Naaman kei hanyen
5
1 Ei nijam dima ne Naaman nok nibou pran mem tentara Siria. Nibou ndig mben Siria joi sut noni nindig bibor lewo TUHAN bindei ba, nide siceu nya yahagom icut bak tentara Siria tug hon Naaman di mimbri kui ningkek binok nibou pran di sindem bibor. Noro bras yem ningkek dip hagom. 2 Mpe di gom tirigi tentara Siria ikon pran bit mben Israel lene tentara Siria ikat mben Israel ibou poi bibuwak yok hanyen kwei ei minu Siria. Lene misop gom cem srig yokti apino Naaman nitnem yai misop dima nok awak di yai midyai ei nide ig. 3 Mpe di gom lene misop dima pai bak nide sop ndig <<Sindig e, handei kon ba, Andigpoi Naaman ug ngat nabi gom di bong ei Samaria. Nabi dima sindem mem gima bindei ba, Naaman miyai ningkek ngun eisi hanyen.>> 4 Tirigi Naaman miap nihyet dima lene noni ug ngat nibou ndig mben Siria bindat kep misop dima nipaisi hagom bak. 5 Lene nibou ndig pai <<Ma aug ngat nibou ndig mben Israel lene ando srat gom di dipas ei dini bak noni.>>Gima rino Naaman tin ei ba, pwoi mitiei perak nitig sribu ningot ningai kin mitiei mas nitig sribu muhwindagom kin sinsun di kei-kau nimig ninda simnai bimbut tut. 6 Srat di noni pwoi pima nibokti pai <<Tug hon srat dini ne dindo ditde nibou pran Naaman bak na di Andigpoi. Handei kon ba, na di Andigpoi abindei ba, Naaman yai ningkek ngun eisi hanyen leu bras di yem noni hak ug.>>
7 Lo bi lene tirigi nibou ndig mben Israel kwop srat bokti dima lene ningon buhun bibor birik nide sinsun nibou ndig leu api simbot dat <<Ayo! Nggon rino nibou ndig mben Siria kan bipia disindem mem gima dibindei ba, no dini miyai ningkek ngun eisi hanyen i? Noni kan bipia dani ne Allah rin ba, dibindei ba, tungwatu nya igyai niyaijo kin nimai e? Jo nibreisi bipia noni ba srat dini biwaisi da!>>
8 Tirigi munhyet dini tibim ei Nabi Elisa nitingou nsi lene noni sok nihyet bak nibou ndig bipai binoni <<Nggon rino na di Andigpoi angon buhun bibor i? Ma acuk no dima kwei ngat da leu api midindo brei binoni bipia nabi gom no rinaha ei minu Israel.>>
9 Lene Naaman jem nide kuda nya bibri nide kroba pran buug ei Nabi Elisa de biyati. 10 Leu api Elisa sok nihyet ei nide awak dip bak Naaman bipai <<Andigpoi e, ma aug kek Minyei Yordanti mbimuhwindacan leu api ayai angkek ngun eisi hanyen ug ri.>> 11 Tirigi Naaman miap nihyet rino ningon sibui sut Elisa nindig bibor bipai <<Dikan bigya nonti mikwei ya um da lene mingat nadi bak nide TUHAN Allah leu api su ninda gau dingkek dip di bras yem dini bibindei ba, diyai dingkek ngun eisi hanyen hak ug! 12 Minyei Abana kin Minyei Parpar ei Damsyik ne minyei di kei bibor kei dor njiriek minyei di biam ei minu Israel hagom! Gino dikek minyei dima yokti lene midiyai dingkek ngun eisi hanyen ri!>>
13 Yo di igya kui Naaman ibrim ingkek kep noni bipai <<Andigpoi e, gino nabi dima cuk na leu binhyepo abon mun di nggruk bibor lene nikan bipia abon igbit nipingok nati hak. Nggon rino akek minyeiti bit leu nok nicuk nati leu binhyepo ayai angkek ngun eisi hanyen bi i?>> 14 Gima rino noni ug ei Yordan nyai bitur nonti eisi mbimuhwindacan bit leu nok Elisa nicuk noti apino yai ningkek ngun eisi hanyen ba, ningkek dia kei dem kep nok munggwom pilei ngkek. 15 Lene noni kin yo di igya kui noni yahagom ingkwei hanyen ug ei Elisa de biyati bipai binoni <<Nogindini jo nibreisi mem da bipia mben Israel ide Allah Nongkom nok Allah di nijit. Andigpoi e, gino ace tut lene midikwas mun di kei ninyeng gom tut na.>>
