Munkwas di injei bak Allah mem gima ibingot TUHAN De Ig
29
1 Leu api Nibou Ndig Daud pai bak yo di idem yam ei dima yahagom <<Allah dimig Salomo leu dipmot bat nya yahagom ikieti ei nok no di mingot TUHAN De Ig. Noro noni pilei yo ba, ba ningon bou biyai midyai hi nok gima bikan bigyo. Lene midyai dini nindig ba, buhun bibor cem. Nok gima cem ig di ingot dima ne nibou ndig de ig di mem tungwatu nya bi. Noro ig di mem TUHAN Allah. 2 Ditin ei mun di jibingot ig dima bitut nimbumbati dima jiyok ei ig bei hagom bit leu ditde nisindemti tu. Ditin ei mas kin perak kin ngkimom-tembaga kin tig permata nya kin tig di bon nisieng-siausi hi gom hi gom di mem mimau nya kin tig nillikti pualam di ngkiem bibor kei mang bibor bu cem mem tu. 3 Dingon ngakei ditde TUHAN Allah De Ig. Gima bindei ba, dikwas mas kin perak leu ditde ndigban di dinyeng tut nya tut ig dima. Nimangti di dikwas tut nya ne, 4-5 mas di kei bibor kilo sribu sratus gom binjiriek kin perak di pimbai kei kilo sribu sratus can ningot bitai binjiriek. Dikwas gima yok hagom mem gima ibimau dring ei TUHAN De Ig cem mem nimbumbati di tukan di ingon ki nya ibikinding nya. Nogindini tou bu rima miba ningon di kei bikwas ndigban tut TUHAN bu i?>>6 Lene nibou insi de nya kin nibou keret nya kin nibou tentara nya kin yo di inyohou nibou ndig de ndigban nya yahagom ipai bipia yoni cem ijoi sut ikwas mun nyeng hi tut ig di ingot dima. 7 Leu api yoni cem ikwas mun nyeng hi tut gima ibingot TUHAN De Ig ba, nimangti ug ei mas kilo sribu sratus gom ningot muhwindacan binjiriek kin perak kilo sribu sratus ningai ningot bitai binjiriek kin ngkimom-tembaga ug ei dideu kilo sribu sratus muhwindagom ningot can kin ngkimom nitu kilo juta ningai ba, sribu sratus bitai binjiriek. 8 Yo di ikrau tig permata nya cem ikwas hi tut ba, ikes bak Yehiel mem gima bindei coi ei mpia gom ei TUHAN De Ig di igyok kikep eisi. (Yehiel ne keret Lewi gom di ntun Gerson ninsi de nya him ri.) 9 Limwa nya ikwas mun mikuisi tut TUHAN lene hi bidip huk yok bi. Apino ingon nggei-hi-nggei lewo ikwas mun nyeng mang bibor tu. Nibou Ndig Daud cem ningon nggei-hi-nggei.
Daud kon Allah ninyenga
10 Mpe dima lene Nibou Ndig Daud kon TUHAN ninyeng ei yo di imang bibor dima yoho bei bipai <<TUHAN Allah di nyeni nidigai Yakub kuk no bak e, dinggei sut anyeng bijo ninno bijo kikau. 11 Nani ne Andigpoi di kei-kau-kei ba, sindem bibor cem ri. Anyeng di jei om kep ninyeng hagom ba, ayai kepti nya hagom nindig bibor cem. Anyeng tut mun nyeng hagom di jo mpia-bbed him kin dihyeisi dini. Nani ne nibou ndig di ninyeng jei bibor ba, anyeng tak kep nye di tungwatu dihyeisi dini nahagom cem. 12 Mun di tungwatu nya inyeng tut nya kin ide mun di imati nya kin igyemti nya hagom kwei leu Nani. Anyeng tak kep mun nyeng hagom tug hon Ade nisindemti kin anyeng di jeisi cem. Ade nisindemti dem mem gima abindei ba, tungwa hi ninyeng jei ba, sindem bibor cem. 13 Nyende Allah e, nipai sigyo nindig bibor biNani binikon anyeng di jei bibor cem.
