imang bibor cem bida. Lene bidimig Salomo leu dipmot bat nindigsi nya ikieti leu binhyepo ninyeng tak kep mben Israel di nok Nide ninyeng tak kepti dima.
6 Lene TUHAN pai bida <Apmot Salomo mingot ig hi mem Da. Didimig noni binok dimunggwom tu. Lene Dani midinok nicigya. 7 Gino noni bit Ditde nikos tutti kin Ditde nicukti nya hagom nok mungkun kei noyam kin gi po bit kwei bipek njap di ammani kep lene midibindei ba, ninyeng tak kepti sindem bibor bijo ninno bijo kikau.> >>
8 Leu api Daud binut nihyet bu bipai <<Gima rino ditde limwa jen e, nogindini dibidip huk je bibor ei ide Allah kin ide TUHAN de limwa Israel jahagom di jidem yam ei dini joho bei leu binhyepo jahagom jibit ide TUHAN Allah nicuk nyeti nya hagom nok gi mungkun kei. Gino jiyai nok gima lene minu di kei dini minok jide minu ninda rom kikau ba, jide nintun him yamti di bram yam nya miba yokep minu dini sindam bijo ninno bijo kikau.>>
9 Leu api Daud pai bak Salomo <<Dipmot na e, ma akon Allah di acig kuk no bak nok ade Allah. Suar aba angon di gom bikuk nanti nok awak mem Noni cem apwoi ningon cem. Lewo Noni kan tut ikan-kan nyenti nya kin ingon priti nya cem hagom. Gino anggok tut Noni lene mporo angat Noni. Noro gino akes Noni ei ba, aba anghim bak lene Noni mirok nani ei bijo ninno bijo kikau. 10 Ma ayok ngon kep mungkun kei bipia TUHAN dimig nani pijum ei mem gima angot ig gom mem Noni. Gima rino nogindini ma ata abou eisi ba, angot kikau biput kep.>>
11 Daud pingok Salomo ningonti nok gima leu api bikes ningon kanti di tin ei bikan-kan nyen tut TUHAN De Ig dima ngot kin ig gudan nya kin ninsi nya hagom bitut Ninsi Di Kwes-Kwau di nok mpia mem gima ibiyai gi teu leu sisar eisi hagom bak Salomo. 12 Daud kes ningon kanti di tin ei bikan-kan nye tut di bitut mpia di jo bas hak di iba ngug tig bikrop ttai nya kin ninsi di jo ttai nya cem tut ig gudan mem mun nyeng di ikwas mem nibon midut ei TUHAN De Ig hagom bitut ig gudan di mem mun di nindigsi di ikwas tut TUHAN dima igyok keyam eisi nya cem bak. 13 Noni kes ningon kanti di tin ei bikan-kan nyen tut di bitut nimpung imam nya kin keret Lewi nya cem di bitut midyai dima suar igyai nok ide midyai dima igyai kikep ei TUHAN De Ig cem tut ninyohou nimbumbati nibon midut nya cem bak noni. 14-16 Lene noni ndo nisinati tut nibon mas kin perakti cem bak mem gima ibibon nimbumbati nya nok mini njeng nya nika cem nidihim cem, meja di iba perak bibon nya cem meja mas di ikes roti tin ei dip mem TUHAN eisi nya hagom cem bak. 17-18 Lene bipai nisinati tut mas di pimbai nimangti dima ibibon hot nggram nya kin den nya kin ampou mien nya bitut perak kin mas nimangti dima ibibon den nya cem, bitut mas di pimbai kei dima ibibon nimbar hum ndok mem gima indig biei nggrai di ui-gwang kei eisi cem mem gima ibibon kroba mem kerub di ibon inyehei di kieng kep TUHAN De Brua Gi Preu nidip nya hagom cem. 19 Leu api Nibou Ndig Daud pai <<Mun nyeng dima yok hagom ne dingon kanti di ditin ei bidikan-kan nyen tut rin ba, dipas kep hagom bit leu TUHAN Nonti nipingok dati mem gima dibindei mbut.>>
20 Leu api Nibou Ndig Daud pai bu bak nipmot Salomo <<Suar aba angon ngkiem bibingwam kep midyai dima. Akinyon eisi lene ma adigit tut mun nyeng hi au. TUHAN Allah di dikuk da bak mimpu na. Noni mikes nani ei bi sren. Noni minggre kin nani tut midyai ningot TUHAN De Igsi dima kikau biput kep. 21 Imam nya kin yo di intun Lewi him ikwas midyai di igyai ei TUHAN De Ig tut yam tu. Yo di ingon ki tut ide midyai di igyai kep igkei nya miba ingon di nggan bimpu na. Nok gima cem nibou nya kin limwa nya mibit acuk yokti nya.>>