Mben Israel kin mben Moab ikon pran bit yam
3
1 Tirigi Nibou Ndig Yosafat ninyeng tak kep timiei Yehuda nya mem nijam ari bingwam simnaimuhwidip brimigtehiningai tu lene Yoram di Ahab nipmot kui bigwam nok nibou ndig mem mben Israel biya luei nicig nohoti. Noni bong ei Samaria ba, ninyeng tak kep mben Israel kikau mem nijam ari bingwam simnaibrimigcan. 2 Noni bon sisar di kinei bibor tut TUHAN. Noro bon sisar dor njiriek sisar di nicig Ahab kin nipmem Izebel ibonti bi. Noni nggek kwar di nicig win mem bikuk no bak kwar Baal pima. 3 Mbro nok gima lo, noni yai bram Nibou Ndig Yerobeam di Nebat nipmot po ninyeng tak kep mben Israel nipou tirigi noni bigyo pima niyai kepti nya lene bindei ba, mben Israel cem ibon kep sisar ba, igikes hon bi.4 Ei nijam dima ne Mesa di nok nibou ndig mem mben Moab hyen kep nide domba nya. Noni ba domba pmot ningut sribu sratus gom kin ninta leu domba nikre ningut sribu sratus gom bigo belasten bak nibou ndig mben Israel bikwop ari bingwam kikau. 5 Noro tirigi Nibou Ndig Ahab mai leu su lene Mesa ham nimbuk kep mben Israel. 6 Gima rino Nibou Ndig Yoram bipbur bimbut leu Samaria ba, ug hig nide tentara nya yahagom kwei ba, injei siceu. 7 Lene sok nihyet bak Yosafat di nok nibou ndig mem timiei Yehuda nya bipai <<Nibou ndig mben Moab kiek nimig jou tut da. Gima rino akwei mpu da ba, sikon pran bit noni e?>>
Lene Nibou Ndig Yosafat buhup <<Kei! Midiya tut ditde tentara nya kin nimpung niba kuda bikon pran kan nya bininjei bit nani. 8 Nyeni injei kak puig di tou mem gima ihwen yok i?>>
Lene Yoram buhup <<Injei kak puig di bikwam iggum ndigsi Edom.>>
9 Gima rino Nibou Ndig Yoram njei sut nibou ndig timiei Yehuda nya kin nibou ndig mben Edom bimbut. Tirigi imbut imig kikau mem njap muhwindacan lene minyei su ngwig leu yok. Gima rino nimpung di injei bit yok nya kin ide mindhe di ibittei ide ndigban nya cem inggobiau bibor. 10 Yoram nso tut bipai <<Ayo! Buhun bibor mem nye! Lewo TUHAN kos tut binye bipia mikes nye di nibou ndig nibou ningai dini ei nibou ndig mben Moab nindati ug ri!>>
11 Lene Nibou Ndig Yosafat hig ser yok <<Nabi hi ningat rin srig ikieti nogindini mem gima hig ser TUHAN mem nye bi e?>>
Lene nibou tentara Yoram de gom buhup <<Elisa di Safat nipmot no rinaha. Nipou yo noni mpu kep Elia.>>
12 Nibou Ndig Yosafat pai <<Igbit ri! Ningat ne TUHAN mbrap tug hon nabi dima.>> Gi pai nok rino nibou ndig ibou ningai dima yuug ngat Elisa. 13 Tirigi ikwei ngat Elisa tu lene noni pai bak nibou ndig mem mben Israel <<Nggon rino akwei hara da leu binhyepo dimpu na i? Aug hara ade ndigpoi nya ide nabi pima yok leu binhyepo impu na hak ug.>>
Noro Yoram buhup <<Nok bi! Lewo TUHAN rino kos tut binye bipia mikes nyeni nibou ningai dini ei nibou ndig mben Moab nindati a.>>
14 Elisa buhup <<Dipai brei bije tug hon TUHAN di niyaijo di dijem diceu bit dima ninyeng bipia gino Nibou Ndig Yosafat di dikon ninyeng ningat rin bit je bi lene midipriet kin na di Andigpoi ade mun di buhun dima cem bi. 15 Nogindini anggok no di kek nggong mbrei igkei gom bibuwak noni kwei bida.>>
