22
1 Lene Daud tri tut <<Suar nyeni iwin TUHAN Allah De Ig ei gumihyep dini. Suar mben Israel ijem ide mindhe-ndhe di ibui kwei ba, indig kep hum bak TUHAN ei nimbar hum dokti dini.>>Mben Israel itin ei nimbumbati di ibingot TUHAN De Ig
2 Nibou Ndig Daud sok nihyet bak ngkiai di ibong timiei ei mben Israel ikieti yahagom bikwei dem yam. Leu api noni ndo midyai biyok mem gima igyai kep a. Ba, nimpung hi ibon tig mem gima ibingot TUHAN De Ig. 3 Lene nimpung hi ibon paku kin engsel nya mem dimbou pmem nya ei TUHAN De Ig. Daud nju ngkimom-tembaga mang bibor keyam mem gima ibingot ig dima ba, bit bon ibakilo nibuhunti kan bi. 4 Noni hara mben Tirus Sidon nya leu binhyepo iwim buom Libanon ninjem mang bibor kwei cem. 5 Daud tin ei mun nyeng dima yok hagom mem TUHAN De Ig. Lewo kan <<Ma sitin ei mun nyeng hagom di sipmot misuar mem gima biwin TUHAN De Ig. Lewo sipmot Salomo pilei yo he ba, kan tut mun nyeng di biwin Ig dima bigyo. Suar TUHAN De Ig di Salomo miwin dima ne Ig di kei bibor kei ba, ninyeng jei bibor dor njiriek ig hagom ei dihyeisi dini cem.>> Tirigi Daud mai bigyo lene noni tin ei mun nyeng mang bibor mem TUHAN De Ig.
6 Daud jem nipmot Salomo kwei ngat noni bicuk noni bipia suar noni ngot ig mem TUHAN Allah di mben Israel ikuk yok bak. 7 Daud pai bak Salomo <<Dipmot na e, diyok ngon mem gima dingot ig gom nok mun di bindo bipia dibikon ditde TUHAN Allah ninyeng mimbrek ngan eisi tu. 8 Noro TUHAN pai bipia dinda jo kep nikon pranti kikau ba, diyai nimai bak yo di imang bibor tu. Gima rino ce tut gima dingot ig mem Noni bi. 9 Mbro nok gima lo, Noni preu ei mem da bipai <Ma abon apmot gom di ba ningon sren bibie tut nide limwa nya. Midimpu noni apino nide siceu nya hi di mikon pran bit noni bi. Mijem ninyeng Salomo lewo ei nijam di ninyeng tak kep ne midibindei ba, mpia mbum-bra ba, mben Israel yahagom ibong kei igwam kei cem. 10 Apmot dima rino mingot ig mem Da. Noni minok dipmot lene Dani dinok nicigya. Nibou ndig Israel de banggo mbrei di ndo bipia ninyeng tak kep mben Israel dini mijo nijoti mem yo di intun noni him bijo ninno bijo kikau.> >>
11 Lene Daud pai bu <<Dipmot na e, nogindini handei kon ba, ade TUHAN Allah mimpu na. Handei kon ba, angot ig mem Noni bipek kep nok Noni preu ei mem nye tu. 12 Ade TUHAN Allah miyai angon di binggok puig tut mun di abon kin angon di ki tut mun nyeng hagom cem bina leu binhyepo anyeng tak kep mben Israel bit leu TUHAN niggai serti nya. 13 Gino abit TUHAN nikos tutti nya hagom po yai bak Musa mem mben Israel pima lene mporo ma angat ningat di kei di ntun him. Suar angon ngkiem ba, abrim angkek cem. Lene ma angon nghen ba, adigit tut mun nyeng hi di aum kep nya au. 14 Tut TUHAN De Ig pima ne dibrim dingkek tut bibor ba, dinju mas nimangti dem kilo juta ningai sribu sratus bitai kin perak nimangti dem kilo juta ningot ningai ba, bitai binjiriek ei mem ig dima tu. Ter leu gima lene ditin ei ngkimom-tembaga kin ngkimom nitu di bit bon ikwop nibuhunti kan bi cem. Ditin ei tig kin biei mem tu. Noro suar akum eisi bu. 15 Ade tungwatu di aba yok biyai midyai dima imang bibor. Tukan di igyai midyai nibei kep tig eisi kin tukan biei nya kin tukan tig nya kin tukan hiter di ingon ki tut mun di ibon bou inda him yahagom imang bibor. 16 Tukan mas cem tukan perak cem tukan ngkimom-tembaga cem tukan ngkimom nitu cem yahagom yo rinaha. Gima rino ma akinyon eisi haninyai! Handei kon ba, TUHAN mimpu nani tut.>>
17 Leu api Daud cuk nibou mben Israel yahagom leu binhyepo impu Salomo tut midyai dima, 18 bipai biyok <<Jide TUHAN Allah mpu jahagom bibindei ba, jibong kei jigwam kei tu. TUHAN sindem tut da ba, dikon pran bit mben di ibong ser minu dini nimbie him ngat ba, dibindei timek yok tu. Ba, nogindini iba ibou coi mem jeni cem mem TUHAN cem tu. 19 Gima rino suar jiba jingon titut kin jinnei titut kin jide nisindemti titut bibon jenti nok awak mem jide TUHAN Allah. Ma jikinyon ei ningot ig mem TUHANti leu binhyepo jikes TUHAN De Brua Gi Preu kin ndigban nindigsi nya hagom di jibiyai midyai pijum bitut nibon midut nibikuk je biNoniti hagom eisi.>>