3
1 Tentara nya di iba ingon com Saul kin nide bat nya kin tentara nya di iba ingon com Daud ikon pran bit yam kikau mem nijam di jei bibor. Daud de nisindemti kum eisi bu kikau noro nide siceu di ikon pran bit noni ide nisindemti cut bu.Daud nipmot bat nya
2 Daud nipmot bat di nitnem bat nya isrek tut yok ei Hebron nya inyeng rini jug bit leu ide nisrek tut yokti sindam. Amnon di nipmem rino Ahinoam leu Yizreel. 3 Kileab di nipmem rino Abigail leu Karmel di nijjep Nabal mai leu pima. Absalom di nipmem rino Maakha di Nibou Ndig Talmai leu Gesur nipmisop.
4 Adonia di nipmem rino Hagit. Sefaca di nipmem rino Abital.
5 Yitream di nipmem rino Egla.
Ipmem bat nya isrek tut munggwom pinai ibou muhwindagom dima ei Hebron.
Abner tti kin Daud
6 Tirigi tentara di itti kin Daud kin tentara di ingon gom tut Saul nide bat nya ikon pran bit yam bijo kikau lene Abner nggok puig leu binhyepo kum ei nide nisindemti ei tentara di ingon gom tut Saul niyai him.
7 Mpe dima lene Saul nitnem ndrim hi ninyeng rino Rizpa. Noni ne Aya nipmisop ri. Mpe di gom lene Saul nipmot Isyboset pai kep Abner <<Nggon rino ayem njita tut dicig nitnem ndrim i?>> 8 Leu api Abner gga bibor bipai <<Na di Andigpoi e, akan bipia diyai mun kinei sut Saul biditti kin keret Yehuda e? Diba dingon di gom biyai mun tut na di Andigpoi acig Saul kin nide adig-ajoi nya kin nisut bat nya yahagom leu nimbie him kwei bipek ammani kep. Lene dimpu na di Andigpoi cem apino Daud bindei timek na bi a. Mbro nok gima lo, abindei bidinyeng kinei drek dip sop he! 9-10 Nna ba dimpu Daud lewo TUHAN preu ei mem noni bipia mipos Saul ninyeng tak kepti leu noni kin nide nintun him di bram yamti nya leu api mikon Daud binok Nibou Ndig di ninyeng mitak kep mben Israel kin keret Yehuda titut yam. Handei kon ba, TUHAN yai nimai bida hak gino dingkwei Saul ninyeng tak kepti dini hanyen bak Daud dem igbit TUHAN nipreu ei mem Daudti dima bi a!>> 11 Gi mbun Isyboset buhup Abner nihyet gom kan bi lewo ttin tut Abner bibor.
12 Leu api Abner sok nihyet ei tungwatu ibou poi dip bak Daud di ningat rin ei Hebron.b Tirigi yuug ngat Daud lene ipai Abner nihyet dini bak <<Tou rima ninyeng tak kep dihyei nisurti-nipekti dini i? Nna ba sibon gi preu bit yam leu api dimpu na di Andigpoi bidibindei ba, mben Israel yahagom itti kin na di Andigpoi a.>> 13 Lene Daud buhup <<Kei bibor! Disok dihyet ei je dip bak Abner bidipai dijoi sut sibon gi preu bit yam tug hon nisinati gom ngat. Tirigi akwei ya ei doho bei lene ma abuwak Saul nipmisop Mikhal kwei hanyen bida.>> 14 Nok gima cem sok nihyet bak Isyboset bipai <<Andigpoi e, ma angkwei ditnem Mikhal hanyen kwei bida. Lewo diba mben Filistin ingkek kulup nimangti sratus gom bipek noni tu.>> 15 Leu api Isyboset cuk tentara nya ibou poi ba, ipos Mikhal leu nijjep Paltiel di Lais nipmot kwei. 16 Noro Paltiel ya abia kep Mikhal lene pim bram cem. Tirigi ikwei krau minu ndig Bahurim lene Abner cuk Mikhal nijjep dima <<Cobi! Angkwei hanyen hak ug!>> Pai nok lene Paltiel ngkwei hanyen.
17 Nituti dima lene Abner mbrap bit nibou mben Israel bipai biyok <<Jingon wer ya mem gima Daud nok jide nibou ndig ninno tu. 18 Ba, gini ne nituti di kei bibor mem jeni ri. Ma jiyok ngon kep bipia TUHAN preu ei mem Daud bipia Noni miba Daud biteu Nide limwa mben Israel leu mben Filistin kin siceu nindigsi nya inda nsi.>> 19 Lene Abner mbrap bit keret Benyamin cem leu lene ug ei Hebron bipai sut mun di keret Benyamin kin limwa Israel nindigsi nya ice tut yam tu dima bak Daud.
