Daud pas kep limwa nide nya imangti
(2Sam. 24:1-25)
21
1 Jei bi lene Bilis joi sut bindei ba, mun di buhun micut igkep mben Israel. Gima rino pingok ei Daud ningonti leu binhyepo pas kep nide limwa nya inyeng bikan tut imangti. 2 Gima rino Daud cuk Yoab kin nide tentara nya <<Juug pas kep limwa nya inyeng bidem minu Israel nisurti-nipekti bitut minu mien-mien cem hagom. Lewo dijoi sut dikan tut mben Israel yahagom imangti.>>3 Lene Yoab buhup <<Handei kon ba, TUHAN bindei ba, limwa Israel imangti kum eisi kikau mbisratus bram yam dor njiriek imangti di ingat rin nogindini bu! Na Di Andigpoi e, jo nibreisi bipia yahagom ibou cut binani tu. Gima rino minggon rima Na Di Andigpoi ajoi sut gima nuug pas kep inyeng i? Mben Israel yahagom mitug ndei hukum ei nidipti bu drek dip mun di atunggwei sut dima ug ri!>> 4 Noro nibou ndig nihyet jo kep nicukti dima kikau. Gima rino Yoab nya imbut ba, igya bidem Israel nisurti-nipekti bitut minu mien-mien cem hagom ba, ikwop kep limwa nya inyeng leu api ingkwei sut daptar hanyen kwei ei minu ndig Yerusalem, 5 bipai sut inyeng di ipas tu pima imangti bak Nibou Ndig Daud. Pinai mben Israel di ide nisindemti dem mem gima igyai midyai nok tentara ne imangti ibou juta gom ba, sribu sratus gom. Lene pinai timiei Yahudi nya imangti ibou sribu sratus bitai ningot muhwindacan. 6 Noro Yoab kwop keret Lewi kin Benyamin imangti bi drek dip gi po noni joi sut nibou ndig nicuk noti pima bi.
7 Allah joi sut niyai inyeng nimangti dima bi. Apino Noni kes hukum ei mben Israel dip ug a. 8 Lene Daud ngat nadi bak Allah bipai <<Allah e, dibon sisar nindig bibor tu. Diba ningon di mbum bikwop limwa nya imangti. Gima rino ma akos ser ditde nibon mun tunggweisi dima!>>
9 Lene TUHAN pai bak Nabi Gad di ya hacan mem Daud kin TUHAN, 10 <<Aug pai bak Daud bipia dikes mun nyeng ningai binoni leu api suar noni mbus mun nyeng gom leu mun nyeng ningai dima. Midiba mun nyeng di noni dimig ei dima bihwen bit noni kin mben Israel ug ri.>>
11 Leu api Gad ug ngat Daud bindat kep TUHAN nihyet dima bak bipai <<Gi tou rino adimig i? 12 Ajoi sut gima TUHAN ba ninggum di buhun bibor bihwen Israel kikau mem nijam ari bingwam ningai e, he ma siceu nya yuhuk na ba, anang-nang nyen kikau mem nijam bed ningai e, he ma TUHAN ba nide malaikati di ba nide simeda di nok nsuwer ajar di buhun di ttei nimai bimbut tut ug ei tirima-tirima bihwen ade limwa nya ei minu dini hagom kikau ei ninsi njap ningai e? Suar adimig mun nyeng gom leu mun nyeng ningai dima ei nogindini leu binhyepo dipai sut abuhupti hanyen bak TUHAN.>>
13 Lene Daud buhup <<Ayo! Buhun bibor mem dani o! Handei kon ba, TUHAN kes hukum ei da dip hak ug leu gima tungwatu nya mikes hukum ei da dip lewo TUHAN ningondut tungwatu nyati nindig bibor.>>
14 Leu api TUHAN ba nsuwer ajar di buhun bihwen mben Israel bibindei ba, ibou sribu ningot muhwindacan imai hak ei ikieti. 15 Leu api TUHAN pinak malaikati gom bipi bibindei sar minu ndig Yerusalem cem. Tirigi malaikati dima ug biya dideu Arauna di mben Yebus de ig gudan di co kep gandum eisi lene TUHAN nggek ningonti tut nikos tutti bak mben Israel pima. Lene pai ser malaikati dima <<Cobi ba, akes hon!>>
