22
1 Gino je di mben gom nide sapi kin domba cem srawir leu api hi ngat mindhe dima lene ma jibon jenti nok no di kan tut bi au. Noro ma jijem mindhe dima hanyen bak niceu. 2 Gino niceu nide ig ting ba, jikan tut mindhe dima niceu bi lene ma jijem mindhe dima ug ei jide biyati. Ba, gino niceu kwei nggok lene ma jikes bak. 3 Ma jiyai nok gima tut keledai ningut gom kin sinsun kin mun nyeng hiter nya di je di mben gom ide di jittau kep nya hagom cem.4 Gino keledai ningut gom e he sapi ningut gom e, di je di mben gom nide tti bicut ei puig sinon lene jibon jenti nok yo di ikan tut bi bibor au. Noro ma jimpu noni ba, jibindei kiju mindhe nide dima hanyen.
5 Sop nya ma ijuk sinsun di noyam kin pinai nya ide sinsun au. Lene pinai nya cem ma ijuk sinsun di noyam kin sop nya ide sinsun au. Lewo jide TUHAN Allah kou sut yo dima ide niyai munti dima bibor.
6 Gino jittau kep ha naham gom ei biei nggramti kin dihyeisi cem ba, hawek bong kep nidinggwei ba, kieng ninyehei gau nimien bat nya cem lene ma jipilei nipmem leu au. 7 Ma jikam ha mien nya noro ma jisindui sut nipmem bidimba ug. Leu binhyepo jibong kei jigwam kei ba, jide njap jei.
8 Gino jingot ig lene ma jijang jang ser ig ninjek dip ninghas him nya leu binhyepo gino bihi icut leu ig ninjek dip dima ba, imai lene nibuhunti micut igkep je bi.
9 Ma jita njita bou hiter ei jide miai ba anggur nghousi au. Noro ma jita ba anggur kioi he eisi. Gino jita njita bou srigsi lene ma jipigig sut ba anggur ningat kin njita kioi hiter nya cem ei mem TUHAN.
10 Ma jiprion biei ei sapi ningut gom kin keledai ningut gom ninggibi dip mem gima jibikkin dihyei au.
11 Ma jijuk sinsun gom ngat di iba domba ninta kin minyahas linen di dia-diau kei bibien au.
12 Ma jiba sinsun bou mbu bimau jide sinsun nghas niyenti bitai.>>
Nicukti tut pinai kin sop imbier kim yamti
13 <<Nibingon tut pinai gom di wak sop gwam nitta pilei gom leu api kou sut noni ei nidipti bu. 14 Bipai kep nitnem bipia ei mpe di igyem njita tut yamti lene ngat lo, nitnem gwam nitta pilei bi.
15 Tut gima lene suar sop nide ndigpoi nya igyai minyahas nibongti di ninggrom joti di bindo tut bipia mpe di igyem njita tut yam lene ipmisop gwam nitta pilei yo. Ma ittei minyahas dima bindo bak nibou ei minu ndig dima bou nikei nya igyai him. 16 Suar sop dima nicig pai biyok <Dikes misop de bak no dini binok nitnem lo, nogindini kou sut noni, 17 bipai kep bipia mpe di igyem njita tut yamti lene nitnem gwam nitta pilei bi. Noro minyahas dini bindo tut bipia mpe dima ne dipmisop gwam nitta pilei yo. Ma jingig jiyai kep ninggrom di jo nide minyahas nibongti dini!> 18 Pai nok leu api ma nibou minu ndig dima ikat pinai dima bibui noni. 19 Lene suar ikak tut noni ba, yai mitiei perak sratus gom bak yoni drek dip nitunggweisi leu api igyai mitiei dima bak nipmang drek dip gi bibon sop gwam nitta pilei mben Israel ninyeng kinei a. Nok gima cem suar sop dima ya kui nok nitnem kikau. Harin dima nijjep kou sut nitnem dima kikau bimai kep a.
20 Ne gino nipai kepti dima igbit ba, mun di bindo bipia nitnem dima gwam nitta pilei mpe di igyem njita tut yam dima bi, 21 lene suar ibuwak sop dima ug ei nide ndigpoi ide dimbou hui a. Suar ndigpoi nya leu minu dima iba tig bihwen noni ei mpia dima kikau bimai hak. Sop dima bibon mun di biyai nimmai bak ide mben tug hon niyem njita tut pinaisi mem nijam di noni bong bit nide ndigpoi nipou tirigi wak nijjep bigyo. Tug hon nisinati dima mijicok tut sisar di kinei dima leu jikieti.
22 Gino jittau kep pinai gom di yem njita tut hiter nitnem lene suar jikes hukum nimai ei yahacem dip. Tug hon nisinati dima mijicok tut sisar di kinei dima leu jikieti.
23 Gino jittau kep pinai gom ei minu ndig hi di yem njita tut sop di gwam nitta pilei di hiter yok wa kep tu, 24 lene suar jikri yok ug ei minu ndig dima nisai lene jiba tig bihwen yahacem bimai. Suar sop gwam nitta pilei dima tug ndei nimai lewo mbro nok gino bong ei minu ndig dideu tungwatu nya di itingou dile tut nihyet lo, hara tut bi. Lene suar pinai dima tug ndei nimai lewo yem njita tut sop di hiter yok wa kep tu. Mijicok tut sisar di kinei dima tug hon gi jiyai nimai bak yo cin dima.
25 Gima ter leu gino pinai gom nggek sop gom di hiter yok wa kep tu ei ngoi dumti. Suar jiyai nimai bak pinai dima nongkom he drek dip niyai munti dima. 26 Noro ma jingget sop gwam nitta pilei dima au lewo noni bon mun di biyai nimai drek dip bi. Munhyet dima noyam kin tungwagom di bisinggre biyai nimai bak hiter hak. 27 No dima nggek sop di gwam nitta pilei dima ei ngoi dumti ba, mbro nok gino sop hara tut lo, hi miap nihyet bikwei mpu noni bi.
28 Gino jittau kep pinai gom tirigi nggek sop di gwam nitta pilei gom di hiter yok wa kep bigyo, 29 lene suar pinai dima njei mimbron di dem mitiei perak ningot muhwi bigo bak sop gwam nitta pilei dima nicig leu api buwak sop dima nok nitnem lewo nggek noni bit leu ningon kanti. Nok gima cem suar sop dima ya kui nok nitnem kikau. Harin dima nijjep kou sut nitnem dima kikau bimai kep a.
30 Harin dima tungwagom yem njita tut sop di nok nicig nitnem ndrim a. Lewo ba niyai munti dima binim kep nicigya.>>