Goliat srep huk mben Israel
17
1 Mpe di gom ne tentara Filistin induk yam ei minu ndig Sokho ei hanjop keret Yehuda ide binjei bram yam mem gima ikon pran. Yohok ide prak meng yati dideu Efes-Damim ei Sokho kin Azeka ikieti. 2 Lene Saul kin tentara Israel cem induk yam ba, yohok ide prak meng yati ei Mbang Briep Ela. Lene itin ei mem gima ikon pran bit tentara Filistin. 3 Gima rino tentara Filistin idis yam ei mbigdip di jo nite hi mem gima ikon pran lo, tentara Israel idis yam ei mbigdip di jo nite hi bu mem gima ikon pran. Lene mbang briep gom jo ikieti.4 Lene Goliat di timiei minu ndig Gat ya bibie mem tentara Filistin ba, kiju bisrep huk tentara Israel. No dini nintig bou jei ba, nibou nggram him jo nai ba, naanjanti meter ningai. 5 Lene noni ttin topi ba, juk sinsun pran di iba ngkimom-tembaga bibon ba, nibuhunti kilo ningot muhwi ba, muhwindacan. 6 Noni juk sinsun pran di iba ngkimom-tembaga bibon ser nimig ba, ttei micim bikes ei ninghat dip cem. 7 Nide micim nika nindig ba, nok oi ka di jei lene bon ninggwenti di nibuhunti kilo muhwindacan. Lene tentara gom ya kui noni bibie tut nide mun di bipukep tibor ninggwenti nya. 8 Goliat kiju biya lene kon nihyet bisrep huk kep mben Israel bipai <<Jibon mindei ei sirima i? Mijikon pran e? Dani ne mben Filistin rin noro jeni jinok Saul de awak nya! Ma jicuk tungwagom leu jide tentara di mimbri kui ningkek kwei binitot yam. 9 Gino dicut bak noni bidimai lene nyeni nahagom mininok awak mem je. Ne gino noni cut bak dani bimai lene jahagom mijinok awak mem nye. 10 Nogindini disrep huk je di tentara Israel. Ma jidimig tungwagom leu jide tentara ei leu binhyepo noni kwei binitot yam!>> 11 Tirigi Saul kin nide limwa nya imiap nihyet lene yahagom ingon nde bibor ba, ittin tut nindig bibor.
Daud kwei ngat Saul ei nide prak meng yati
12 Daud nicig ninyeng Isai lene Isai tig mbier tut keret Efrata bibong ei Betlehem ei hanjop keret Yehuda ide. Noni yai nipmot bat nya ibou muhwindaningai. Tirigi Saul ninyeng tak kep mben Israel lene Isai nok andig-ndau leu su. 13 Nipmot bat nya ibou ningai di indig su ibit Saul bikon pran. Mot mighumbou ninyeng Eliab lene nican ninyeng Abinadab lene niningai ninyeng Syama. 14 Daud ne nipumiap ri. Tirigi nikindig bat nya ibou ningai pima ikon pran bit Saul lene, 15 noni ngkwei-ngkwei nyen ug ei Betlehem leu binhyepo hyen kep domba di nicig de nya.
16 Noro Goliat no srep huk mben Israel mem njap bigyokti kin mmunti cem kikau mem njap ningot bitai.
17 Mpe di gom lene Isai pai bak Daud <<Ma apwoi trem kilo simnai di dibam ei su kin roti nindak simnai dini lene ma attei ba, ayai bak akindig bat nya di ibong ei tentara ide prak meng yati. 18 Apwoi keju nindak simnai dini cem lene attei ba, ayai bak ide nibou pran. Ma ahig ser yok ingwes ngun e? Tirigi akwei hanyen lene ma apwoi mun di bindo bipia angat yok bou ayai him ba, ingat rin nok gi kei kwei. 19 Yoni ingat rin ei Mbang Briep Ela bigya kui Saul lewo tentara Israel ikon pran bit mben Filistin ei mpia dima.>>
20 Njap di hyep bu ne Daud kiju mem njap tekti bikes nide domba nya bak hiter binyohou yok leu api pwoi njita dima bittei bit leu nok Isai nicuk noti. 21 Mpe dima lene tentara Filistin kin tentara Israel iba yoho rok yam ba, itin ei mem gima ihwen yam. 22 Lene Daud kes njita dima bak nibou pran leu api brim nimig bidor buug ngat nikindig bat nya ei idis yamti bihig ser yok tut mun di pek kep mem yok. 23 Tirigi noni mbrap bit yok rino Goliat tau ei nibreisi bisrep huk tentara Israel bit leu nok niyai kepti pima. Leu api nihyet tibim ei Daud nitingou nsi.
