Mben Israel nya di ibong bei mpia nijjai yaham imbuk kep Rehabeam
(2Taw. 10:1-19)
12
1 Lene Rehabeam ug ei Sikhem lewo mben Israel di ibong bei mpia nijjai yahagom induk yam ei mpia dima leu binhyepo ita noni nok nibou ndig. 2 Tirigi Nebat nipmot Yerobeam di nang leu Salomo buug ei minu Mesir pima miap tut Rehabeam ninghapti lene noni ngkwei hanyen kwei leu minu Mesir. 3 Lene keret di ibong bei mpia nijjai yahagom ihig Yerobeam kwei ngat yok leu api noni ya tut yok tirigi yuug ngat Rehabeam bipai binoni, 4 <<Andigpoi e, acig Salomo kes mun di buhun ei nyeni ninghat dip. Nogindini gino na di Andigpoi abindei ba, mun di noni kes ei nyeni ninghat dip dima wer nggan bibindei ba, nyeni ninghuisi wei bu bi lene miningon gom tut na.>>5 Lene noni buhup <<Ma jigwam njap ningai bu bibou dikan-kan nyen tut ug e, leu api jikwei ngat da ba, midibuhup jihyet.>> Lene yo dima ikes noni ei bimbut leu.
6 Nibou Ndig Rehabeam ug mbrap bit andig-ndau nya di ipingok nicig Salomo ningonti bihig ser yok <<Notou midibuhup yo dima ighyet i? Jipai igbit jingon kanti bida.>>
7 Lene ibuhup <<Gino na di Andigpoi ajoi sut anyeng tak kep yok kin angon di gom lene ma ace tut ingon kanti dima. Gi nok lene ingon gom tut na di Andigpoi kikau.>>
8 Noro Rehabeam sindui sut ide nipingok noti leu api ug mbrap bit nisut pinai pilei di igya kui noni nya bipingok ningonti. 9 Lene noni hig ser yok <<Notou midibuhup yo di ijoi sut dibindei ba, mun di dicig kes ei inghat dip dima wer nggan bu leu yok dima ighyet i?>>
10 Lene ibuhup <<Ma abuhup ighyet nok gini <Mbro nok gino dinghuisi mbriong lo, dinghuisi no sindem dor njiriek dicig yo!>j 11 Lene ma abinut bu <Dicig kes mun di buhun ei jinghat dip noro midikum ei mun di buhun bibor dimati bu. Noni ba na mbrei ngkek nitu bimbas je noro midiba na mbrei ngkek di bon nikwai ngkimom bimbas je bu!> >>
12 Njap ningai bu ne Yerobeam kin nide limwa nya yahagom induk yam hanyen kwei bit leu nok Rehabeam nicuk yoti. 13 Lene Nibou Ndig Rehabeam ningkek ndok tut andigpoi pima yok ide nipingok noti leu api ba nihyet di singga bibuhup nide limwa nya ighyet, 14 bit leu nok pinai pilei pima yok ide nipingok noti bipai biyok <<Dicig kes mun di buhun ei jinghat dip noro midikum ei mun di buhun bibor dimati bu ug ri. Noni ba na mbrei ngkek nitu bimbas je noro midiba na mbrei ngkek di bon nikwai ngkimom bimbas je bu!>> 15 Rehabeam ba ningha bak nide limwa nya ighyet. Noro gima ne TUHAN ningon kanti mem no leu binhyepo nihyet di TUHAN sok ei Nabi Ahia leu Silo dip tut Yerobeam di Nebat nipmot pima hagom midem igbit.
16 Tirigi Rehabeam de limwa nya imiap tut bipia noni buhup ighyet bit leu ingon kanti bi lene iba ighyet nindig bibor hara <<Nikou sut Daud kin yo di intun noni him o! Ingondut nye nipou kikau kwei bipek ammani kep bi sren o! Je di mben Israel e, jikwei ba, imbut ri o! Nnaba Rehabeam mibiang niyai munti nibuhunti hak ug o!>>
Gima rino mben Israel ingkwei hanyen ug ei itimieisi. 17 Rehabeam ninyeng tak kep nide limwa di ibong ei minu Yehuda nya he. 18 Lene noni cuk Adoniram di nok mindor mem nibou ndig de awak nya di igyai midyai nibidip hukti pima bipi bibakei yokti noro iba tig biyai nimai bak. Tirigi Rehabeam miap tut Adoniram nimaisi rino noni bipbur bibri nide kroba pran biningwes ngun ba, ngkwei hanyen ug ei minu ndig Yerusalem. 19 Hon kep njap dima kui lene mben Israel di ibong bei mpia nijjai yahagom ikiek imig jou tut nibou ndig nya di intun Daud him.
