TUHAN kon Elia ug ei gwamti
2
1 Mpe dima lene tto bou dem mem TUHAN ba hou di sibui-sibui nyen bikon Elia ug ei gwamti tirigi noni kin Elisa ijo leu Gilgal. 2 Yoni yuug ei puig sinon lene Elia kuk Elisa bipai binoni <<Ma agwam nyahan ei mpia dini mem nituti poi lewo TUHAN cuk da ba, duug ei minu ndig Betel ug ri.>>Noro Elisa buhup <<E bi! Deheng bitug hon dingon di gom tut TUHAN di niyaijo cem bitug hon dingon di gom tut nani cem bidipai bipia midikes nani bihigom ei bi sren.>> Gima rino yahacem ikak puig kikau ug ei minu ndig Betel.
3 Nabi nya nimpung gom di ibong ei mpia dima ikwei ngat Elisa bihig ser noni <<Akan tut bipia TUHAN mikon ade andigpoi hak leu na mem njap di ammani e?>>
Lene Elisa buhup <<I, dikan tut tu. Noro ma nyeni isimbot kep biyam tut gima au.>>
4 Elia kuk Elisa bipai binoni <<Ma agwam nyahan ei mpia dini mem nituti poi lewo TUHAN cuk da ba, duug ei minu ndig Yerikho ug ri.>>
Noro Elisa buhup <<E bi! Deheng bitug hon dingon di gom tut TUHAN di niyaijo cem bitug hon dingon di gom tut nani cem bipai bipia midikes na bihigom ei bi sren.>> Gima rino yahacem ikak puig kikau ug ei minu ndig Yerikho.
5 Nabi nya nimpung gom di ibong ei mpia dima ikwei ngat Elisa bihig ser noni <<Akan tut bipia Allah mikon ade andigpoi hak leu na mem njap di ammani e?>>
Lene Elisa buhup <<I, dikan tut tu. Noro ma nyeni isimbot kep biyam tut gima au.>>
6 Elia kuk Elisa bipai binoni <<Ma agwam nyahan ei mpia dini mem nituti poi lewo TUHAN cuk da ba, duug ei Minyei Yordan ug ri.>>
Noro Elisa buhup <<E bi! Deheng bitug hon dingon di gom tut TUHAN di niyaijo bibitug hon dingon di gom tut nani cem bipia midikes na ei kan bi sren.>> Gima rino yahacem ikak puig kikau ba, 7 nabi nya ibou ningot muhwi yehei sut yok kikau ug ei Minyei Yordan. Lene Elia kin Elisa ikwei ya ei minyei nintig dip lo, nabi ibou ningot muhwi pima igya ter. 8 Lene Elia juk nide ban binjui kok yam leu api ba ban dima bibui minyei ningwa dip bibindei ba, minyei bitun hacan leu yam leu api noni kin Elisa imbut ei minyei nipingge leusi biyuug ei nite dima ug.
9 Yuug krau su lene Elia hig ser Elisa <<Ma ahara da tut mun nyeng hi bit leu angon kanti nipou tirigi TUHAN kon da bidipror leu na bigyo!>>
Lene Elisa buhup <<Asindui sut ba, diba dakep ade nisindemti ndrim hi leu binhyepo diya luei ahoti bu.>>
10 Elia pai binoni <<Ui! Gima nggruk bibor. Gino angat da bou ayai him tirigi TUHAN kon da leu na lene aba nakep nisindemti dima ug. Ne gino angat da bou ayai him bi lene aba nakep mun nyeng hi bi.>>
11 Yahacem imbrap bit yam kak puig dima. Lene kuda nya di ikri kroba pran gom tau kros ei ikieti lo, kuda kin kroba dima dem kep nok hum di ninjeng srei. Lene TUHAN ba hou di sibui-sibui nyen bikon Elia ug ei gwamti. 12 Elisa ngat gima yok hagom bou niyai him. Gima rino noni hara Elia bipai <<Arig e, Arig e, na di anyohou nye di mben Israel sindem bibor e, apror leu da tu!>> Hon kep njap dima kui lene Elisa ngat noni bou niyai him bu bi sren.
Gima rino ningon ngguk bram Elia ba, rik nide sinsun ninda jei hacan. 13 Noni ug yai Elia de sinsun ninda jei di cut ei dihyeisi leu api ngkwei hanyen tut ug ei Minyei Yordan biya minyei nintig dip. 14 Lene noni ba Elia de ban bibui minyei ngwa dip bipai <<Elia de TUHAN Allah No ritou i?>> Lene ba ban dima bibui minyei ngwa dip mbigom kin bu bibindei ba, minyei bitun hacan leu yam leu api noni mbut ei minyei nipingge leusi buug ei nite dima ug. 15 Tirigi nabi ibou ningot muhwi leu minu ndig Yerikho ingat gima bou igyai him tu lene igyai nillei bipai biyam <<Elisa ba nokep Elia de nisindemti tu!>> Lene ikwei um noni bikuk yok ei nimig him. 16 Bipai binoni <<Nyeni nibou ningot muhwi nahagom nimbut sindem. Ma asindui sut nye ba, ninggok-nggok nyen ser ade andigpoi e? Mpaba TUHAN Ninnei buwak noni ug ei mbigdip gom e, he ug ei mbang briep gom bikes noni ei mpia dima tu e?>>
Noro Elisa buhup <<E bi! Jinggok ser noni au.>>
17 Noro nabi nya impig bou kep ingon kanti dima. Gima rino Elisa ce. Yahagom ibou ningot muhwi imbut-mbut nyen bidem hantou-hantou mem mmun-njap ningai noro ingat Elia ningat bi. 18 Tirigi ikwei tau kep Elisa di gwam ei minu ndig Yerikho hanyen lene noni pai biyok <<Gi po disrep tut jingon kanti pima ne igbit bi e?>>
Elisa bon mindur nya
19 Mpe dima lene andigpoi timiei minu ndig Yerikho ibou poi ikwei ngat Elisa bipai binoni <<Andigpoi e, akan tut bipia nyende minu dini kei bibor kei noro minyei bousi kinei bibindei ba, sop di inghop tu inggrom ndak ki.>>
20 Lene Elisa buhup <<Ma jinden nsim poi mien ei mok di nijep-jauti kwei bida.>> Lene igyai hagom bit leu nicuk yoti. 21 Noni ug ei minyei bousi pima bicom nsim ug ei minyeiti bisimbot dat <<TUHAN pai sut minyei dini <Dani dibindei minyei dini kwes-kwau hanyen apino mibindei ba, tungwatu imai bi lene inggrom ndak cem ki bu bi.> >> 22 Hon kep njap dima kui lene minyei dima kwes-kwau bit leu nok Elisa nipaisi nya.
23 Tirigi Elisa jo leu minu ndig Yerikho buug ei minu ndig Betel lene munggwom pinai nya nimpung gom yehei leu minu ndig gom ei puig sinon lene iba Elisa bikek. Yoni isrep huk noni <<He na di abou le e, na di abou le e, ma aug leu mpia dini hak ug!>>
24 Elisa kiek no bipri niyai kep yok leu api sigion yok tug hon TUHAN ninyeng. Nok rino mindhe beruang niwek ningut can tau kwei leu bigbehei dima baham-ham nyen munggwom dima yok lene bindei ba, ibou ningot bitai ba, can imai hak ug.
25 Lene Elisa mbut kikau ug ei Nungug Karmel leu api ngkwei hanyen ug ei Samaria.