24 Tirigi tentara Israel ingat Goliat nitausi lene yahagom inang bingwig lewo ittin tut nindig bibor. 25 Yahagom icuk yam bipai <<Jingat no dima i! Jimiap nisrep huk nyeti dima i! Ide nibou ndig Saul preu ei mem nye bipia tungwa tou rino bindei timek no dima mitug ndei mun di kei bibor. Lene Saul mindo nipmisop gom bak no dima nok nitnem cem. Lene no dima nicig kin nide bat nya migo belasten bu bi cem.>>
26 Lene Daud hig ser yo di igya ei sirima <<Ui! No di ngkiai di mben Filistin dima brim ningkek bisrep huk Allah di niyaijo de tentara e! No di bindei timek noni bibindei ba, noni minim kep nye di mben Israel bu bi mitug ndei mindei ngan i?>> 27 Lene yo dima indat kep mun di Saul preu ei mem no di mibindei timek Goliat.
28 Daud nikindig di Eliab miap Daud nihyet tirigi mbrap bit tentara pima yok leu api ningon sibui sut bipai binoni <<Akwei nggon i? Tou rinyohou ade domba nya ei iggum ndigsi dima i? Dikan tut bipia aba angon di jei bibrim angkek kwei mem gima atou kep nye di nikon pran dini he!>>
29 Lene Daud hig ser noni <<Dibon mun tunggwei nok ndei i? Dem mem gima dihig ser je tut mun nyeng gom bi e?>> 30 Lene noni kiek no bihig ser tentara hiter nya bu bit leu nok noni hig ser no pima lo, mpe di hig ser yok sindam lene ide nibuhupti hagom noyam.
31 Lene ibou poi di imiap mun di tibim ei Daud nuhui him ikwei pai sut bak Saul leu api Saul sok nihyet mem Daud kwei ya noho bei. 32 Lene Daud pai bak Saul <<Andigpoi e, ma ade limwa nya ittin tut mben Filistin dima au! Ditin ei mem gima dihwen noni.>>
33 Lene Saul srep bipai <<E bi! Notou mem gima ahwen bit noni i? Nani ne pinai pilei he noro noni ne Nihwen Kep Mun Cig rin ba, mimbri kui ningkek nipou kwei bipek ammani kep.>>
34 Lene Daud buhup <<Andigpoi e, dinyohou dicig de domba nya igkei. Mpe dino mindhe singa kin beruang cem kwei ham domba mien lene, 35 duhuk mindhe dima bidiyok kep lene diteu domba mien dima biningwes ngun. Lene gino singa e, he beruang e, ttem da lene dikat nikimam bidibui bimai. 36 Dibui singa nya kin beruang nya bimai lene midibindei mai ngkiai mben Filistin dima cem bimai drek dip gi noni srep huk Allah di niyaijo de tentara nya. 37 TUHAN teu da bidingwes ngun leu singa nya kin beruang nya tu. Gima rino dikan tut bipia noni miteu da bidingwes ngun leu mben Filistin gom dima cem.>>
Lene Saul buhup <<Nnaba aug hwen noni hak ug. TUHAN misindem tut na.>> 38 Lene Saul yai nide topi di iba ngkimom-tembaga bibon bijuk Daud nibou lene yai sinsun pran binoni bijuk. 39 Lene Daud ba simeda di Saul de bikri kin sinsun pran di noni juk bimbut nimig noro nimbumbati dima hagom mpu noni bi lewo noni juk sinsun pran nipou kwei bipek ammani kep bigyo. Gima rino noni pai bak Saul <<Bit bon dijuk sinsun pran dini bidimbut tut kan bi.>> Lene noni juk sinsun pran dima hagom leu no. 40 Lene ug yai nide tom nibinyohou domba nya lene biyai tig di dia-diau kei ninjep muhwi leu minyei ngeisi bipwoi ei nide minaiti lene mbut tut. Leu api noni tin ei nide bikumsikik di noni ba mindhe ningkek bibon buug um Goliat.
