Yo di icoi bit TUHAN de limwa nya bi
23
1 <<Harin dima no di ikwai nisindemti leu kin no di ikos nikei bisi leu su nya icoi bit TUHAN de limwa a.2 Harin dima no di srek tug hon niwak yamti gi bi bitut yo di intun noni him gi bram yam nya nigom kikau ug bipek gi nisimnai icoi bit TUHAN de limwa a.
3 Harin dima mben Amon kin mben Moab bitut ide nintun him di bram yam nya gi nigom kikau ug bipek gi nisimnai icoi bit TUHAN de limwa nya a. 4 Lewo tirigi po jehei leu minu Mesir ba, jingat rin ei puig sinon pima yo dima ingondut je ba, ikwas njita kin minyei tut je bi. Nok gima cem ingot kep Bileam di Beor nipmot leu minu ndig Petor ei Mesopotamia leu binhyepo sigion jeni. 5 Noro jide TUHAN Allah ngig nitingou mem Bileam nihyet bi. Lewo Noni ngondut je lene ba mun di kei biluei nisigion jeti dima. 6 Ma jimpu mben dima ba, jibindei ba, ibong kei igwam kei cem tirigi je di mben Israel jingat rin ei dihyei ninjek dip dini au.
7 Ma jingwes om kep mben Edom au lewo yo dima ne jimbier kimti ri. Ma jingwes om kep mben Mesir cem au lewo nipou yo lene jibong ei ide minu tu. 8 Ma jisindui sut yok ba, dem mem ide nintun him yamti di bram yam nya icoi bit TUHAN de limwa nya.>>
Suar inyohou tentara ide prak meng yati bipwoi
9 <<Gino jibong ser jide prak meng yati mem nijam di jikon pran lene suar joom je leu mun nyeng hi di bindei ba, map kui jeti. 10 Gino map kui tungwagomti drek dip gi bindei hei nide minyei ei mpe di bong mai lene suar hei leu jide prak meng yati bibong nisai. 11 Son dideu mmunti lene suar kek minyeiti lene ngkwei hanyen ei prak meng yati mem mpia nikimbasti.
12 Suar jitin ei gimuhukti ei mpia ttou nsi gom ei jide prak meng yati nisai mem gima jooi eisi. 13 Gino juug ei sirima lene ma jipwoi nimbumbati di jisuar nya bitut hyen gom. Lene ma jiba hyen dima bitig jui mem gima jooi eisi leu api jibiji kep hanyen. 14 Jide TUHAN Allah ningat rima bit jeni ei jide prak meng yati. Noni nyohou jeni bibindei ba, joom kep jide siceu nya cem. Gima rino ma jinyohou jide prak meng yati bipwoi. Ma jiyai mun di bindei ba, TUHAN niyai kou ningat au. Leu binhyepo Noni kes jeni ei bi.>>
Nicukti nikenti nya
15 <<Gino awak gom nang leu nide andigpoi leu api kwei hara je mem gima jicuon niyaisi lene ma jicuk bingkwei hanyen au. 16 Lene nna ba noni bong hak ei jide minu ndig gom bit leu nijoi sutti. Ma jiba jimbuk kak awak di inang leu ide andigpoi nya kwei au.
17 Harin dima mben Israel nipinai kin nisop cem kes no binok no di cut igkei ei mpia di ngkiai nya ikuk yok bak ide kwar nya eisi a. 18 Nok gima cem ma yo dima ipwoi ninghoi di iba ide nicut tut yamti bipek dima ba, yuug sut ei jide TUHAN Allah de ig bibigo mun di yoni ipreu ei mem Noni tug hon neheng au. Lewo jide TUHAN Allah ningon mpo tut yo di icut igkei ei mpia di ngkiai nya ikuk yok bak ide kwar nya eisi bitut ninghoi di ibipek mem yonti cem.
19-20 Gino jiyai jide mitiei nok ningwam bak ngkiai gom lene ma jibidip huk noni tut nikum ei nibittemti. Noro gino jiyai mitiei hi kin njita hi kin ndigban hiter nok ningwam bak jisut mben Israel gom lene ma jibidip huk noni tut nikum ei nibittemti leu mun di jiyai nok ningwam bak dima au. Ma jibit jide TUHAN Allah nicuk jeti dima lene Noni minjei mun di kei bak jeni tug hon jiyai munti nya hagom ei minu di jei bi mijiyai bijiyati.
21 Gino jipreu mun nyeng hi ei mem jide TUHAN Allah tug hon neheng lene ma jitum jingon tut mun di jipreu ei dima au. Lewo jide TUHAN Allah yok ningon mem mun nyeng di jipreu ei dima kikau ba, gino jiyai bipek kep bi lene gima nok sisar di jibon tut Noni. 22 Gino jipreu mun nyeng hi ei mem TUHAN tug hon neheng bi lene gima ne sisar di jibon rin bi. 23 Noro gino jiba jide ningon joi sutti bipreu mun nyeng hi ei mem jide TUHAN Allah tug hon neheng lene suar jiyai bipek kep jihyet nghwak him dima.
24 Tirigino jikak puig di bikwam ug ei miai ba anggur nghousi di hiter de nikieti ba, jipuk bijiyem ningat bit leu jijoi sutti lene dwai. Noro ma jimbus ningat bijipwoi ei bansiti au. 25 Gino jikak puig di bikwam ug ei miai gandum nghousi di hiter de nikieti ba, jiyem ningat di jillet ei jindati lene dwai. Noro ma jiba singau koi bikos gandum nintam titut au.>>