18
1 Lene Saul kin Daud ikes ighyet hon bimbrap bi. Mpe dima lene Yonatan di Saul nipmot hig nisut bit Daud nindig bibor lewo ningon ngakei Daud bit leu nok ningon ngakei nonti. 2 Hon kep njap di Saul mbrap bit Daud pima ne noni kon Daud biya kui noni lene ce tut noni ngkwei hanyen ug ei nitimieisi bu bi kikau. 3 Lene Yonatan preu ei kin neheng bipia Daud kin noni yahacem ingon ce yam bi bijo ninno bijo kikau. 4 Lene noni juk nide sinsun ndok di jei leu no lene yai bak Daud bitut nide sinsun pran kin simeda kin hampiap kin bang cem hagom.5 Daud yai kep midyai bit leu Saul nicuk noti nya hagom nok gi kei. Gima rino Saul ta noni nok nibou tentara gom apino nibou tentara nindigsi kin ide limwa nya yahagom ijoi sut noni.
Saul wok Daud
6 Tirigi Daud kwei hanyen leu niyai nimai bak Goliatti ba, tentara nya ingkwei hanyen bicoi ug ei ide minu ndig lene sop nya yehei leu ide minu ndig nya hagom ei hanjop Israel bigya um Nibou Ndig Saul. Yoni iba ingon di llei bibor bipai doia ba, ipri-pri nyen bikek ide mun di nggileng kin ide nggong mbrei nya cem. 7 Tirigi ipri-pri nyen lene ipai doia nok gini <<Saul yai nimai bak nide siceu nya ibou sribu-ribu gom noro Daud yai nimai bak nide siceu nya ibou sribu-ribu simnai.>> 8 Saul joi sut ighyet dima bi ba, ningon sibui sut yok nindig bibor lene pai <<Yoni ikan bipia Daud yai nimai bak nide siceu nya ibou sribu-ribu simnai noro dani diyai nimai bak ditde siceu nya ibou sribu-ribu gom he e? Mbigom lene yoni mita noni nok nibou ndig di ya luei dohoti!>> 9 Hon kep njap dima kui lene nibou ndig ningon kinei sut Daud.
10 Njap di hyep bu tirigi Saul gwam ei nide ig bikrau micim gom ei nindati rino Allah pinak ninnei rom gom kwei hwen bit noni bibindei ba, mirei bon ba, nintin kiek cem. Mpe dima lene Daud kek nide nggong mbrei bit leu nok niyai kepti. 11 Lene Saul kan <<Misidat Daud bipek kin dring hak ug. Gima rino noni ba micim bidat Daud mbican lo, Daud pri leu biningwes ngun.>>
12 Saul ningon huk niti bikan bipia TUHAN nyohou Daud noro kes noni ei su. Gima rino noni ttin tut Daud. 13 Gima rino noni kes Daud bibong ter leu api Saul ta noni nok nibou mem tentara ibou sribu gom. Nok gima lene Daud njei sut nide limwa nya ba, ikon pran. 14 Noni yai bipek kep midyai di yai nya hagom lewo TUHAN mpu noni. 15 Tirigi Saul ngat lo, Daud yai bipek kep midyai di yai nya hagom nok gi kei lene ttin tut noni nindig bibor bu. 16 Noro mben Israel kin Yehuda nya yahagom ijoi sut Daud nindig bibor lewo noni nok nibou di ta nibou ei nide midyai nyati.
Daud wak Saul nipmisop nok nitnem
17 Mpe dima lene Saul kos tut bipia Daud mitug ndei nimai tug hon nikon pran bit mben Filistinti lene suar Saul nonti yai nimai binoni bi. Gima rino noni pai bak Daud <<Midindo dipmisop mighumbou Merab bina nok atnem gino ata abou ei nikon pranti mem TUHAN.>>
18 Lene Daud buhup <<Dibon dinyeng bi lene dicig kin nide bat nya cem ibon inyeng ei mben Israel igyai him bi. Nggon rino na di Andigpoi ajem apmang bit da i?>> 19 Noro tirigi nicunti dem mem gima Saul ndo Merab bak Daud nok nitnem lene Saul ndo noni bak Adriel leu minu mien Mehola nok nitnem.
20 Mpe dima lene Mikhal di Saul nipmisop nipumiap bungwam kep Daud nindig bibor. Tirigi Saul kan tut gima tu lene ce tut. 21 Lewo kan <<Misindo Mikhal binoni nok nitnem leu binhyepo siba sipmisop bisrou noni leu api noni micut bak tentara Filistin bitug ndei nimai.>> Lene noni pai nimbican bak Daud <<Nogindini bon nituti mem dijem dipmang bit na.>> 22 Lene noni sok nihyet ei nide nibou nya di igya kui noni dip leu binhyepo ipai nyahan bak Daud <<Nibou ndig kin nye di niya kui noni cem nahagom nijoi sut na nindig bibor. Nogindini bon nituti di kei bibor mem gima awak nipmisop nipumiap nok atnem.>>
23 Gima rino indat kep Saul ningon kanti dima bak Daud leu api noni buhup <<Jikan bipia krop kei mem tungwagom jem nipmang bit nibou ndig e? Dani ne dem mem bi lewo duhui mbum ba, dibon dinyeng bi cem.>>
24 Lene nibou pima yok indat igbit Daud nibuhupti bak Saul. 25 Lo bi lene Saul sok nihyet ei yok dip bu leu binhyepo ipai bak Daud <<Nibou ndig kak tut mimbron nindig bibor bi. Noro ma ahwen mben Filistin ibou sratus gom he ba, apwoi ingkek kulup kwei mem Saul. Tug hon nisinati dima lene noni mibirop hanyen bak nide siceu nya.>> (Saul kos tut nok gima leu binhyepo Daud mitug midut tug hon nikon pran bit mben Filistinti.) 26 Gima rino nibou di igya kui Saul yuug ndat kep Saul ningon kanti bak Daud. Lene Daud ningon llei sut nituti tirigi jem nipmang bit nibou ndig. Nipou tirigi tto bou dem mem niwak yamti dima bigyo, 27 lene Daud kin nide limwa nya ihwen mben Filistin ibou sratus can leu api pwoi ingkek kulup nya kwei bikwop kep nimangti ei Saul niyai him. Tirigi Saul ngat gima tu lene suar ndo nipmisop bak Daud binok nitnem.
28 Saul ningon kan bipia TUHAN nyohou mpu Daud ba, nipmisop Mikhal bungwam kep Daud nindig bibor cem. 29 Gima rino noni ttin tut Daud nindig dor njiriek nipou pima lene ba nitok bak noni kikau ug bipek niyaijo ningwig honti kep.
30 Bikwop mpe dino tentara Filistin mikwei kon pran bit mben Israel lene Daud bindei timek yok bingwig dor njiriek nibou tentara Israel nindigsi di ikon pran bit yok nya. Apino Daud ninyeng jei bibor.