Uzia di nok nibou ndig mem timiei Yehuda nya
(2Taw. 26:1-23)
15
1 Tirigi Nibou Ndig Yerobeam Nican ninyeng tak kep mben Israel mem nijam ari bingwam nyatungwagom ba, muhwindacan lene Uzia di Amazia nipmot kui bigwam nok nibou ndig mem timiei Yehuda nya. 2 Mpe dima lene nide njap ug ei ari bingwam simnaimuhwidip brimigtehigom. Noni bong ei minu ndig Yerusalem ba, ninyeng tak kep timiei Yehuda nya mem nijam ari bingwam ningot muhwi ba, can. Nipmem ninyeng rino Yekholya di sop timiei minu ndig Yerusalem. 3 Uzia bon mun di igbit di biyai TUHAN ningon di kei noyam kin nicig cem. 4 Noro noni gicok tut mpia di tungwatu nya ikuk yok bak ide kwar eisi nya bi. Apino limwa nya ibon kep nibon midut nindig mindhe titut kep humti kin nibon midut nindig kep biei nggrai di ui-gwang kei cem ei mpia dima ba, ibikuk yok bak kwar nya. 5 Mpe di gom ne TUHAN bindei ba, bras yem Uzia ningkek dip lene noni kei hanyen bi kikau ug bipek niyaijo ningwig honti. Ikes nonti njem bibong ter binongkom ei ig bei gom lene iggai ser biyai nide midyai hi bi. Gima rino nipmot Yotam ninyeng tak kep limwa nya nok nitom di hati tut noni.6 Nipui mun tut Nibou Ndig Uzia niyai munti nindigsi nya hagom jo ei srat Nibohon Nibou Ndig Mben Yehuda Nyati. 7 Uzia mai lene itig ei jui nsi di ibet ei mem itig kep nibou ndig nya eisi ei Daud De Minu Ndig. Lene nipmot Yotam kui bigwam nok nibou ndig biya luei nohoti.
Zakharia di nok nibou ndig mem mben Israel
8 Tirigi Nibou Ndig Uzia ninyeng tak kep timiei Yehuda nya mem nijam ari bingwam ningot ningai ba, muhwindaningai tu lene Zakharia di Yerobeam Nican nipmot kui bigwam nok nibou ndig mem mben Israel. Noni bong ei Samaria ba, ninyeng tak kep limwa nya mem nijam bed muhwindagom. 9 Noni cem bon sisar tut TUHAN noyam kin nibou ndig mben Israel nindigsi di inyeng tak kep yok nipou yo nya cem. Noni yai bram Nibou Ndig Yerobeam Nigom nibon munti di bindei mben Israel icut ei sisarti pima. 10 Lene Salum di Yabes nipmot yok ningon gom mem gima ham nimbuk kep Nibou Ndig Zakharia leu api yai nimai bak ei Yibleam. Leu api kui bigwam nok nibou ndig biya luei Zakharia nohoti.
11-12 Lene gima pek kep mun di TUHAN preu ei bak Nibou Ndig Yehu nipou su bipia nide nintun him di bram yamnya gi nigom kikau ug bipek pung gi nibitaif mikui bigwam nok nibou ndig mem mben Israel. Nipui mun tut Nibou Ndig Zakharia niyai munti nindigsi nya hagom jo ei srat Nibohon Nibou Ndig Mben Israel Nyati.
Salum di nok nibou ndig mem mben Israel
13 Tirigi Nibou Ndig Uzia ninyeng tak kep timiei Yehuda nya mem nijam ari bingwam ningot ningai ba, muhwindatai lene Salum di Yabes nipmot kui bigwam nok nibou ndig mem mben Israel ei Samaria ba, ninyeng tak kep mben Israel mem nijam bed gom he. 14 Lewo Menahem di Gadi nipmot jo leu minu ndig Tirza buug ei Samaria leu api yai nimai bak Salum lene kui bigwam nok nibou ndig biya luei nohoti.
15-16 Tirigi Menahem jo leu Tirza bimbut kak puig sinon lene noni hwen minu ndig Tifsah bitut hanjop di jo ttai nya hagom bisar bibor hak ug lene noni hwen timiei dima yahagom bisar ningwig hak cem. Timiei minu ndig dima ikou sut gima icut bak noni. Gima rino noni bindei ba, nide tentara nya israt sop timiei di itta buhun nya inghop tut munggwom biyem mpia ei dihyeisi ug a. Nipui mun tut Nibou Ndig Salum niyai munti nindigsi nya kin niyok ningon gom mem gima yai nimai bak nibou ndigsi hagom jo ei srat Nibohon Nibou Ndig Mben Israel Nyati.
Menahem di nok Nibou Ndig mem mben Israel
17 Tirigi Nibou Ndig Uzia ninyeng tak kep timiei Yehuda nya mem nijam ari bingwam ningot ningai ba, muhwindatai tu lene Menahem di Gadi nipmot kui bigwam nok nibou ndig mem mben Israel ei Samaria ba, ninyeng tak kep limwa di mben Israel mem nijam ari bingwam simnai. 18 Noni yai bram Nibou Ndig Yerobeam Nigom nibon munti di bindei di mben Israel icut ei sisarti. Lewo bon sisar tut TUHAN kikau ug bipek niyaijo ningwig honti. 19 Tirigi Pulg di nok nibou ndig mem mben Asyur ya tut nide tentara ba, injei bihwen mben Israel lene Menahem kiju bimbus perak di nibuhunti kilo sribu ningot ningai bitai biyai bak. Tug hon nisinati dima ne Menahem bindei sindem nide ninyeng tak kep mben Israelti. 20 Puig di Menahem nggok di biyai mitiei dima rino bidip huk timiei Israel di inyeng tut ndigban. Suar bikwop tungwagom-gom hit mitiei perak ningot muhwi biyai nimui bak. Gima rino Pul kiju bijo leu minu ndig dima bingkwei hanyen ug ei nitimieisi.