20 Tirigi Abner ya tut nide tentara nya ibou nyatungwagom biyuug ngat Daud ei Hebron lene Daud bon pesta mem yok. 21 Gima leu lene Abner pai ningon kanti bak Daud <<Na di Andigpoi e, ma ayai nituti bida ba, duug nduk mben Israel hagom kwei ba, iba ingon com ditde Nibou Ndig di nani leu binhyepo yahagom ibicom yam bit na di Andigpoi a. Yoni mikon na di Andigpoi nok nibou ndig ba, na di Andigpoi mporo anyeng tak kep minu dini titut yam dem igbit na di Andigpoi angon kanti.>> Lene Daud ce tut Abner ningon kanti dima bipreu ei mem noni bipia micuon niyaisi bitri tut nihyet ser nhyema hi yai nimai bak Abner bi.
Yoab yai nimai bak Abner
22 Abner nya imbut leu api Yoab ya tut Daud de tentara nindigsi nya bingkwei hanyen leu yuug kon pranti di ittei ndigban nindig bibor di ipos nya ba, ikwei krau sut. 23 Lene bihi ipai bak Yoab bipia Abner kwei ngat Daud lene Daud sindui sut noni bingkwei hanyen ba, cuon niyaisi bisok nihyet ser nhyema hi yai nimai bak bi. 24 Yoab miap tut gima lene ug ngat nibou ndig bipai bak <<Ayai mun notou rigima i? Nggon rino asindui sut Abner ug hak nok gima i? 25 Noni kwei ris Na di Nibou Ndig he. Nok gima cem kwei mem gima yok nitta kep Na di Nibou Ndig ayaisi nya kin angon kanti kin ade nikos tutti nya hagom. Gini hagom jo nibreisi mem Na di Nibou Ndig bi e?>>
26 Yoab ngkwei leu ningat Daudti tu lene cuk tentara nya bijem Abner hanyen kwei. Yo di Yoab cuk yok dima ijjop Abner kikau ba, yuug hatap dideu minyei bousi Sira. Leu api ibuwak hanyen kwei. Noro Daud kan tut bi. 27 Abner ngkwei hanyen bikwei krau Hebron tu lene Yoab bipbur bipai bak noni bipia yahacem igya ter dideu dimbou pmem leu binhyepo mbot kep mimun bak. Leu api Yoab dat Abner ninghopti kros ba, tti bimai hak. Yoab ningon nggrom kep Abner biyai nimai bak drek dip nikinjoi Asael po Abner yai nimai bak pima ri. 28 Tirigi Daud miap tu lene tri tut <<Dani kin ditde limwa nya ningon mui sut Abner nimaisi dima ei TUHAN Noho bei bi sren. 29 Nnaba, Yoab bitut nide bat nya yahagom mibiang nibuhunti drek dip igyai munti di kinei dima. Nnaba tungwagom leu Yoab de nintun him di bram yam nya tug ndei ninggwen di buhun bibor di yem ningkek dip ug e, he pinai nya inghuisi jet-jop ug e, he bihi mai ei pranti ug e, he bihi njita dem mem noni bi ug e, nok gima sindam bijo ninno.>>
30 Gima ne nipui mun tut Yoab Abisai nya di ingon nggrom kep Abner ba, ibuhup bak drek dip gi po yai nimai bak ikinjoi Asael ei pranti ei Gibeon pima ri.
Itig Abner ningut
31 Leu api Daud cuk Yoab kin nide tentara nya leu binhyepo irik ide sinsun bitun-ta lene ijuk sinsun kron di bindo tut ingon di ngguk bipim nggruet tut Abner. Mpe dino iba brua bittei Abner ningut mem gima itig lene Nibou Ndig Daud nonti ya abia kep yok. 32 Itig Abner ningut ei Hebron lene nibou ndig kin limwa nya yahagom ipim kui jei ei nimai nijui dip dima. 33 Gima leu lene Daud pim bikiek Abner bipai,
34 <<Nggon rino Abner mai nok no di ham nimbuk kep nibou ndig di ingot nimig-ninda bi i?>> Leu api limwa nya yahagom ipim nggruet bibor tut Abner nimaisi.
35 Njap jei dima lene ipi bibiwin kep Daud ningonti leu binhyepo yem njita poi mien. Noro noni ba neheng bipai <<Gino diyem njita nipou tirigi mpia cutti bigyo lene handei kon ba, Allah yai nimai bida hak ug.>> 36 Tirigi limwa nya imiap tut Nibou Ndig Daud nibuhupti bingat niyai munti dima lene gima biyai ingon nggan. 37 Njap dima ne jo nibreisi mem Daud de limwa nya yahagom kin mben Israel titut yam bipia nibou ndig srig niyai nimai bak Abnerti dima bi. 38 Lene nibou ndig pai bak yo di injei bit noni <<Ma jiyok ngon kep bipia njap di ammani nibou ndig di ninyeng jei ei Israel gom tti bimai. 39 Mbro nok gino dani ne nibou ndig di Allah dimig ei su rin lo, nogindini dinghuisi jet. Zeruya nipmot bat dima yok iten-pos bibor. Bit bon doom kep yok kan bi. Nnaba TUHAN bindei ba, yo di yaham imbuk kep nibou ndig dima ibiang igyai munti dima nibuhunti hak ug!>>