20 Tirigi mben Israel imiap tut bipia Yerobeam kwei hanyen leu minu Mesir tu lene ihig noni kwei gwam bit yok tirigi imbus yam ei gomti leu api ita noni nok ide nibou ndig. Keret Yehuda nya nongkom he rino ingon gom tut Daud de nintun him yamti di bram yam nya.
Semaya ba Allah nihyet bisok kep nibou ndig Rehabeam
(2Taw. 11:1-4)
21 Tirigi Rehabeam ngkwei hanyen ug ei minu ndig Yerusalem tu lene noni nduk nide tentara di mimbri kui ingkek ibou sribu sratus gom ningot muhwindaningai leu Yehuda kin Benyamin ninyeng tak kepti kwei. Noni kos tut bipia mikon pran bit keret mben Israel di ibong bei mpia nijjai leu binhyepo ninyeng tak kep yok hanyen bu. 22 Noro Allah sok nihyet ei Nabi Semaya dip, 23 bak Rehabeam kin nide limwa di timiei Yehuda kin Benyamin yahagom bipai biyok, 24 <<Ma jikon pran bit jide bat mben Israel au. Suar jahagom jingkwei hanyen ug ei jitimieisi hak ug. Mun di pek kep dima bit leu Da di TUHAN dingon kanti ri.>> Gima rino yahagom ibit TUHAN nisok kep yokti bingkwei hanyen ug ei itimieisi.
Yerobeam kes TUHAN ei
25 Niabiati ita Yerobeam nok nibou ndig mem mben Israel lene noni bindei ba, minu ndig Sikhem di jo ei nungug him hanjop Efraim bon tentara nibousi di igya coi nya apino noni bong ei minu ndig dima mem nituti poi. Lene noni ug bu bibong ei minu ndig Pnuel lene bindei ba, minu ndig dima cem bon tentara nibousi di igya coi. 26 Lene noni kan <<Gino sibon mun nyeng hi bi lene misitug ndei mun dibuhun. 27 Lewo side limwa nya minduk yam ug ei minu ndig Yerusalem leu binhyepo ibon midut bak TUHAN ei Nide Ig lene mbigom yoni miba ingon com Nibou Ndig Rehabeam ei minu Yehuda hanyen bu leu api migyai nimai bisa.>>
28 Niabiati noni kan-kan nyen tut tu lene noni ba mas bibon nung di nok sapi nikre ningut can lene pai bak nide limwa nya <<Je di mben Israel e, jingkwei-ngkwei nyen ug ei minu ndig Yerusalem mem gima jikuk je bak TUHAN ei mpia dima wer ninno tu. Tini bu ne ma jikwei ngat jide nung di ibuwak je kwei leu minu Mesir pima rini.>> 29 Lene noni ta sapi nikre di ba mas bibon ningut gom ei minu ndig Betel lene ningut gom bu ei Dan. 30 Gima rino nide limwa nya ibon sisar tut Allah tirigi ikuk yok bak kwar dima ei minu ndig Betel kin Dan cem. 31 Yerobeam ngot ig nikuk no bak kwar eisi nya ei mbigdip nya leu api dimig yo di ugwai-gwai di intun Lewi him bi nya bita yok nok imam nya bu.
TUHAN mbriom yo di ikuk yok bak Noni ei minu ndig Betel
32 Lene noni kinyon ei nibon midut kep njap ndig gom ei njap gi nisimnaimuhwidip mem bed gi nimuhwindaningai di noyam kin timiei Yehuda ide njap ndig. Lene noni bon midut nindig mindhe titut kep humti ba, bikuk no bak sapi nikre di noni ba mas bibon pima. Lene noni ta imam di noni dimig ei su nya ei ig nikuk no bak kwar eisi nya di noni ngot ei minu ndig Betel.
33 Tirigi tto bou pima dem tu lene noni ug ei minu ndig Betel bibon midut nibiyok ngon kep njap ndig di noni kinyon eisi pima ei nimbar hum dokti mem mben Israel.