16 Noro Elisa buhup <<Deheng bitug hon TUHAN di niyaijo di dikuk da bak bipia dima mun di kei ninyeng gom leu na di Andigpoi bi sren.>>
Mbro nok gino Naaman mpig bou kep Elisa lo, noni ce tut bi. 17 Gima rino Naaman pai binoni <<Mbro nok gino ace tut gima ama mun di kei hi bi lo, ma asindui sut da ba, ditig dihyei ei mpia dini biditan ei kron nyati nok gi dem mem mindhe bagal ningut can imbut tut ug ei ditimieisi. Lewo hon kep ammani kui lene midibui mindhe ba, midibon midut bak kwar di tungwatu nya ikuk yok bak bu bi noro bak TUHAN di nijit Nongkom he. 18 Dingon ya mem gima TUHAN mikos ser ditde sisar gino nibou ndig mben Siria suar da bidiya kui noni tirigi ngat nadi ei mben Siria ide kwar Rimon de mpia nibon midut nibousi.>>
19 Elisa buhup <<Aba angon di jo nyahan bimbut ug!>> Lene Naaman kes noni bimbut.
Tirigi noni mbut ba, jei bigyo lene, 20 Elisa de awak di Gehazi kan <<Nggon rino siceu sindui sut Naaman bimbut leu ba, go tut mindur dima bi i? Suar siceu ce tut ba, tug ndei mun di Naaman tin ei mem yai binoni pima. Nnaba seheng bitug hon TUHAN di niyaijo ninyeng bipia sidor bram Naaman leu binhyepo noni kwas mun di kei ninyeng gom tut sa.>> 21 Gima rino noni dor bram Naaman. Tirigi Naaman tou kep ninghim dip lene ngat lo, tungwagom dor kwei. Lene noni kinyon leu nide kroba pran biya um noni bihig ser Gehazi <<Ador bram da tut mun nyeng hi e?>>
22 Lene Gehazi buhup <<Andigpoi e, dijem ampon bina lewo Elisa sok nihyet ei da dip kwei bak na di Andigpoi tut nabi di pinai pilei nya ibou can leu nungug him Efraim sindi ittau kep nye. Gima rino nijoi sut na di Andigpoi ayai mitiei perak nitig sribu ningai kin sinsun di kei-kau nimig-ninda can bak nabi cin dima.>>
23 Lene Naaman mpig bou sut Gehazi bibuhup <<Nna ba midiyai mitiei perak nitig sribu muhwindagom binoni hak ug.>> Lene noni tan mitiei dima ei kron canti leu api yai sinsun di kei-kau nimig-ninda can bikum. Noni kes hagom ei nide awak ibou can indati leu binhyepo ittei pip Gehazi. 24 Tirigi Gehazi yoni ikwei krau nide ig ei nungug tou gom dima tu lene noni yai kron can dima leu yok bikon ug ei nide ig. Leu api kes Naaman de awak cin dima bingkwei hanyen. 25 Noni coi ug ei ig bei hanyen leu api Elisa hig ser noni <<Akwei leu sitou i?>>
Lene Gehazi buhup <<Andigpoi e, dimbut bi.>>
26 Noro Elisa srep <<Tirigi po no dima kinyon leu nide kroba pran biya um na lene dinnei ningat rin ei sirima. Njap di ammani bon nituti mem situg ndei mitiei kin sinsun kin biei zaitun nghousi kin ba anggur nghousi kin domba nya kin sapi nya kin awak nya bi. 27 Nogindini bras di yem Naaman ningkek dip pima miyem nani kin yo di intun nani him jahagom jingkek dip bijo ninno bijo kikau ug ri!>>
Hammi tirigi Gehazi hei leu ig bei rino bras dima yem ningkek dip bibindei ba, ningkek tiei kei.