21 Nipui mun tut Nibou Ndig Menahem niyai munti nindigsi nya hagom jo ei srat Nibohon Nibou Ndig Mben Israel Nyati. 22 Lene noni cem mai ba, itig leu api nipmot Pekahya kui bigwam nok nibou ndig biya luei nohoti.
Pekahya di nok nibou ndig mem mben Israel
23 Tirigi Nibou Ndig Uzia ninyeng tak kep timiei Yehuda nya mem nijam ari bingwam gi ningot muhwi lene Pekahya di Menahem nipmot kui bigwam nok nibou ndig mben Israel ei Samaria ba, ninyeng tak kep limwa Israel mem nijam ari bingwam can. 24 Noni cem bon sisar tut TUHAN lewo yai bram Nibou Ndig Yerobeam Nigom nibon munti di kinei bibor di bindei di mben Israel icut ei sisarti. 25 Mpe dima lene Pekah di Remalya nipmot di nok Pekahya de nibou tentara gom kes ningon kanti bak mben Gilead ibou ningot muhwi. Leu api igyai nimai bak Pekahya kin ibou can di Argob kin Arye ei ninsi di jo nding ei tentara nibousi di igya coi gom ei Samaria. Leu api Pekah kui bigwam nok nibou ndig mem mben Israel biya luei Pekahya nohoti.
26 Nipui mun tut Nibou Ndig Pekahya niyai munti nindigsi nya hagom jo ei srat Nibohon Nibou Ndig Mben Israel Nyati.
Pekah di nok nibou ndig mem mben Israel
27 Tirigi Nibou Ndig Uzia ninyeng tak kep timiei Yehuda nya mem nijam ari bingwam ningot muhwi ba, can lene Pekah di Remalya nipmot kui bigwam nok nibou ndig mem mben Israel ei Samaria ba, ninyeng tak kep limwa Israel mem nijam ari bingwam nyatungwagom. 28 Noni cem bon sisar tut TUHAN. Lewo yai bram Nibou Ndig Yerobeam Nigom nibon munti di kinei bibor di bindei di mben Israel icut ei sisarti.
29 Lene Tiglat-Pileser di nok nibou ndig mem mben Asyur njei ba, hwen minu ndig Iyon kin Abel-Bet-Maakha kin Yanoah kin Kedes kin Hazor kin hanjop Gilead kin Galilea kin Naftali cem hagom mem nijam di Pekah ninyeng tak kep mben Israel. Tiglat-Pileser kat timiei nya yahagom bikri yok hanyen ug ei minu Asyur bisima.
30 Tirigi Nibou Ndig Yotam di Uzia nipmot ninyeng tak kep timiei Yehuda nya mem nijam ari bingwam nyatungwagom ba, can tu lene Hosea di Ela nipmot yok ningon gom bit nindigsi nya bigyai nimai bak Nibou Ndig Pekah leu api kui bigwam nok nibou ndig biya luei nohoti.
31 Nipui mun tut Nibou Ndig Pekah niyai munti nindigsi nya hagom jo ei srat Nibohon Nibou Ndig Mben Israel Nyati.
Yotam di nok nibou ndig mem timiei Yehuda nya
(2Taw. 27:1-9)
32 Tirigi nibou ndig Pekah di Remalya nipmot ninyeng tak kep mben Israel mem nijam ari bingwam can tu lene Yotam di Uzia nipmot kui bigwam nok nibou ndig mem timiei Yehuda nya. 33 Tirigi kui bigwam nok nibou ndig mem timiei Yehuda nya lene nide njap ug ei ari bingwam nyatungwagom ba, muhwi. Noni bong ei minu ndig Yerusalem ba, ninyeng tak kep timiei Yehuda nya mem nijam ari bingwam simnaimuhwidip brimigtehigom. Nipmem ne Yerusa di Zadok nipmisop ri. 34 Yotam bon mun di igbit di bipwoi TUHAN ningon noyam kin nicig Uzia cem. 35 Noro noni nggek mpia di nide limwa nya ikuk yok bak kwar eisi nya bi. Apino limwa nya ibon midut nindig mindhe-ndhe kin nibon midut nindig biei nggrai di ui-gwang kei cem ei mpia dima ba, ibikuk yok bak kwar nya. Yotam rino win Dimbou Pmem Mpia Nijjai di bie ug ei mpia di jo bas hak di iba ngug tig bikrop ttai TUHAN De Ig.
36-37 TUHAN kinyon ei nipingok ei Rezin di nok nibou ndig mem mben Siria kin Pekah di nok nibou ndig mem mben Israel ingonti bipinak yok ug ei minu Yehuda leu binhyepo ikon pran bit yok mem nijam di Yotam ninyeng tak kep timiei Yehuda nya.