14 Ningat ne diya tut ditde limwa dini yok noro bit bon nikwas mun nyeng hi tut Nani kan bi. Lewo Nani rino akwas mun nyeng hagom tut nye. Mun dima nikwas tut Nani ne hagom Ade cem. 15 TUHAN e, akan tut bipia nidat nidigup bat-nidigai bat nyati lene nimbut kak puig dihyeisi dini noyam kin yo di sindi ikwei ei minu dini ba, ninok ngkiai nya cem. Nyeni niyaijo ei dihyeisi dini noyam kin mun ningwes hi di pren hanyen hak. Bit bon ningwes ngun leu nimai kan bi. 16 Nyende TUHAN Allah e, nidimig ndigban di bon ninyeng dini keyam ei mpia dini mem gima nibingot ig gom mem Nani ba, nibikon anyeng di dia-diau cem. Noro anyeng tut mun dima yok hagom lo, akwas hagom tut nye nipou su. 17 Dikan tut bipia abingon tungwagom-gom ningonti lene angon kei sut yo di ingon sren nya. Diba dingon di sren kin dingon di gom bikwas mun dima yok hagom tut Na. Lene dingat bou diyai him bipia Ade limwa nya di idem yam ei mpia dini iba ingon di kei bittei mun di ikwas tut Nani tu. 18 TUHAN Allah di didigup bat-didigai bat di Abraham kin Ishak kin Yakub yoni ikuk yok bak e, ma anyohou Ade limwa nya leu binhyepo ingon ngakei Nani kikau noyam kin ide ningon ngakei Nati mem njap di ammani. Ampu yok leu binhyepo ingon gom tut Nani bijo ninno bijo kikau. 19 Abindei ba, dipmot Salomo miba ningon di joi bibor bita nibou ei midyai diniti bibit Ade nicukti nya hagom leu binhyepo ba nimbumbati di ditin ei su nya bingot Ig nibikuk no bak Nani eisi.>>
20 Daud ngat nadi nok gima leu lene cuk yo di imang bibor di idem yam ei dima <<Ma jikon jide TUHAN Allah ninyeng o!>> Leu api yahagom ikon TUHAN Allah di idigup bat-idigai bat nya ikuk yok bak ninyeng a. Lene yahagom iba ingwak bikik dihyei mem gima ibou bicut bak TUHAN kin ide nibou ndig.
21 Njap di hyep bu ne ibon midut nindig mindhe-ndhe titut kep humti bidimig ei mem TUHAN leu api ikwas mikwau dima tut limwa nya yahagom. Ter leu gima lene ibui sapi nikre ningut sribu gom kin domba nikre ningut sribu gom kin domba nehen pap ningut sribu gom ba, indig titut ei nimbar hum dokti. Lene ikwas ba anggur ngei pijum ei mem nibon midut nindig mindhe-ndhe titut kep humti ei nimbar hum dokti dima. 22 Njap dima ne yahagom iba ingon di nggei-hi-nggei biyem njita bidut ndia ngei cem ei TUHAN Noho bei.
Mben Israel ikon ighyet nimbican bu tut Salomo nok nibou ndig. Ikon Salomo nok ide nibou ndig lene ikon Zadok nok ide imam tug hon TUHAN ninyeng. 23 Leu api Salomo kui bigwam banggo mbrei nibou ndig di TUHAN Nonti kos tut ei mem tu dima dip. Kui bigwam nok nibou ndig biya luei nicig Daud nohoti. Noni ne nibou ndig di ningat di kei ntun him ba, mben Israel yahagom ibit nihyet cem ri. 24 Nibou nindigsi di igya kui noni kin nibou tentara nya bitut Daud nipmot bat nindigsi nya cem yahagom ice tut bipia ingon gom tut Salomo di ninyeng tak kep yok nok nibou ndig. 25 TUHAN bindei ba, limwa nya yahagom inggap leu Nibou Ndig Salomo. Lene bikon Salomo binok nibou ndig di ninyeng jei dor tunggwei nibou ndig nindigsi di inyeng tak kep mben Israel yahagom. Ba, hi di noyam kin noni bi.
Nirop ninda ndigsi tut Daud ninyeng tak kepti
26 Daud di Isai nipmot ninyeng tak kep mben Israel titut yam, 27 kikau mem nijam ari bingwam ningot bitai. Ninyeng tak kep limwa nya ei Hebron mem nijam ari bingwam muhwindacan lene ei minu ndig Yerusalem mem nijam ari bingwam ningot ningai ba, ningai. 28 Noni nyeng bibor ba, yahagom inggei sut noni cem leu api noni mai ei mpe di wer andig-ndau su. Nipmot Salomo kui bigwam nok nibou ndig biya luei nohoti. 29 Nipas kepti tut Nibou Ndig Daud niyai munti nya leu nimbie him kikau ug bipek ningwigsi kep hagom jo ei srat nya di Nabi Samuel kin Nabi Natan kin Nabi Gad ipas ei su. 30 Srat dima pui sut Daud nibie tut limwa nyati kin ninyeng tak kepti kin mun nyeng hagom di pek kep mem noni cem pek kep mem mben Israel cem pek kep mem nibou ngkiai inyeng tak kepti di jo ttai minu Israel hagom cem.