Goliat cut bak Daud
41 Noro Goliat mbut sindam kwei ndam Daud lene nide tentara gom bie noho bikon Goliat de mun di bipukep tibor ninggwenti nya. 42 Tirigi noni kwei dideu bingat igbit Daud tu lene ningwes om kep bipa ndip noni lewo Daud ne pinai pilei he di ningkek sibui kei. 43 Lene noni pai bak Daud <<Attei tom dima kwei mem mindei i? Akan bipia dani ne nsien rin e?>> Lene noni sigion Daud tug hon nide kwar di kuk no bak a. 44 Lene noni cug Daud bipai <<Akwei! Midiyai nimai bina ba, awer nimbiam leu api midikes angut ei mem ha nya bipuk lene mindhe nya bibriug ug ri.>>
45 Noro Daud buhup <<Nani aba ade simeda kin micim kin tigtug bihwen bitda noro midihwou hwen bit na tug hon TUHAN di nok tentara Israel ide Allah Di Sindem Bibor po asrep huk pima ninyenga. 46 Njap di ammani ne TUHAN mikes na ei dindati bibindei ba, acut bak dani leu api midirop abou leu ug ri. Lene midikes angut kin tentara Filistin ingut ei mem ha nya bipuk lene mindhe nya bibriug. Leu api tungwatu dihyeisi dini hagom mikan tut bipia nye di mben Israel nibon nyende Allah di nikuk nye bak. 47 Lene yo di ingat rin ei mpia dini mingat bipia TUHAN suar simeda kin micim nya leu binhyepo biteu nide limwa nya bingwes ngun bi. Nongkom kos tut ningon kanti mem pran dini leu api mikes je ei nyeni nindati ug ri.>>
48 Lene Goliat sindi nitta tti ndam Daud hanyen bu lo, Daud dor ndam mben Filistin di idis yam pima mem gima hwen bit Goliat. 49 Noni hit tig njep gom leu nide minaisi bikes ei bikumsikik pimati lene biprindei Goliat. Tig dima ndei Goliat ningwak bibindei ba, nibou ki leu api tti biba ningwak bikik dihyei bimai nimbiam. 50 Daud krau simeda ei nindati bi noro ba nide bikumsikik kin tig njep gom ngat dima biyai nimai bak Goliat! 51 Leu api Daud dor biyok niyai kep Goliat ningut biya srak ko hagau noni lene kus Goliat de simeda leu nahamti leu api birop nibou leu bibindei ba, noni mai jit.
Tirigi tentara Filistin ingat lo, ide Nihwen Kep Mun Cig mai su lene yahagom inang bingwig. 52 Lene tentara Israel kin Yehuda imbos-hi-mbos ba, yuhuk bram yok njiriek minu ndig Gat kikau ug ei dimbou hui ei minu ndig Ekron. Itot tentara Filistin imang bibor bibindei ba, itug ndei ibok buhun bibor leu api yo di ibok itti ug ei dihyeisi kak puig dima kikau ug ei Saaraim. 53 Tirigi tentara ingkwei hanyen leu yuhuk mben Filistinti lene ipos ndigban ei mben Filistin ide prak meng yati hagom bingwig. 54 Leu api Daud ug yai Goliat nitibou bug sut ug ei minu ndig Yerusalem. Noro noni ttei Goliat de minggwen nya hagom ug ei nide prak mengti.
Abner buwak Daud bindo noni igbit bak Saul
55 Tirigi po Saul ngat Daud brim ningkek mem gima ug bindei timek Goliat pima lene noni hig ser nibou pran <<Abner e, no dima nicig tou i?>>
Leu api Abner buhup <<Andigpoi e, dikan tut bi.>>
56 Lene Saul cuk noni bipai <<Aug nggok tut nicig ninyenga.>>
57 Niabiati Daud yai nimai bak Goliat leu api kwei hanyen ei nide prak mengti lene Abner kwei buwak noni ug ei Saul noho bei lo, Daud no krau Goliat nitibou bikwei sut. 58 Lene Saul hig ser noni <<Dipmot na e, acig ninyeng tou i?>>
Leu api Daud buhup <<Andigpoi e, dinok awak ba, dicig ninyeng Isai di bong ei Betlehem.>>