Oi di piar ei minyei ngwa dip
6
1 Mpe di gom ne nabi nimpung gom di Elisa pingok ingonti ikwei nso tut ide ig bipai <<Nyende ig nimien ba, dem mem yahagom ibongti bi! 2 Ma asindui sut nye ba, nuug ei Yordan nyai leu binhyepo nikut bum hi kwei ba, nibingot ig di dem mem nye.>>Lene Elisa ce ighyet.
3 Leu api nabi gom mpig bou sut Elisa leu binhyepo noni hei sut yok lene noni ce bibit yok. 4 Gima rino yahagom imbut. Tirigi ikwei krau Yordan nyai lene ikinyon ei midyai nikut bumti. 5 Tirigi nabi gom kut bum rino nide oi ningat ho bicut ei minyeiti. Gima rino noni hara Elisa bipai <<Ayo! Andigpoi e, dippiet oi dima leu niceu!>>
6 Lene Elisa hig ser noni <<Oi dima cut ei siritou i?>>
Nabi dima ndo igbit oi dima nicutti leu api Elisa dahat biei ninda gom bicom ug ei minyeiti bibindei ba, oi pima piar ei minyei ngwa dip hanyen. 7 Lene noni cuk nabi dima <<Asu anda ba, ateu oi dima hak ug!>> Gima rino noni su ninda biteu oi dima leu minyei ngwa dip.
TUHAN bindei cut tentara Siria
8 Ei nijam dima ne nibou ndig mben Siria kon pran bit mben Israel. Tirigi noni kin nide nibou pran nya ihig yam tu lene noni ndo mpia gom biyok leu binhyepo yuug hok ide prak meng yati eisi. 9 Noro Elisa sok nihyet bak nibou ndig mben Israel bisok kep noni ser nhyema tentara Israel yuug ei mpia dima bi lewo tentara Siria ikos dik sir simpak ba, itin ei mem gima ihwen yok. 10 Gima rino nibou ndig mben Israel sok kep nide tentara di ibong ei mpia dima leu binhyepo itindei ser ide siceu nya. Elisa ba nihyet dima bisok kep nibou ndig mben Israel mbirimang tu.
11 Lene nibou ndig mben Siria ningon sibui sut mun dini. Gima rino noni hig nide nibou pran nya kwei bihig ser yok <<Jigom tti kin ide siceu nya tu. No dima tou i? Ma jipai igbit bida!>>
12 Lene nibou pran gom buhup <<Andigpoi e, nyeni ne bi. Noro Nabi Elisa kan bidem tut mun di tibim ei ahui him tirigi agwam binangkom ei ade nghim nsi leu api noni tri tut hagom hanyen bak nibou ndig mben Israel.>>
13 Lene nibou ndig cuk yok bipai <<Ma jinggok ser no dima leu binhyepo duug kat noni.>> Lene hi pai Elisa ninghapti bak bipia no bong ei Dotan. 14 Gima rino nibou ndig mben Siria cuk nide tentara di ibri kuda ba, ibri kroba pran cem imang bibor ug ei minu ndig dima. Yoni ikwei krau mem mmun leu api igyon ttai minu ndig. 15 Tirigi Elisa de awak kiju buug ei nisai mem njap bigyoti lene ngat lo, tentara Siria bitut ide kuda kin ide kroba pran igyon ttai mpia dima. Lene noni ngkwei hanyen ug ei ig bei bingat Elisa lene pai binoni <<Ayo! Andigpoi e, mbigom situg midut ug ri! Sibon nitou i?>>
16 Lene Elisa buhup bak <<Dwai! Attin tut au! Tentara di igya tut nye imang ndig dor njiriek tentara Siria dima yok.>> 17 Lene noni ngat nadi bipai <<TUHAN e, ma abindei ba, ditde awak niyai da leu binhyepo noni ngat igbit.>> Lene TUHAN buhup nihyet bibindei ba, awak dima kon nibou bingat lo, kuda kin kroba pran di dem kep nok hum di ninjeng srei imang bibor idis yam ei nungug tou dima hagom ba, igya bikrop ttai Nabi Elisa.
