23
1 Tirigi Daud wer andig-ndau leu su lene noni kon Salomo kui bigwam nok nibou ndig mem mben Israel.Keret Lewi ide midyai
2 Jei bi lene Nibou Ndig Daud nduk nibou mben Israel kin imam nya kin keret Lewi nya yahagom bidem yam. 3 Leu api kwop pinai di intun keret Lewi him di ide njap ug ei ari bingwam ningot ningai bikui yahagom. Yo dima yahagom imangti ibou sribu ningot ningai muhwindaningai. 4 Leu api noni ndo midyai bak yo dima ibou sribu ningot can bitai mem gima yahati tut midyai ei TUHAN De Ig. Lene dimig ibou sribu muhwindagom ei nok nibou di igwam nok nikei mem gima ikos tut munhyet. 5 Noni dimig ibou sribu bitai ei nok yo di igya ser TUHAN De Ig a. Lene dimig ibou sribu bitai bu ei mem gima iba musik di itin ei su nya bipai doia mem gima ibinggei sut TUHAN ninyenga.
6 Daud kwas keret Lewi dima ei nimpung ningai bibit leu insi de nya. Insi de nya dima ne Gerson ninsi de nya kin Kehat ninsi de nya kin Merari ninsi de nye ri.
7 Gerson yai nipmot bat ibou can di inyeng rino Ladan kin Simei. 8 Lene Ladan yai nipmot bat nya ibou ningai di inyeng rino Yehiel kin Zetam kin Yoel. 9 Yoni inok nibou mem ninsi de di intun Ladan him nya. (Simei yai nipmot bat nya ibou ningai di inyeng rino Selomit kin Haziel kin Haran.) 10-11 Lene Simei yai nipmot bat nya ibou bitai bu di igyai inyeng bibit leu njap di isrekti. Ba, yoni inyeng rino Yahat kin Ziza kin Yeus kin Beria. Yo di intun Yeus kin Beria him imang bi. Ba, induk yok ei nok nimpung gom ngat he.
12 Kehat yai nipmot bat nya ibou bitai ba, inyeng rino Amram kin Yizhar kin Hebron kin Uziel. 13 Amram gi nipou pima ne Harun Musa nya icig ri. (Musa dimig Harun kin yo di intun him nya pijum ei mem gima inyeng tak kep nimbumbati kin ndigban di ibibon midut nya cem iba biei nggrai di ui-gwang kei di indig pima binggei sut TUHAN cem bahati tut TUHAN de midyai nya cem iba nadi di ingat tug hon TUHAN ninyeng bipai ighyet di biyai gi kei bak limwa nya bijo ninno bijo kikau. 14 Ba, ibindei coi Allah de awak di Musa nipmot bat nya ei keret Lewiti.) 15 Musa yai nipmot bat nya ibou can di inyeng rino Gersom kin Eliezer. 16 No di nok nibou mem Gersom nipmot bat nya ninyeng rino Sebuel. 17 Eliezer nipmot nimig gom ngat di ninyeng rino Rehabya. Noro Rehabya yai nimunggwom bat nya imang bibor.
18 Yizhar ne Kehat nipmot gi nican rin ba, noni yai nipmot nimig gom di ninyeng rino Selomit. Selomit ne nibou mem ninsi de nya ri. 19 Hebron ne Kehat nipmot gi niningai rin ba, noni yai nipmot bat nya ibou bitai ba, inyeng rino Yeria di mighumbou kin Amarya kin Yahaziel kin Yekameam. 20 Uziel ne Kehat nipmot gi nibitai rin ba, noni yai nipmot bat nya ibou can. Ba, mighumbou ninyeng rino Mikha lene nipumiap ninyeng rino Yisia.
21 Merari yai nipmot bat nya ibou can di inyeng rino Mahli kin Musi. Mahli yai nipmot bat nya ibou can ba, inyeng rino Eleazar kin Kish. 22 Noro Eleazar mai nipou tirigi yai nipmot bat nya hi bigyo. Noni yai nipmisop bat nya he ba, yoni kin icig mien di Kish nipmot bat nya iwak yam. 23 Musi ne Merari nipmot gi nican rin ba, noni yai nipmot bat nya ibou ningai di inyeng rino Mahli kin Eder kin Yeremot.
24 Yo dini ne Lewi de nintun him yamti di bram yam nya inyeng ri. Ipas kep inyeng dima ba, ibibit leu yo di intun bibikwop nibou ninsi de nya inyeng him cem nibou ig bei nsi nya inyeng him cem. Yo di intun noni him di ide njap hon ari bingwam nyatungwagom bikui igyai midyai ei TUHAN De Ig.
25 Lene Daud pai <<TUHAN Allah Israel bindei ba, Nide limwa nya ibong kei igwam kei tu. Lene Nonti ningat rin bibong ser minu ndig Yerusalem bijo ninno bijo kikau. 26 Gima rino suar yo di intun Lewi him ittei TUHAN De Prak Meng kin ndigban di joti nya hagom bimbut-mbut nyen tut bu bi.>> 27 Tirigi yo di intun Lewi him ide njap ug ei ari bingwam nyatungwagom lene suar ipas kep inyeng mem gima igyai midyai bit leu Daud nicuk yokti nya gi ningwigsi. 28 Suar impu imam di intun Harun him nya tut nibon midut nya ei TUHAN De Ig cem igya ser mpia di jo bas hak di iba ngug tig bikrop ttai nya cem inyohou nghim nsi nya ei TUHAN De Ig cem igya ser nhyema map kui ndigban di ikwas pijum ei mem TUHAN cem hagomti bi. 29 Inyeng tak kep midyai nikang roti di ide limwa nya ibikuk yok bak Allahti kin tepun di mem nibon midut njita nibipai sigyo bak Allahti cem roti di dile bibor di roti njep srigsi bi cem roti mem nibon midut nindigsi nya cem tepun di ibisrig mini zaitunti cem. Suar iba kilo mun di mben Israel ikwas tut TUHAN ba, ibakilo mun di ikon bittei ug ei TUHAN De Ig cem. 30 Ter leu gima lene suar ipai doia bibikon TUHAN ninyeng bikwop njap tekti kin mmunti cem, 31 bikwop nituti dino ibon midut nindig mindhe titut kep humti bak TUHAN ei Njap Nigwam Kep Ninghuisi cem njap Bed Jep kin nibon midut nindigsi nya cem. Yo di intun keret Lewi him inyeng tak kep midyai dima yok hagom bikwop njap ba, ibuhup tut nikos tutti dino suar igyai kep midyai dima bijo ninno bijo kikau. 32 Suar ibuhup tut midyai ninyohou TUHAN De Prak Meng kin TUHAN De Ig ba, impu ide bat imam nya di intun Harun him yahagom tut nibon midut nya di ibon ei gumihyep dima cem.