Yo di iba musik bipai doia ei TUHAN De Ig
25
1 Nibou Ndig Daud kin nibou di ibie tut keret Lewi nya idimig keret Lewi ninsi de nya ei mem gima ibie tut nibon midut nikuk no bak Allah. Yo di idimig yok ei dima inyeng rino Asaf kin Heman kin Yedutun. Indo yo dini mem gima itri tut Allah nicukti tug hon doia di iba nggong mbrei kin gitar kin yeng beng ngkimom-tembaga bikek ibibit Allah nicukti dima. Idimig nimpung poi ei mem gima iba musik bipai doia ibibit leu Njap Nigwam Kep Ninghuisi kin nibon midut di mbut sindam nya.2 Yo dima ne Asaf di yai nipmot bat nya ibou bitai di inyeng rino Zakur kin Yusuf kin Netanya kin Asarela. Asaf ne nibou di bie tut yok tirigi iba musik bipai doia ba, ikon Allah ninyeng ei mpe di nibou ndig cuk yok ri.
3 Kin Yedutun di yai nipmot bat nya ibou muhwindagom. Ba, nipmot bat dima inyeng rino Gedalya kin Zeri kin Yesaya kin Simei kin Hasabya kin Matica. Icig nonti bie tut yok tirigi iba musik bipai doia ba, ibikon Allah ninyeng tug hon nggong mbrei nya ba, ipai doia di ibipai sigyo bak TUHAN cem.
4 Kin Heman di yai nipmot bat nya ibou simnaibrimigtai. Ba, nipmot bat dima yok inyeng rino Bukia kin Hananya kin Uziel kin Sebuel kin Yerimot kin Hananya kin Hanani kin Eliata kin Gidalti kin Romamti-Ezer kin Yosbekasa kin Maloti kin Hotir kin Mahaziot. 5 Heman ne nabi di ya kui nibou ndig pijum ri. TUHAN yai nipmot bat nya ibou simnaibrimigtai pima kin nipmisop bat nya ibou ningai bak Heman. Lewo TUHAN preu ei mem noni bipia miyai ninyeng di jei bak. 6 Heman nipmot bat dima yok yahagom iba yeng beng ngkimom-tembaga kin nggong mbrei kin gitar bipai doia ba, ibibit leu Njap Nigwam Kep Ninghuisi kin nibon midut di mbut sindam nya ei TUHAN De Ig. Idimig nimpung poi kin bu ei mem gima iba musik bipai doia ba, ibibit leu Njap Nigwam Kep Ninghuisi kin nibon midut di mbut sindam nya.
Asaf kin Yedutun kin Heman yoni igyai midyai dima bit leu nibou ndig nindo yoti. 7 Ipmot bat nya ibou nyatungwagom ba, bitai dima igya kin ide bat nya yahagom biba musik bipai doia igkei lewo ibiyai hamem ba, ikek mungkun kei. Ba, gino ikwop yo dima yahagom sok yam lene imangti ibou sratus can ningot muhwindaningai ba, muhwindaningai.
8 Yo dini yahagom ikus bit leu binhyepo bit dima bindo tut nituti dima iba musik bipai doia. Ba, gima tut pilei nya kin ndigpoi nya di iba musik bipai doia kan tu nya kin yo di sindi ikinyon eisi di ipikor tut cem.
9-31 Ikwas ibou sratus can ningot muhwindaningai ba, muhwindaningai dima ei nimpung ningot can ba, bitai bibikwop ide nimpung ninsi de nya gom-gom. Yo di inggre kin bikwop nimpung nya imangti ibou simnaibrimigcan ba, nibou gom bie tut yok. Inyeng di hei di bibit nikus bitti mem iba musik bipai doia sindam dima rino nigom rino Yusuf leu Asaf de igbei nsi nya. Nican rino Gedalya. Niningai rino Zakur. Nibitai rino Yizri. Nimuhwi rino Netanya. Nimuhwindagom rino Bukia. Nimuhwindacan rino Yesarela. Nimuhwindaningai rino Yesaya. Nimuhwindatai rino Matanya. Nisimnai rino Simei. Nisimnaibrimiggom rino Azareel. Nisimnaibrimigcan rino Hasabya. Nisimnaibrimigningai rino Subael. Nisimnaibrimigtai rino Matica. Nisimnaimuhwidip rino Yeremot. Nisimnaimuhwidip brimigtehigom rino Hananya. Nisimnaimuhwidip brimigtehican rino Yobekasa. Nisimnaimuhwidip brimigtehiningai rino Hanani. Nisimnaimuhwidip brimigtehibitai rino Maloti. Gi nyatungwagom rino Eliata. Gi nyatungwagom gom rino Hotir. Gi nyatungwagom can rino Gidalti. Gi nyatungwagom ningai rino Mahaziot. Gi nyatungwagom bitai Romamti-Ezer.