Ibuwak no dima kwei lene ninda jo kep nggong mbrei bikek leu api TUHAN Ninnei yai nisindemti bak Elisa, 16 bibindei ba, Elisa tri tut TUHAN nihyet <<Ma jitig got nya ei mbang trimpoi dini. 17 Mbro nok gino jigingat biget di but kin hou nimig kui jeti cem bi lo, minyei yaisi nya muut bipias hagau ei mbang trimpoi dini ug ri. Ba, minyei dima midem mem je di tungwatu kin jide mindhe-ndhe nimuhup tu nya kin mindhe-ndhe di jibittei ndigban jide nya cem hagom ba, jidut bindei jinggobiausi.>> 18 Pai nok leu api noni binut nihyet bu <<Noro mem TUHAN ne niyai munti dima nggruk bi. Noni misindem tut je leu binhyepo jibindei timek tentara Moab nya cem. 19 Leu api mijinggek ide minu ndig di kei-kau di bon ngug tig di bikrop ttai nya hagom sinsiou ba, mijiwim biei di ngat ningat ninjem nya hagom lene mijiji kep ide minyei bousi nya cem mijinjei tig mang bibor biyem pia kep ide miai di nnum kei di njita joti nya nisurti-nipekti cem ba, hagom kinei-kinau ug ri.>>
20 Njap di hyep bu tirigi jam dem mem imam nya ibon midut ei nimbar hum dokti mem njap bigyoti lene minyei biam kwei leu minu Edom bibiyam kak mbang trimpoi pima ba, niyaisi ut bipias hagau.
21 Tirigi timiei Moab imiap tut bipia nibou ndig ibou ningai pima ikwei su ba, itin ei mem gima ihwen yok lene bikwop pinai pilei nya kikau ug bipek andigpoi nya di isindem mem gima ikrau minggwen ei indati nya yahagom yohom nyahan ba, idis yam bigya ser ide minu niya kwas yamti. 22 Njapti kui tirigi ikiju mem njap tekti lene mpia yaisi pri bicom ndei minyei pima ningwa dip apino yo dima ingat lo, minyei ngwoi-ngwau binoyam kin tungwatu nggrom. 23 Lene yahara tut <<Jikwei ngat tungwatu nggrom rimo! Jo nibreisi bipia siceu nimpung ningai pima yonti ihwen yam ba, igyai nimai biyam tu! Gima rino jikwei ba, yuug cat ndigban ei ide prak meng yati.>>
24 Noro tirigi tentara Moab ikwei krau prak meng yati dima rino tentara Israel ikiju bihwen yok bibindei ba, isu jou leu yok lene tentara Israel igyon igkep yok kikau ba, ibiyai nimai biyok. 25 Inggek ide minu ndig nya cem. Bikwop miai di nnum kei di njita joti di imbut eisi nya lene icom tig biyem pia kep miai dima. Apino tig dima yem mpia ser ide miai nya hagom. Tentara Israel iji kep ide minyei bousi nya cem hagom. Lene inda jo kep biei di ngat ningat ninjem hagom biwim ningwig a. Gi ndi jo rino mben Moab ide minu ndig nibousi di Kir-Hareset he. Lene tentara Israel igyon ttai minu ndig dima cem ba, gi hi di iba bikumsikik biprindei tig kan ikinyon ei niba tig biprindei tentara Moabti.
26 Tirigi Mesa di nok nibou ndig mem mben Moab ngat lo, dem mem gima ya ngkiem bu bi lene buwak nide tentara di ikrau simeda kan ibou sratus muhwindacan ba, bingon mem gima hwen siceu leu bibou nang sin tentara nibou ndig mem mben Edom bikwat biningwes ngun noro ningon kanti dima pek kep bi. 27 Gima rino noni sujou ba, kat nipmot mighumbou di mikui bigwam nok nibou ndig biya luei nohoti lene bui noni nok mikwau bindig kep hum ei ngug tig ninjek dip noyam kin nibon midut nindig mindhe ei nimbar hum dokti mem bikuk no bak ide kwar di ikuk yok bak. Apino niyai munti dima bindei ba, tentara Israel ingon nde bibora leu api ibrim ide nimpung tentara nya biyom yo leu minu ndig dima bingkwei hanyen ug ei itimieisi.