16 Daud ngat malaikati dima di dwop-dwop nyen ei mpia-bbed him kin dihyeisi dini nikieti bikrau simeda ei nindati lene bitin ei mem gima bindei timek Yerusalem lene noni ya tut limwa nya ide nibou nya yahagom di ijuk sinsun kron noyam bibindo tut gi inso yonti tut itunggweisi pima. Lene yahagom ikuk yok biba ingwak bikik dihyei. 17 Daud ngat nadi bipai <<Allah e, dani rino ditunggwei sut dino dicuk Yoab nya di ikwop mben Israel imangti ug a. Mben dini ne igyai mun di tunggwei hi bi sren. Ditde TUHAN Allah e, ma akes hukum ei dani kin ditde ig bei nsi nya dip lene ma aom angon tut Ade limwa di ingon ngun nya.>>
18 Leu api TUHAN de malaikati cuk Gad buug pai bak Daud bipia suar Daud kui ug ei Arauna de ig gudan nico kep gandum eisi biwin nimbar hum dok mem TUHAN ei sirima. 19 Leu api Daud kiju bimbut bit leu TUHAN nicukti di pai mem noni tug hon Gad. 20 Mpe dima lene Arauna kin nipmot bat nya ibou bitai no igya kep gandum di ico kep ei ig gudan pima. Tirigi ingat malaikati dima lene Arauna nipmot bat pima yok inang biku yok. 21 Arauna ngat Daud di kwei lene kiju buug ngat noni leu api kuk no biba ningwak bikik mpia ei Daud noho bei. 22 Lene Daud pai bak <<Dijoi sut diwin nimbar hum dok mem TUHAN ei mpia dini leu binhyepo nsuwer ajar dini mikes leu nye. Gima rino ma atri mpia ttou nsi gom dini bida. Apai igbit nibok bida ug leu api dipek leu na.>>
23 Noro Arauna buhup bak <<Nok bi! Na Di Anyeng Jei ayai dihyei dini hak ba, abon mun di Na Di Anyeng Jei akan tut bipia kei mem nye eisi hak ug. Disindui sut sapi dini yok cem mem nibon midut nindig mindhe titut kep humti. Lene ma Na Di Anyeng Jei ayai biei sra di dibikinding mem gandum di dico kep eisi dini nok biei hum a. Lene abiyai gandum cem mem nibon midut njita nibipai sigyo bak Allahti cem. Dikwas mun dima yok hagom mikuisi tut Na Di Andigpoi hak ug. Ma akou kep da au.>>
24 Noro nibou ndig buhup <<E bi! Midipek gima yok hagom leu na, dem igbit nibok a. Lewo midikwas mun di nani anyeng tut nya kin mun di ditug ndei mikuisi tut TUHAN bi sren.>> 25 Gima rino Daud ba mitiei mas nitig sratus muhwindagom bipek mpia dima leu Arauna. 26 Noni win nimbar hum dok gom mem TUHAN eisi leu api bibon midut nindig mindhe titut kep humti kin nibon midut nibiyai ningon kwes kin Allahti cem eisi. Leu api bingat nadi bak TUHAN. Apino TUHAN buhup nadi dima tug hon nisinati dino pinak hum kwei leu mpia-bbed him biyem mindhe-ndhe di ibui di ikes ei nimbar hum dokti dip pima bingwig. 27 Leu api TUHAN cuk malaikati pima bijus nide simeda hanyen ei nahamti. Lene noni yai igbit TUHAN nicukti dima.
28 Tirigi Daud ngat lo, TUHAN buhup nide nadi tug hon nibon midut ei nimbar hum dokti dima tu lene noni bon midut nindig mindhe-ndhe titut hi kin bu kep humti pima bak TUHAN. 29 Ei nijam dima ne TUHAN De Prak Meng di Musa bon ei iggum ndigsi pima kin nimbar hum dok di mem nibon midut nindig mindhe-ndhe eisi no jo nijoti ei gumihyep di ikuk yok bak TUHAN eisi di jo ei Gibeon. 30 Noro Daud brim ningkek buug ei sirima mem gima mbrap bit TUHAN bi. Lewo ttin tut TUHAN de malaikati bitut nide simeda.