18 Tirigi tentara Siria sindi ihwen minu dima lene Elisa ngat nadi bipai <<TUHAN e, ma abindei ba, tentara dima yok yahagom igyai tu!>> Lene TUHAN buhup nihyet bibindei ba, yahagom igyai tu. 19 Lene Elisa ug ngat yok bipai biyok <<Jikrau tunggwei puig tu. Minu dini ne minu po jinggok ser pima rin bi. Ma jibit da ba, dibuwak je ndam no di jinggok ser pima ug e.>> Lene noni buwak yok ug ei Samaria.
20 Tirigi icoi ug ei minu dima rino Elisa ngat nadi bipai <<TUHAN e, ma abindei ba, igyai da hanyen leu binhyepo ingat igbit.>> Lene TUHAN buhup nihyet bibindei ba, tentara pima yok igyai da hanyen leu api ingat igbit bipia yoni icoi ug ei minu Samaria ri.
21 Tirigi nibou ndig mben Israel ngat tentara Siria bou niyai him lene noni hig ser Elisa <<Andigpoi e, diyai nimai bak yo dima e?>>
22 Noro Elisa buhup <<E bi! Tirigi akon pran bit ade siceu ba, akat ide tentara nya lene ayai nimai biyok bi. Ma ayai njita kin ba anggur ningei biyok leu api akes yok ba, ingkwei hanyen ndam ide nibou ndig hak ug.>> 23 Lene nibou ndig mben Israel bon pesta nindig bibor mem yok. Niabiati igyem njita bindei yok tu lene noni cuk yok bingkwei hanyen ndam ide nibou ndig ei minu Siria. Hon kep njap dima bikui lene tentara Siria ikes hon ba, ihwen mben Israel bu bi.
Tentara Siria igyon ttai Samaria
24 Bed poi ser tu lene Benhadad di nibou ndig mben Siria ya tut nide tentara nya yahagom ba, ikwei yon ttai Samaria. 25 Lene mun di buhun dini bindei ba, ninggum nindig bibor hwen timiei Samaria yahagom. Yo di itri keledai nibou itri bibipek mitiei perak nitig ningot muhwindaningai. Lene yo di itri hakimoi mbrei noic kilo niken he itri bibipek mitiei perak nitig muhwi.
26 Mpe dima lene nibou ndig mben Israel ya-ya nyen ei ngug tig di bikrop ttai minu dima dip lene sop gom hara noni bipai <<Andigpoi e, ma ampu da o!>>
27 Lene noni buhup <<Gino TUHAN mpu na bi lene notou midimpu na i? Lewo gandum kin ba anggur ngei ngwig leu da tu. 28 Nggon rino ahara da i?>>
Lene sop dima buhup <<Acan pini disut sop gom dini hum dinsi bipia nihwen ditde munggwom gom ba, nikwen ninghui biniyem leu api njap di bram bu nihwen nide munggwom gom ba, nikwen ninghui biniyem bu. 29 Gima rino nihwen ditde munggwom acan ba, nikwen ninghui biniyem bingwig leu su. Noro njap di bram bu tirigi ditin ei mem niyem nide munggwom ninghui lene dingat lo, noni ku munggwom dima.>>
30 Tirigi nibou ndig miap nihyet dima rino ba ningon ngguk bibor bikrau nide sinsun birik. Lene yo di igya kui ngug tig dima ingat lo, nibou ndig juk sinsun kron ei jou leu api nide sinsun nibou ndig jo kep. 31 Lene nibou ndig ba nihyet ndig bipai <<Gino dibindei ba, hi rop Elisa nitibou leu nipou tirigi mpia kimbas mem njap di ammani bigyo lene handei kon ba, Allah yai nimai bida hak ug!>> 32 Lene noni cuk tungwagom ug buwak Elisa kwei.
Mpe dima lene Elisa gwam nide ig bit timiei minu dima di inyeng jei nya ibou poi di ikwei cem kep noni. Lene Elisa pai biyok <<No di hwen mun igkei pima sindi cuk tungwagom kwei mem gima yai nimai bida ri! Tirigi no dima kwei krau lene ma jinggam mbou ser nhyema noni coi kwei au lewo nibou ndig nonti miya abia kep noni bu.>> 33 Nipou tirigi Elisa kes nihyet bigyo lene nibou ndig dima kwei krau bipai <<TUHAN bindei ba, mun di buhun bibor dini cut igkep nye! Nggon rino dibet dingon mem gima Noni yai nibou bingondut nye i?>>