Yo di igya ser TUHAN De Ig
26
1 Gini ne midyai di indo bak keret Lewi di igya ser TUHAN De Ig ri. Leu Korah ninsi de nya ne indo Meselemya di Kore nipmot di nggre kin Ebyasaf de ig bei nsi nya. 2-3 Noni yai nipmot bat nya ibou muhwindacan ba, inyeng di bibit leu njap di ipmem srek tut yokti rinok gini ba, inyeng rino Zakharia kin Yediael kin Zebaja kin Yatniel, kin Elam kin Yohanan kin Elyoenai.4-5 Gi bram bu lene indo Obed-Edom. TUHAN njei mun di kei bak noni tirigi yai nipmot bat nya ibou muhwindaningai bak noni. Inyeng di bibit leu njap di ipmem srek tut yokti rinok gini ba, inyeng rino Semaya kin Yozabad kin Yoah kin Sakhar kin Nataneel kin Amiel kin Isakhar kin Peuletai.
6-7 Obed-Edom nipmot mighumbou ninyeng Semaya ba, Semaya yai nipmot bat nya ibou muhwindagom ba, inyeng rino Otni kin Refael kin Obed kin Elzabad kin Elihu kin Semakhya. Pinai dini yok yahagom inyeng jei ei yonti insi de nya lewo yoni ne pinjoi di mimbri kui ingkek nya ri. Ningat-ngat hak rino Elihu kin Semakhya.
8 Obed-Edom ninsi de nya ikes ide pinai di mimbri kui ingkek nya ibou ningot muhwindagom ba, can mem midyai niya ser TUHAN De Ig dima.
9 Meselemya ninsi de nya cem ikes yo di mimbri kui ingkek nya ibou simnaimuhwidip brimigtehiningai.
10-11 Merari ninsi de nya indo Hosa mem midyai dima. Hosa yai nipmot bat nya ibou bitai di inyeng rino Simri (Noni ne munggwom mighumbou rin bi noro nicig kon binok nibou mem yoni), kin Hilkia kin Tebalya kin Zakharia. Yahagom sok yam imangti ibou simnaibrimigningai di igya ser TUHAN De Ig dima inggre kin Hosa nide ig bei nsi nya.
12 Ikwas yo di igya ser TUHAN De Ig ei nimpung poi ba, iba nimpung dima bikwop insi de nya. Indo midyai ei TUHAN De Ig biyok noyam kin gi indo bak keret Lewi nindigsi nya cem. 13 Bikwop insi de nya gi nindig cem gi nimien cem ikus bit leu binhyepo ibikan tut dimbou pmem dima igya ser nya. 14 Selemya tug ndei midyai niya ser dimbou pmem di jo bei mpia nipriti. Nipmot Zakharia di nipingok kepti nya hagom kei tug ndei midyai niya ser dimbou pmem di jo bei mpia nijjai. 15 Obed-Edom tug ndei midyai niya ser dimbou pmem di jo bei mpia nibiho. Lene nimunggwom bat nya itug ndei midyai niya ser ig gudan nya bitut nimbumbati mem midyai di igyai ei TUHAN De Ig di joti nya. 16 Supim kin Hosa itug ndei midyai niya ser dimbou pmem di jo bei mpia nicutti kin midyai niya ser dimbou pmem Syalekhet di bie ug ei puig di rop ei anai. Ikwas midyai niya ser dimbou pmem nya dima tut yo di igya ser nya sindam ba, bihi igya ser dimbou pmem nya kikau. 17 Bikwop njap-njap ne ibou muhwindagom igya ser nite bei mpia nipriti. Lene ibou bitai bu igya ser nite bei mpia nijjai. Lene ibou bitai bu igya ser nite bei mpia nibiho. Lene ibou bitai bu igya ser ig gudan nya bitut nimbumbati mem midyai di igyai ei TUHAN De Ig di joti nya. Ba, bikwop ig gudan dima yok lene ibou can igya ser. 18 Lene ibou bitai itug ndei midyai niya ser puig di bie ug ei mpia di jo bas hak di iba ngug tig bikrop ttai bei mpia nicutti ba, ibou can bu itug ndei midyai niya ser mpia di jo bas hak di iba ngug tig bikrop ttai nijoti. 19 Ikwas midyai niya ser TUHAN De Ig tut Korah kin Merari ide bat nya ug ei nok gima.
