Ahas di nok nibou ndig mem timiei Yehuda nya
(2Taw. 28:1-27)
16
1 Tirigi Nibou Ndig Pekah di Remalya nipmot ninyeng tak kep mben Israel mem nijam ari bingwam simnaimuhwidip brimigtehican tu lene Ahas di Yotam nipmot kui bigwam nok nibou ndig mem timiei Yehuda nya. 2 Mpe di kui bigwam nok nibou ndig dima ne nide njap ug ei ari bingwam nyatungwagom. Noni bong ei minu ndig Yerusalem ba, ninyeng tak kep timiei Yehuda nya mem nijam ari bingwam simnaimuhwidip brimigtehigom. Noni yai bram nidigai Daud niyai munti di kei nya bi. Apino niyai munti dima bipwoi nide TUHAN Allah ningon bi. 3 Noni yai bram nibou ndig mben Israel di nipou nya igyai munti nya ba, bon mun di tunggwei tug hon nidat nipmot bindig ningut ei nimbar hum dokti bak kwar nya noyam kin yo po TUHAN jji yok leu minu Kanaan ei mpe di po mben Israel icoi ug ei minu dima nimbie him pima ide nibon kepti. 4 Ahas ba nibon midut nindig mindhe ei nimbar hum dokti kin nibon midut nindig biei nggrai di ui-gwang keiti ba, bikuk no bak kwar nya ei mpia di nide limwa nya ikuk yok bak kwar eisi nya ei bibikwop mbigdip kin biei di nimeng nggrou nya nibehei cem.5-6 Ei nijam dima ne nibou ndig mben Edomh bindei ba, ninyeng tak kep minu ndig Elat hanyen bijji timiei Yehuda nya di ibong ei minu ndig dima bingwig leu api mben Edom induk yam kwei bibong ser minu ndig dima kikau kwei bipek ammani kep. Ei nijam dima ne Rezin di nok nibou ndig mem mben Siria kin Pekah di nok nibou ndig mem mben Israel ikon pran bit timiei Yehuda nya bigyon ttai minu ndig Yerusalem cem noro ibindei cut Nibou Ndig Ahas bi. 7 Lene Ahas sok nihyet ei tungwatu nya dip bak Tiglat-Pileser di nok nibou ndig mem mben Asyur bipai bak <<Dahara na di Andigpoi leu binhyepo akwei mpu da ba, ateu da bidingwes ngun leu nibou ndig mben Siria kin nibou ndig mben Israel di sindi ikon pran bit da dini inda nsi ug e. Lewo dani ne ade awak di ningon gom ri.>> 8 Lene Ahas cat ndigban di iba mas kin perak bibon leu Tuhan De Ig bicat ndigban ngot leu ig nibou ndig de cem lene pinak hagom nok munkwas di biyai ningon kei bak nibou ndig mben Asyur. 9 Lene Nibou Ndig Tiglat-Pileser ce tut Ahas nahara noti leu api njei siceu ba, hwen minu ndig Damsyik leu lene yai ba, yati. Lene kat timiei minu ndig dima yahagom bikri yok ug ei Kir ba, isima lo, yai nimai bak ide Nibou Ndig Rezin.
10 Tirigi Nibou Ndig Ahas ug ei Damsyik leu binhyepo ug um Nibou Ndig Tiglat-Pileser lene noni ngat timiei minu dima ide nimbar hum dok leu api kilis nimbar hum dok dima ningwes di bingon bipinak bak Imam Uria ei minu ndig Yerusalem. Noni ba nide nai binai ninyanti kin nanaisi kin nijeisi nya hagom bidem kei. 11 Leu api Uria win nimbar hum dok gom di noyam kin ningwes di bon di pinak kwei bit leu nok nai di binai su pima ba, hagom put nipou tirigi Ahas ngkwei hanyen bigyo. 12 Tirigi Ahas ngkwei hanyen leu Damsyik ba, sindi kwei krau lene bisau bingat lo, nimbar hum dok dima put tu. 13 Leu api noni bon midut nindig mindhe titut kep humti kin nibon midut njita nibipai sigyo bak Allahti cem ei nimbar hum dok dimati. Lene bon midut nikiber ba anggur ngei kin mindhe nggrom di isiber di indig ei nimbar hum dokti mem nibon midut nibiyai ningon kwes kin Allahti cem ei nimbar hum dok dima nidip a. 14 Lene Ahas ngat lo, nimbar hum dok di iba ngkimom-tembaga bibon di ikes pijum mem TUHAN no jo ei Tuhan De Ig kin nimbar hum dok nijep dima ikieti. Gima rino noni bindei ba, nimbar hum dok di iba ngkimom-tembaga bibon dima birok kik Tuhan De Ig nuhui him bu bi lo, isindik bijo ei nonti nide nimbar hum dok nijep dima nijjai. 15 Gima leu lene cuk Uria <<Ma ayai nibou ndig kin limwa nya ide mun di ikwas tut Allah ba, abibon midut nindig mindhe titut kep humti bikwop njap bigyoti kin mmunti cem gau yok ei ditde nimbar hum dok di nindig dimati. Lene ma abon midut nikiber ba anggur ngei di limwa nya ide ei sirima cem. Ma asiber bikwop mindhe di ikwas mem gima indig ei nimbar hum dokti dima yok ninggrom hagom ei nimbar hum dok dima nidip a. Lene tut nimbar hum dok timiei di iba ngkimom-tembaga bibon dima lene dani rima diba gima binggok tut ninnei nya ingon kanti.>> 16 Lene Uria yai igbit nibou ndig nicuk noti nya.
17 Leu api Ahas bindei ba, inggek kroba ngot di iba ngkimom-tembaga bibon di ibiyai midyai ei Tuhan De Ig hagom lene cug bokor ndig nya di jo kroba ngot dima dip leu. Lene noni bindei ba, ikon bokor di jut bibor di iba ngkimom-tembaga bibon bikes ei sapi ngkimom-tembaga simnaibrimigcan pima inghim dip cem bikes ei nikiou di iba tig bibon nidip cem. 18 Leu api Ahas bindei ba, ilet ansan di nibou ndig de banggo mbrei joti ei Tuhan De Ig lene nggam ser dimbou di itu pijum ei mem nibou ndig nya icoi kak cem.