Keret Yehuda ita Daud nok ide nibou ndig
2
1 Gima hagom ngwig lene Daud hig ser TUHAN <<Ace tut ba, duug bong ei minu ttou nsi gom ei Yehuda bidibon danti nok nibou pran mem yok e?>>Leu api TUHAN ce bipai <<I, ambut ug.>>
Lene Daud hig ser noni <<Minu gi tou i?>>
Leu api TUHAN buhup <<Aug ei Hebron.>> 2 Gima rino Daud buwak nitnem cin di Ahinoam sop timiei Yizreel kin Abigail sop timiei Karmel di kibom po nijjep Nabal mai leu pima. 3 Lene noni buwak yo di igya kui noni kin ide bat nya yahagom ba, ibong bidem minu mien di gahai Hebron hagom. 4 Lene keret Yehuda nya induk yam kwei ei Hebron leu api ita Daud nok nibou ndig mem yok.
Mpe dima lene noni miap tut mben Yabesh ei Gilead itig Saul ningut. 5 Gima rino noni sok nihyet bak yo dima bipai biyok <<Handei kon ba, TUHAN minjei mun di kei bak jeni drek dip gi po jindo jingon di gom tut jide nibou ndig tug hon gi jitig ningut pima. 6 Handei kon ba, TUHAN singat tut je ba, ningon gom tut je. Lene dani cem midibibon je nok gi kei drek dip jiyai munti dima. 7 Suar jingon ngkiem ba, mimbri kui jingkek! Jide nibou ndig Saul mai leu je tu lo, keret Yehuda ita da bidinok nibou ndig mem yok tu.>>
Ikon Isyboset nok nibou ndig mem mben Israel
8 Abner di Ner nipmot pima ne Saul de nibou pran rin ba, noni nang tut Saul nipmot Isyboset ba, isigon Minyei Yordan biyuug dihip ei nite hi kikau ug ei Mahanaim. 9 Yuug ei sirima lene Abner kon Isyboset binok nibou ndig di ninyeng tak kep hanjop Gilead kin hanjop Asyuria kin hanjop Yizreel kin hanjop Efraim kin hanjop Benyamin nisurti-nipekti hagom. Ningat ne Isyboset ninyeng tak kep mben Israel titut yam. 10 Mpe di ikon Isyboset binok nibou ndig di ninyeng tak kep Israel pima ne nide njap ug ei ari bingwam ningot bitai lene ninyeng tak kep mben Israel mem nijam ari bingwam can.
Noro keret Yehuda iba ingon di gom bitti kin Daud. 11 Noni bong ei Hebron lene ninyeng tak kep keret Yehuda mem nijam ari bingwam muhwindacan.
Mben Israel kin keret Yehuda ikon pran bit yam
12 Mpe di gom bu ne Abner jo leu Mahanaim buug ei Gibeon lene nibou nya di igya kui Isyboset cem ibit. 13 Mpe dima cem Yoab (di nipmem ninyeng Zeruya) ya tut nibou nya di igya kui Daud ba, injei ndam minu ndig Hebron. Nimpung can di itin ei mem gima ihwen yam dima iba yoho rok yam ei igpong Gibeon. Abner ya tut nide nimpung ba, igwam nite dini ug lo, Yoab ya tut nide nimpung ba, igwam nite dima kwei. 14 Leu api Abner pai ningon kanti bak Yoab <<Yo, sidimig side tentara nya ibou poi ei leu binhyepo ibingon yam.>>
Lene Yoab buhup <<Dice tut angon kanti dima.>>
15 Lene ibou simnaibrimigcan di intun keret Benyamin him ikiju bigya gau Isyboset lene Daud de tungwatu nya ibou simnaibrimigcan cem ikiju bigya. 16 Siceu dima yok ibrim yam bou lene ibidat yam nghopti apino yahagom imai sur yam. Gima rino ijem gumihyep ei Gibeon dima ninyeng <Ngoi Dum Simeda.>
17 Gima leu lene ikon pran bit yam bibor he leu api tentara Daud ibindei timek Abner kin tentara Israel nya. 18 Zeruya nipmot bat ibou ningai di Yoab kin Abisai kin Asael ingat rin ei sirima. Asael nidorti dem kep rusa nidorti. 19 Gima rino noni huk bram Abner biyok no kep kikau. 20 Lene Abner kiek no kep ninghim dip bihig ser <<Asael, nani rin e?>>
Lene Asael buhup <<I, dani ri.>>
21 Lene Abner pai bak <<Ayon igkep dani au! Noro ma akat tentara dima yok igom ba, apos nide minggwen leu nindati.>> Noro Asael yo no kep Abner kikau ba, gi ngkwei hanyen leu nuhuk bram Abnerti bi. 22 Lene Abner pai mbigom kin bu <<Ayon igkep dani au! Leu ma dingon cun ba, midiyai nimai binani. Gi nok lene notou mem gima dibuhup hanyen tirigi duum akindig Yoab bidiya noho bei i?>> 23 Tirigi Asael kes hon bingkwei hanyen bi ba, yo no kep kikau lene Abner ba micim bidat bei ninghim dip lene micim ndei Asael ninghopti ba, ug kus ninghim nu kwei apino Asael tti bimai hak ei mpia dima. Tirigi tentara nindigsi ikwei ei Asael nitti eisi dima lene igya hon mpia dima.
24 Noro Yoab kin Abisai yuhuk bram Abner kikau. Tirigi mpia cutti lene yuug krau Mbigdip Ama ei Giah ei nite bei mpia nipriti di jo simin puig di ug ei iggum ndigsi Gibeon. 25 Yo di intun keret Benyamin him ibicom yam bit Abner hanyen bu ei sirima lene idimig ide siceu ba, idis yam nok nipuig gom ei mbigdip gom. 26 Lene Abner ya tirima bijem bak Yoab <<Suar sikon pran bit yam bijo kikau e? Akan bipia pran dini biang ningon di mpo tut yam bi e? Nye dini ne ade bat nya rin ba, yahagom intun mben gom ngat him. Aom angon tut ba, apig bu api apai ser ade tentara nya leu binhyepo ikes hon leu ba, yuhuk nye kui jei bi i?>>
27 Lene Yoab buhup a <<Deheng bitug hon Allah di niyiajo ninyeng bipia gino ahara ser da bi lene ditde tentara nya migyon igkep je kikau ug bipek njap tekti di hyep bu.>> 28 Leu api Yoab miep pun mbrei gom bitto nide tentara nya leu binhyepo ikes hon niyon igkep mben Israel leu api pran dima ntus.
29 Abner ya tut nide tentara nya ba, injei bram yam kak Mbang Briep Yordan mmun jei dima kikau leu api isigon Minyei Yordan biyuug dihip ei nite hi bimbut kikau njap jei di hyep bu leu api yuug krau Mahanaim.
30 Tirigi Yoab kes hon niyon igkep Abner kui jeisi leu su lene nduk nide tentara nya bidem yam ei lene ngat lo, Daud nide tentara nya ibou simnaimuhwidip brimigtehibitai imai ba, gima ter leu Asael. 31 Daud de tentara nya igyai nimai bak Abner de tentara nya di intun keret Benyamin him ibou sratus ningai ba, ningot muhwindagom ei pran di ikon bit yamti dima. 32 Gima leu lene Yoab ya tut nide tentara nya bikon Asael ningut bimbut tut leu api itig ei jui nsi di nide bat nya ide ei Betlehem. Leu api Yoab ya tut nide tentara nya ba, injei bram yam mmun jei dima kikau ba, dideu njap tekti yuug krau Hebron.