Midyai hiter di Lewi nya igyai ei TUHAN De Ig
20 Tut nindigsi nya di intun keret Lewi him ne ikes midyai nahati tut mitiei nijoti ei TUHAN De Ig kin ig gudan di inju munkwas mem Allah nya eisi. 21 Gerson yai nipmot Ladan. Ladan nok pung di ninsi de nya poi intun him bitut nipmot Yehiel cem. 22 Ladan nipmot bat nindigsi nya inyeng rino Zetam kin Yoel itug ndei midyai nahati tut mitiei nijoti ei TUHAN De Ig kin ig gudan di inju munkwas mem Allah nya eisi.
23 Indo midyai bak yo di intun Amram kin Yizhar kin Hebron kin Uziel him cem.
24 Sebuel di ntun Musa nipmot Gersom ninsi de him tug ndei midyai nittei nibou tut yo di igya ser mitiei nijoti ei TUHAN De Ig. 25 Sebuel nimbier kim yo di ig bei nsi gom di Selomit tug hon Gersom nikinjoi Eliezer. Pung di Eliezer ntun him ug bipek Selomit inyeng rino Eliezer kin Rehabya kin Yesaya kin Yoram kin Zikhri kin Selomit. 26 Selomit kin nide bat nya yahagom itug ndei midyai nahati tut mun nyeng hagomti di Nibou Ndig Daud kin nibou nimpung ig bei nsi nya kin nibou mem insi de nya kin nibou tentara di inyeng jei nya ikwas di ibikuk yok bak TUHAN. 27 Munkwas dima ne ndigban nite hi di ipos leu siceu nya ei nikon pranti ba, ikwas pijum ei mem midyai di imam nya igyai ei TUHAN De Ig. 28 Gi irop ninda ndigsi tut hak lene Selomit ya tut nide ig bei nsi nya ba, yahati tut mun nyeng di ikwas mem midyai di imam nya igyai ei TUHAN De Ig. Bitut mun di Nibou Ndig Saul kin Abner di Ner nipmot kin Yoab di Zeruya nipmot ba, yo dini yahagom ikwas tut TUHAN tug hon Nabi Samuel cem.
Keret Lewi nindigsi nya ide midyai di igyai nya
29 Ikes midyai sekertaris kin midyai nigwam nok nikei mben Israel bak Kenanya kin nipmot bat nya di intun Yizhar him.
30 Lene ikes midyai nyeng hagom di bitut TUHAN De Ig kin midyai nidimig Israel ninyeng tak kepti nimbutti tut mben Israel di ibong Yordan nyai nite bei mpia nicutti hagom bak Hasabya kin nide bat nya ibou sribu gom sratus muhwindacan ba, igyai gima. Yo dima yahagom intun Hebron him ba, inyeng jei cem. 31 Yo di intun Hebron him ide nibou di bie tut yok ninyeng Yeria. Mpe di Daud ninyeng tak kepti ug ei ari bingwam gi ningot bitai su lene igyok igyai kep binggok tut yo di intun Hebron him. Igyok igyai kep Hebron nide bat nya leu api jo nibreisi mem yok bipia tentara ibou poi di intun Hebron him di mimbri kui ingkek ibong ei Yazer ei Gilead de hanjop. 32 Lene Nibou Ndig Daud kes midyai nyeng hagom di bitut TUHAN De Ig kin midyai nidimig Israel ninyeng tak kepti nimbutti tut mben Israel di ibong Minyei Yordan nyai nite bei mpia nipriti hagom bak nibou ig bei nsi nya ibou sribu can sratus muhwindacan di coi Yeria ninsi de nya. Ba, yo dini ne pinjoi ndig di mimbri kui ingkek ningkom. Yo di ibong ei hanjop nsi dima ne keret Ruben kin keret Gad kin keret Manasye nite hi ri.